Blegtorët bllokojnë aksin Kardhiq-Sarandë për uljen me 33% të qumështit nga përpunuesit
Blegtorët e Jugut kanë bllokuar sot aksin Kardhiq-Sarandë në një proteste kundër uljes së çmimit të qumështit që grumbullohet nga baxhot dhe fabrikat e përpunimit.
Blegtorët e deleve dhe dhive e kanë shitur një litër qumësht në vitin 2023 me 180 lekë, teksa janë lajmëruar se këtë vit çmimi maksimal do të jetë 120 lekë.
Blegtoret protestues pohojnë se, ulja e çmimit do të thotë faliment. Në një kohë që çmimet e lëndëve të para nuk janë ulur dhe mungojnë subvencionet shtetërore ulja e çmimit me 33 % e kërkuar nga fabrikat do ti penalizojë tufat e të imtave që po shkojnë drejt zhdukjes. Blegtorët e të imtave kërkojnë që çmimi dysheme të jetë 160 lekë për litër.
Teksa përpunuesit po kërkojnë uljen e çmimeve ndaj blegtorëve, nga ana tjetër vijojnë të mbajnë të larta çmimet e shitjes në markete. Aktualisht një litër një kos i lopës në tregjet e pakicës kushton nga 180- deri në 300 lekë për paketimet në qelq.
Vitin e kaluar çmimi me pakicë e bulmetit u rrit me rreth 15%, teksa inflacioni mesatar ishte 4.7%.
Blegtoria shqiptare prej vitesh po përjeton krizë, pasi numri i krerëve është përgjysmuar në dekadën e fundit. Blegtorët kanë vendosur të adresojnë problematikat e tyre me protesta.
Pas ditës së sotshme me 23 janar në orën 9:00 protesta zhvendoset në Levan të Fieri blegtoret e deleve në zonën e Vlorës.
Blegtoret, të zemëruar dhe të vendosur, kërkojnë një rishikim të çmimeve të qumështit dhe shpërbërjen e asaj që ata e perceptojnë si një monopol të fabrikave përpunuese. Ata argumentojnë se këto fabrika kanë ushtruar një ndikim të padrejtë mbi treg dhe kanë trajtuar blegtoret si skllevër të vitit 2023, duke i lënë ata pa një mjet të drejtë jetese. Protestuesit kërkojnë një çmim më të drejtë për qumështin që mundëson mbijetesën e tyre dhe e mbron industrinë vendase.
Nëse nuk ka një zgjidhje të shpejtë dhe të kënaqshme nga fabrikat ose instancat shtetërore, blegtoret kanë paralajmëruar për intensifikimin e protestave, përfshirë bllokimin e rrugëve dhe refuzimin demonstrativ të dorëzimit të qumështit.
Ata gjithashtu duan të ndërgjegjësojnë opinionin publik për rëndësinë e mbështetjes së produktit vendas dhe pasojat e importeve si qumështi pluhur dhe vaji i palmës./Monitor/
