Na ishte dikur fjala e parë, pastaj erdhi Edi Rama, dhe…

Sot, “Rilindja Demokratike” flet fjalën e parë të saj! Kështu u tha 33 vjet më parë kur lajmëtari i rrëzimit i të diktaturës u fut në familjet shqiptare duke marrë mbi vete një barrë të rëndë, që të thotë fjalën e vërtetë dhe duke u zotuar se do ta shprehë dhe do ta mbrojë mendimin e lirë të gazetarëve e bashkëpunëtorëve, gjer të drejtën e ligjshme të mendimit e të shprehjes së lirë në një popull të tërë.

Madje, që në fjalën e parë, “Rilindja Demokratike” bën thirrje që askush të mos cënohet, të mos persekutohet, të mos censurohet për shkak të fjalës, mendimit e të shprehjes, pa e menduar se në krye të këtij shteti, vetëm pas 22 vjetësh, do të vijë njeriu që do të pretendoj i vetëm të thotë fjalën e parë, ta thotë vetë ai të vërtetën duke pretenduar se ashtu siç thotë ai, mendimi i lirë është i ligjshëm dhe mund ta thotë një popull i tërë.

Po, ky është Edi Rama, ai i cili pasi bërë pis mendimin e lirë që në ditët e para të pluralizmit, zu vend në gazetën e partisë kriminale, “Koha Jonë”, ku gjetën strehë të gjithë ata që infektuan themelet e “Rilindjes Demokratike” për të vazhduar operacionin e rikthimit të diktaturës ku e para sërish do jetë fjala, por, fjala e Edi Ramës. Kështu dhe ndodhi!

“Rilindja Demokratike” u zotua që në ditën e parë, që në çdo fjalë e në çdo gërmë, do të ketë çështjen e kombit e të atdheut, dhe sot 33 vjet më pas kemi shumë më shumë media, por nën kontrollin e Edi Ramës që në çdo fjalë e në çdo gërmë luftojnë kryesisht kombin dhe atdheun!

Që në ditën e parë që pa dritën e diellit me sy, “Rilindja Demokratike” u zotua se do të shihemi e do të kuvendojmë me vëllezërit tanë kosovarë, me të gjithë vëllezërit tanë të shpërndarë nëpër botë, nga brigjet e tejshme të Adriatikut e gjer në kontinentin amerikan. Dhe, sot, Edi Rama, shihet dhe kuvendon me vëllezërit serbë, për ti marrë leje Presidentit të Serbisë, Aleksandar Vuçiç, se me çfarë mund t’i mashtroj shqiptarët e shpërndarë nëpër botë!

“Rilindja Demokratike” tha në fillimjanarin e vitit 1991 se i ka faqet e hapura, se do të interesohet për të gjitha problemet që ka populli, për ekonominë, për kulturën, për historinë, për letërsinë e artin, për të drejtën, për mësimin e mendimin, ndërgjegjen, për zakonin e traditën, për sot e për nesër. Por, sot, të gjitha mediat që kanë faqet e hapura, kontrollohen nga Edi Rama dhe interesohen për ekonominë, kulturën, historinë, letërsinë e artin, të drejtën, mësimin e mendimin, ndërgjegjen, zakonin e traditën e popullit të Edi Ramës. Të tjerët, e paçin veten në qafë!

“Rilindja Demokratike”, e cila lindi së bashku me Partinë Demokratike, u zotua se do të mbështesë dhe do të pasqyrojë çdo reformë demokratike që i shërben përparimit, pavarësisht se cila forcë politike do të jetë nismëtare dhe zbatuese e saj, si dhe do të kultivojë dialogun, tolerancën, pluralizmin. Sot, në 33 vjetorin e saj, kjo mbështetje nuk i duhet njeriu sepse aty është autori i reformës e përparimit dhe shefi i të gjitha forcave politike që i përvetësoi përmes gjykatave shqiptare, Edvin Kristaq Rama! Ndërsa atë të cilin nuk arriti ta nënshtroi dhe vazhdon të jetë Kryetari i Partisë Demokratike, Sali Berisha, e arrestoi!

Fjala e “Rilindjes Demokratike” nuk do të jetë kurrë lustër apo lajkë, do të jetë e rreptë ndaj burokracisë, ndaj autokracisë, ndaj çdo të keqeje që do të përpiqet të pengojë përparimin e vendit, lirinë e njeriut, forcimin e shtetit juridik shqiptar. Të mos qëndrojmë duarkryq para të keqes shoqërore dhe shtetërore, këtë do t’ia kërkojë lexuesit “Rilindja Demoraktike” u tha 33 vjet më parë. Por, sot, të gjitha mediat që marrin frymë lirshëm nuk dijnë të bëjnë gjë tjetër vetëm se llustër e lajkë , promovojnë autokracinë dhe çdo të keqe që po pengon përparimin e vendit, ata që vënë nën arrest lirinë e njeriut dhe nën kontroll shtetin juridik shqiptar me në krye Edi Ramën. E ata që nuk qëndrojnë duarkryq para të keqes shoqërore dhe shtetërore, pse duen Shqipnin e plotë, pse urrejnë namën e huej, pse janë, shqiptarë, i shajnë e i poshtnojnë, i plasin gjamën: Anmiq t’adheut! Tradhtarë!

Në fund, me lindjen e saj, si foshnje, “Rilindja Demokratike” kishte një dëshirë, njerëzit të mos thonë më: Mos më fol si në gazetë, por të thonë: Flasim si gazeta “Rilindja Demokratike”.

Po, kjo ishte dëshirë e 33 viteve më parë, kur u tha dhe fjala e parë, pastaj erdhi Edi Rama, dhe, sot, shqiptarëve u lejohet të thonë vetëm: Flasim si Edi Rama!

Fjalë e lirë: Ti shnosh!