Nuk i intereson takimi Gjuriç-Radoiçiç, BE: Jemi në pritje të raportit zyrtar për hetimet në Banjskë!

Takimin e kandidatit për Kryeministër të Serbisë dhe Ambasadorin aktual serb në Amerikë, Marko Gjuriç me kriminelin serb me fletëarrest të lëshuar nga Intepoli, Milan Radoiçiç, Bashkimi Evropian e konsideron takim të përfaqësuesve të administratës serbe që nu ia vlen të komentohet, por për sulmin që vetë Radioçiç e ka pranuar se e ka kryer në Banjskë më 24 shtator, BE thotë se është në pritje të raportit final të hetimeve.

“Nuk na takon neve të komentojmë për secilin takim të përfaqësuesve të administratës serbe. Por kënd e takoni ju, kjo para së gjithash flet për vet juve, veçanërisht nëse është fjala për takim me një të dyshuar për aktivitete kriminale,” tha zëdhënësi i BE, Peter Stano, i paqartë ashtu si edhe në vazhdim:

“Por kur është fjala për sulmin në Banjskë, qëndrimi i Bashkimit Evropian mbetet i njëjtë. Jemi në pritje të raportit zyrtar përfundimtar nga hetimet dhe më pas do të shohim se si do të sigurohet llogaridhënia. Deri më tani, ne nuk kemi parë një raport të tillë, këtu në Bruksel.”

Ndryshe, Përfaqësuesi i Lartëpër Politikë të Jashtme dhe Siguri pranë BE, Josep Borrell, sulmin e 24 shtatorit e ka cilësuar terrorist. Megjithatë, Bashkimi Evropian nuk ka ndërmarrë asnjë veprim drejt vendosjes eventuale të masave për shkak të Banjskës, duke u thirrur në domosdoshmërinë e përfundimit të hetimeve zyrtare, të cilat duhet t’i zhvillojnë autoritetet e Kosovës.

Ndonëse anashkalojnë të vënë gishtin tek përgjegjësit kryesorë të këtijë sulmi, zyrtarët e Bashkimit Evropian vazhdojnë të insistojnë se kryerësit e veprës duhet të përgjigjen penalisht. Brukseli vazhdon të mbrojë qëndrimin se është i gatshëm të ndërmarrë masa kur të verifikohet përgjegjësia për këtë sulm.

Dhe për ta larë veten karshi qytetarëve të Kosovës që i ka ndëshkuar, BE vazhdimisht i bënë ftesë Serbisë që të bashkëpunojë në hetime dhe të sigurojë që fajtorët të sillen para drejtësisë.