Komisioni i Ligjeve, Bardhi: 13 fitues te Shkolla e Magjistraturës, në listën e patronazhistëve të PS
Procedurës problematike në Shkollën e Magjistraturës me shtimin e numrit të fituesve sot ju shtua një problem shumë më serioz. Duke folur në Komisionin për Çështjet Ligjore, Administratën Publike dhe të Drejtat e Njeriut, Kryetari i Grupit Parlamentar të Partisë Demokratike, Gazment Bardhi, tha se verifikimi i emrave fitues kishte rezultuar se 13 prej tyre ishin patronazhistë të Partisë Socialiste.
“Ju keni një problem Majko, që listën e patronazhistëve e keni publike, mjafton të gugëllosh emrat dhe po të deklaroj që një pjesë e tyre, 13 persona janë në listën e patronazhistëve të PS. A mund të jenë me meritë në atë proces? Patjetër që mund të jenë, nuk dua t’i paragjykoj. Fakti që është patronazhist, nuk do të thotë që nuk meriton të ketë karrierë, patjetër që meriton,” tha Gazment Bardhi duke e cilësuar futjen e patronazhistëve në Shkollën e Magjistraturës si ndërhyrje flagrante të politikës në drejtësi. Gjithsesi, ai vazhdoi në parim:
“Nuk dua ta politizoj, por për mua është shumë me interes që konkursi i Shkollës së Magjistraturës praktikisht garanton sistemin për 20 apo 30 vitet në vijim të mos ketë asnjë hije dyshimi. Dhe kam të drejtën si deputet që të kërkojmë në një seancë dëgjimore një drejtues të institucionit shtetëror, në rastin konkret drejtorin e Shkollës së Magjistraturës, për të na informuar për aq sa e lejon ligji.
Nuk po bëj përgjegjës askënd, por kemi të drejtë të informohemi se çfarë ka ndodhur me konkursin e Magjistraturës. 13 persona janë në listë ne patronazhistëve të PS,” u shpreh Kryetari i Grupit Parlamentar të Partisë Demokratike, Gazment Bardhi, duke kërkuar që në lidhje me këtë çështje, në Komisionin për Çështjet Ligjore, Administratën Publike dhe të Drejtat e Njeriut, të thirret Drejtori i Shkollës së Magjistraturës, Arben Rakipi, kërkesë e cila u kundërshtua nga deputetët socialistë.
Ndryshe, provimi për në Shkollën e Magjistraturës u anulua dy herë brenda ditës. Përveç parregullsive të shumëta, numri i fituesve u shtua nga 79 në 121, ndërsa në orët e pasdites shkoi në 131 persona.
