Avokatët e Thaçit paralajmërojnë tërheqjen, shkak mospagesa! Ministra Drejtësisë: Kemi paguar…

Gregory Kehoe, Joe Reeder, “Greenberg Legal Associates” dhe anëtarët e kësaj kompanie, kanë kërkuar të tërhiqen nga mbrojtja e Hashim Thaçit në rastin e tij në Gjykatën Speciale për shkak të mosshlyerjes së detyrimeve ndaj tyre.

Ministria e Drejtësisë e Kosovës sqaron se janë likuiduar të gjitha detyrimet, por, ishte në fund vëllai i ish-presidentit, Idriz Thaçi i cili ka sqaruar situatën krijuar!

“Thaçi nuk ka përmbushur detyrimin ndaj Gregory Kehoe, Joe Reeder, Asociacionit Greenbuerg Legal dhe anëtarëve të ekipit mbështetës dhe Thaçit i është dhënë një paralajmërim i arsyeshëm se do të kërkonin përfundimin nëse nuk u është përmbushur detyrimi”, thuhet në njoftimin e Dhomave të Specializuara.

Po ashtu në njoftim është përfshirë kërkesa zyrtare e mbrojtjes së Thaçit, derisa thuhet se sipas rregullores, kur të caktohet grupi tjetër i mbrojtjes, avokatët paraprak duhet të vazhdojnë të bashkëpunojnë “në një periudhë prej jo më shumë se 45 ditë”.

Por pas publikimit të këtij lajmi dhe akuzave në drejtimit të Qeverisë Kurti pse po tërhiqen avokatët e ish-presidentit Hashim Thaçit, ka reaguar Ministria e Drejtësisë duke sqaruar se nga viti 2020, mbrojtja juridike e ish-presidentit Thaçi është paguar mbi tre milionë e gjysmë në përputhje me Udhëzimin dhe Marrëveshjen me avokatin Luka Misetiq.

“Në përputhje me Udhëzimin dhe Marrëveshjen e tillë (legjislacionin në fuqi), Ministria e Drejtësisë ka kryer të gjitha obligimet lidhur me pagesën apo kompensimin e mbrojtjes së z. Hashim Thaçi. Për më shumë, vetëm për vitin 2023, Ministria e Drejtësisë ka realizuar pagesa për mbrojtësit e z. Hashim Thaçi në shumën prej 1,371,800.00 Euro. Pagesa për mbrojtjen e z. Hashim Thaçi janë realizuar për vitet 2020, 2021, 2022 dhe 2023.

Për vitin 2020, është realizuar pagesë prej 83,107.41 Euro, për vitin 2021 është realizuar pagesë prej 1,114,901.00 Euro, për vitin 2022 pagesa është realizuar në shumën prej 996,600.00 Euro, dhe për vitin 2023 – është realizuar pagesë në shumën prej 1,371,800.00 Euro. Për të gjitha vitet, shuma e pagesës për mbrojtjen e z. Hashim Thaçi, është 3,566,401.41 Euro,” thuhet në reagimin e Ministrisë së Drejtësisë duke saktësuar se për avokatët e tjerë, nuk mban përgjegjësi për realizimin e pagesave ndërsa pëfundon:

“Aktualisht, Ministria e Drejtësisë ka Marrëveshje me avokatin mbrojtës të Hashim Thaçit, Luka Misetiq, të cilit në përputhje me Marrëveshjen, i realizon të gjitha pagesat me kohë. Ndërsa për avokatet tjerë potencial, qoftë edhe privat, të cilët angazhohen nga z. Thaçi, Ministria e Drejtësisë nuk ka Marrëveshje dhe nuk mbanë përgjegjësi për realizmin e pagesave. Pra, Ministria e Drejtësisë, në përputhje me Udhëzimin e tillë dhe legjislacionin në fuqi, ka realizuar me kohë të gjitha pagesat dhe obligimet për mbrojtjen e z. Hashim Thaçi.”

Në fund ishte vëllau i ish-presidentit Hashim Thaçi ai i cili pas reagimit të Ministrisë së Drejtësisë sqaroi situatën e krijuar. Duke falënderuar avokatin Kehoe dhe ekipin e tij për angazhimin e deritashëm, Idriz Thaçi ka sqaruar se kontrata me kompaninë ligjore “Greenberg Legal Associates” nuk është vazhduar në vitin 2024 për shkak të vështirësive financiare në mbulimin e kostos së të gjithë avokatëve të angazhuar.

“Në pamundësi për ta mbuluar koston për të gjithë avokatët e angazhuar deri në fund të vitit të kaluar, për shkak të vështirësive financiare jemi detyruar ta reduktojmë ekipin dhe tani avokat kryesor i z. Thaçi është z. Luka Misetic, i cili do të jetë në koordinim të plotë edhe me avokatët e tjerë ndihmës. Z. Kehoe ka qenë i informuar lidhur me vështirësitë në mbulimin e kostos së shërbimeve të ekipit të tij dhe për mos-vazhdimin e kontratës në vitin 2024. Ne e falenderojmë z. Kehoe dhe ekipin e tij për angazhimin e deritashëm dhe për punën e mirë që e kanë bërë në mbrojtjen e z. Thaçi,” shprehet vëllai i ish-presidentit të Kosovës, Idriz Thaçi, në reagimin e tij duke përfunduar:

“Po ashtu, besojmë se ekipi aktual do ta vazhdojë me përkushtim të plotë mbrojtjen dinjitoze ligjore dhe në fund të këtij procesi do të dëshmohet pastërtia dhe e vërteta e luftës së UÇK-së.”

Gjykimi ndaj Hashim Thaçit dhe ish-eprorëve të tjerë të UÇK-së, Kadri Veselit, Rexhep Selimit dhe Jakup Krasniqit ka nisur në Gjykatën Speciale në Hagë në prill të vitit 2023. Më 5 nëntor 2020, Hashim Thaçit i është konfirmuar aktakuza nga Dhomat e Specializuara në Hagë.