Qeveria e re e Serbisë, DASH i zhgënjyer, Vuçiç: Zgjedhje e qytetarëve!

Presidenti i Serbisë, Aleksandar Vuçiç, tha sot se nuk ishte i lumtur me reagimin e Departamentit amerikan të Shtetit lidhur me propozimet që Aleksandar Vulin dhe Nenad Popoviç, që janë nën sanksione nga SHBA, të jenë në Qeverinë e re të Serbisë.

“Shpresoj që do të kemi marrëdhënie të mira me partnerët tanë amerikanë. Është jashtëzakonisht e rëndësishme që të kemi marrëdhënie të mira. Nuk jam i kënaqur me reagimin e tyre, por Qeveria e Serbisë është e zgjedhur nga qytetarët e Serbisë,” tha Vuçiç.

Për sot, 1 maj, është caktuar të mbahet seanca e Parlamentit të Serbisë, ku do të votohet Qeveria e re e Serbisë. Zv/Kryeministër është propozuar Aleksandar Vulin ndërsa ministër Shteti është propozuar Nenad Popoviç.

Në një përgjigje për RFE, Departamenti amerikan i Shtetit deklaroi se SHBA është e zhgënjyer nga propozimi i Vulinit dhe Popoviçit dhe shtoi se të dy mbeten nën sanksione, sepse qëndrimi i Shteteve të Bashkuara ndaj tyre është i njohur mirë.

Ata po ashtu kanë deklaruar se SHBA nuk luan asnjë rol në vendimet e personelit të Qeverisë së Serbisë.

“Kjo do të thotë që kur vendosin sanksione ndaj dikujt, ne duhet të ulim kokën me përulësi dhe të themi, faleminderit që na informuat kush nuk duhet të jetë asgjë,” tha Vuçiç.

Aleksandar Vulin është sanksionuar nga SHBA në korrik të vitit 2023, ndërsa Nenad Popoviç nga nëntori i po këtij viti. Të dy janë në listën e zezë, ndër të tjera, për shkak të lidhjeve të tyre me Kremlinin.

“Dëgjova edhe nga ana tjetër se ne kemi në Qeveri shumë eurofanatikë dhe që janë proamerikanë, por ata të tjerët ishin aq të sjellshëm sa të mos flisnin publikisht për këtë. Është e rëndësishme që Qeveria është serbe dhe që do të zbatojë interesat e Republikës së Serbisë,” shtoi Vuçiç.

Siç njoftoi kryetari i Partisë Përparimtare Serbe, SNS, Milosh Vuçeviç, kabineti i ri do të ketë 25 ministri dhe pesë ministra shteti.

Ish-shefi i diplomacisë, Ivica Daçiç, do të drejtojë Ministrinë e Punëve të Brendshme, ndërsa ministër i Mbrojtjes do të jetë Bratislav Gashiç, ish-ministër i Policisë.

Ish-Ambasadori i Serbisë në Shtetet e Bashkuara dhe Ish-Drejtor i Zyrës për Kosovën, Marko Gjuriç, i bashkohet qeverisë si ministër i Punëve të Jashtme.

Në qeverinë e re do të jenë disa emra të rinj, si zyrtari i lartë i SNS-së, Darko Glishiç, dhe 13 ministra mbeten në krye të ministrive të njëjta si në qeverinë e mëparshme.

Qeveria e re e Serbisë merr detyrën pas zgjedhjeve të dhjetorit, në të cilat ata fituan mbi gjysmën e shumicës në parlamentin republikan.

Koalicionet e opozitës, Serbia kundër dhunës dhe NADA, akuzuan koalicionin e udhëhequr nga Partia Përparimtare Serbe, SNS, për vjedhje zgjedhore.

Parregullsi të shumta gjatë zgjedhjeve të jashtëzakonshme parlamentare, krahinore dhe lokale të mbajtura më 17 dhjetor në Serbi janë vënë në dukje nga misionet vëzhguese ndërkombëtare dhe vendore.

Autoritetet kanë mohuar vazhdimisht se ka pasur parregullsi më të rënda zgjedhore.

Në shkurt, Parlamenti Evropian miratoi një rezolutë që kërkon nga autoritetet në Serbi të lehtësojnë një hetim ndërkombëtar për parregullsitë e supozuara, me thenks të veçantë për zgjedhjet për Këshillin Bashkiak të Beogradit./RFE/