Protestë/ Korrupsioni në Bashkinë Tiranë, qytetarët kërkojnë dorëheqjen e Erion Veliajt

Skandali “5D” identifikoi drejtorët e Bashkisë Tiranë që u arrestuan nga SPAK, por, dhe avoketërit e tyre më të devotshëm, Kryetarin Erion Veliaj, Kryeministrin Edi Rama dhe Policinë e Shtetit. Kjo bëri që qytetarët e Tiranën të mbledhen sot për të protestuar para bashkisë me kërkesën kryesore për dorëheqjen e Erion Veliajt.

“Qytetarë çlironi bashkinë, bashkia është e juaja, merrni në dorë fatin tuaj…” ishin thirrjet e qytetarëve para Bashkisë Tiranë, që u përballën me Policinë e Shtetit e cila ndryshe nga qytetarët kishte tjetër mision, shuarjen e protestës me mbrojtjen e hajdutëve.

Edhe pse Këshilltarët Bashkiak të opozitës kërkuan edhe sot mbledhje urgjente, Erion Veliaj i refuzoi ndërsa Policia e Shtetit nuk i lejoi as të futen në bashki ndonëse ishin të zgjedhurit zyrtarë të qytetarëve të Tiranës.

Me këtë rast, Këshilltari i Partisë Demokratike, Ilir Alimehmeti, në pamundësi për të komunikuar si i zgjedhuri i qytetarëve të Bashkisë Tiranë me kryetarin e saj para mediave u shpreh:

“Ku shkojnë fondet e Tiranës?! Marrin fondet tonë dhe i përdorin. Këta drejtues nuk janë drejtues administrate thjesht, por janë drejtues politikë, bashkëpunëtorë të ngushtë Erion Veliajt.

Ku shkojnë këto fonde?! Kërkojmë audit të jashtëm për të gjitha fondet që shpenzohen në këtë drejtim në bashkinë e Tiranës për periudhën që nuk është kontrolluar nga KLSH. Kërkesë e thjeshtë, kërkesë e qartë antikorrupsion.”

Ndryshe, arsye e këtij masiviteti në protestë ishte dhe arrestimi i kupolës drejtuese të Bashkisë Tiranë për skandalin “5D”, ku njerëzit më të besuar të Erion Veliajt si drejtorë në bashki, taksat e qytetarëve i përvetësonin për vete përmes tenderave të kompanive që kishin hapur.