VIDEO/ Basha: Rama do përballet me të gjitha format, kullave të Fusha-s do i vendosim minat …
Kreu demokrat, Lulzim Basha, akuzoi Kryeministrin Edi Rama se i është turrur si taleban shkatërrimit të Teatrit Kombëtar.
Në një komunikim për mediat, Basha tha se kryetalebani dhe talebanët e tjerë, çdo ditë po demaskohen para Europës dhe Botës për interesat mafioze që kanë lidhje me projektin e Teatrit Kombëtar.
“Rama ka 20 vjet që synon realizimin e këtij projekti. Tashmë që është kryeministër ka hedhur hapat për realizimin e këtij projekti, që tashmë është provuar se do të përfitojë 205 milionë euro, që është më shumë sesa buxheti i Shqipërisë për mbrojtjen”, tha Basha.
Sipas tij, Rama pasi kapi pushtetin gjyqësor, pasi ka kapur çdo media pa përjashtim, tani po tenton që të shpallet pasha i pashallëkut të Shqipërisë.
“Nëse lejojmë një ligj special që bëhet për synime korruptive të grabisë pronë publike, për të shkatërruar një momument kulture, në kohën kur s’kemi Gjykatë Kushtetuese, atëherë nesër ai do të shkatërrojë pronat private të çdo qytetari. Instrumenti që hedh poshtë nismat e qeverisë që shkelin të drejtat e qytetarëve është Kushtetuesja, e cila sot është inekzistente”, tha Basha.
Në vijim, kreu demokrat theksoi se punimet që janë kryer në Kryeministri, e cila është kthyer në një institucion me salltanete, janë kryer nga firma Fusha, e cila ka përfituar mbi 80 milionë euro nga fondet publike.
Basha tha se firma Fusha ka përfituar mbi 290 metra katror në zonën e Teatrit, ndërsa Edi Rama pothuajse me një vendim qeverie përgjysmoi vlerën e tokës në këtë zonë.
“Në 2017, në një kohë kur opozita protestonte, Edi Rama nxorri nga zona muzeale atë të Teatrit Kombëtar. Gjithashtu harta që tashmë është bërë publike, tregon se prona që pretendohet se i përket Fusha, nuk është kufitare me Teatrin, sikundër mashtrohet përmes ligjit”, tha Basha.
Sipas tij, PD ka qenë dhe mbetet kundër shembjes së Teatrit Kombëtar.
“Ky është atentat ndaj lirive, pronës dhe shëndetit të qytetarëve shqiptarë, si një diktaturë e krimit dhe aferave kriminale.
Nëse Rama do të vazhdojë në projektin e tij mafioz, popullit i lind e drejta të veprojë me të gjithë format e mënyrat. Po i jap një paralajmërim të qartë Fusha shpk që nuk do të keni asnjë shans që të gëzoni frutet e një ndërmarrjeje të tillë kriminale.
Çdo veprim i Fusha shpk dhe çdo entiteti tjetër do të jetë pjesë e një ligji të amenduar anti-mafia, që do t’ju sekuestrojë çdo cm tokë dhe euro, për çdo shkelje që do ju konstatojmë. Nëse do të vendosni minat ndaj Teatrit, do ju vendosim minat ligjore ndaj kullave. Ky paralajmërim vlen edhe për ndonjë bankë që ka menduar të investojë në këtë project mafioz”, tha Basha.
