Britania në recesion

Ekonomia e Mbretërisë së Bashkuar zyrtarisht është në recesion, konfirmojnë të dhënat e Entit Kombëtar të Statistikave, ONS.

Recesion konsiderohet çdo rënie e lehtë e prodhimit të brendshëm bruto për dy ose më shumë tremujor me rradhë. PBB në Britani, nga tetori në dhjetor është ulur për 0.3 për qind, tregojnë të dhënat e ONS ndërsa rritja ekonomike negative është shënuar edhe në periudhën e kaluar nga korriku në shtator me 0.1 për qind.

Të dhënat e ONS janë vetëm vlerësim dhe subjekt i rishikimit. Deri sa recesionet e kaluara, si ajo gjatë krizës globale financiare në vitin 2008 dhe 2009, ishin afatgjate, kjo vlerësohet se do të jetë e lehtë dhe afatshkurtër. Sidoqoftë, ky nuk është lajm i mirë për Kryeministrin Rishi Sunak dhe qeverinë e tij, që rritja ekonomike ishte njëra ndër premtimet kryesore, raporton Sky News.

Inflacioni i lartë dhe faturat gjithnjë e më të mëdha kanë ulur fuqinë blerëse të Britanikëve. Gjithësesi, situatën e ka zbrapsur edhe moti me stuhi, arsye kjo që edhe prodhimi ishte i kufizuar, e blerësit ngelën nëpër shtëpitë e tyre. Reshjet në tre muajt e vitit 2023 ishin shumë lartë mbi nivelet mesatare, që ka ndikuar dhe në shumë sektor ekonomik, duke përfshirë ndërtimin dhe tregtinë me pakicë. 

“Inflacioni i madh është pengesa më e madhe individuale e rritjes ekonomike, për këtë arsye ulja e saj është bërë prioriteti ynë kryesor. Deri sa normat e interesit janë të larta, nuk është çudi dhe rritja e ulët ekonomike,” thotë kancelari Jeremy Hunt duke shtuar se ekspertët janë dakord që në vitet e ardhshme do shënohet rritja ekonomike ndërsa përfundon:

“Rrogat po rriten më shpejtë se çmimet, hipotekat po bien, e papunësia vazhdon të jetë e ulët. Edhe pse kohërat vazhdojnë të jenë të vështira për shumë familje, duhet ti përmbahemi planit, të ulim tatimin për punë dhe biznes në mënyrë që të ndërtojmë ekonomi më të fortë.”