A u dekonspirua “Megaoperacioni”?! Kreu i SPAK: Nuk kam asnjë të dhënë!

Raporti Vjetor i veprimtarisë së Prokurorisë së Posaçme Kundër Korrupsionit dhe Krimit të Organizuar nga Altin Dumani, para Komisionit për Çështjet Ligjore, Administratën Publike dhe të Drejtat e Njeriut, filloi ti ngjante shfaqjes para KLP-së, por, seanca dëgjimore mori kuptimin kur ai filloi ti përgjigjet pyetjeve dhe të gjithë deputetët duke përfshirë dhe opinionin publik mbeti gojëhapur.

Sërish kreu i SPAK, Altin Dumani, sapo hapi gojën tmerroi dynjanë pa e kuptuar se ato që do të nxjerrë nga goja në Komisionin e Ligjeve, në veçanti për “Megaoperacionin” e fundit të cilin Kryeministri Edi Rama me imipiantin e tij propagandistik e shiti si gjë të madhe në të gjitha televizionet kombëtare dhe arriti kulmin në vëmendjen e opinionit publik, do të dëgjohet me shumë interes.

U pagëzua si “Megaoperacion”, SPAK lëshoi 50 urdhër arreste nga të cilët vetëm nëntë u ekzekutuan duke pësuar një zhgënjim tek opinioni publik tek i cili u injektua dhe një “fakt” për të mosu konsideruar paaftësi, dekonspirim, por kështu nuk mendon edhe kreu i Pokurorisë së Posaçme, Altin Dumani:

Nuk kam asnjë të dhënë apo indicie që operacioni është dekonspiruar!

Por të papriturat e Altin Dumanit nuk përfunduan këtu! Para “Ligjeve” ai tha se është më shumë i shqetësuar me ata që e kanë kaluar vettigun dhe vazhdojnë të jenë në sistem.

“Prokurorët e SPAK janë të pavarur dhe ndihen të tillë. Këtë pavarësi ia ka garantuar ky Kuvend me ndryshimet kushtetuese të 2017-ës. Në vlerësimin tim, garanton pavarësinë e prokurorëve. Nuk ka vend dhe nuk është e nevojshme inicimi i këtyre gjerave për garantimin e pavarësisë. A ndihen të influencuar nga lufta politike, mediatike?! Unë e thash dhe qëparë që prokurorët e SPAK kanë dhe duhet t’i bëjnë veshët shurdh ndaj çdo lloj sulmi mediatik apo politik. Sa i takon prokurorëve dhe gjyqtarëve të shkarkuar, e përmenda dhe më parë. Të çosh 4 gjyqtarë për gjykim nuk janë pak. Ne kemi regjistruar, vetëm duke marrë indicie, kemi nuhatur se mund të kemi të bëjmë me raste korruptive.

Unë jam më shumë i shqetësuar me ata që e kanë kaluar vettigun dhe vazhdojnë të jenë në sistem. Mund të jenë ndëshkuar me persona me natyre korruptive. Ky është realisht shqetësimi më i madh. Edhe nga shoqëria civile dhe nga politika, ne mbajmë shënime. Jemi të vëmendshëm. Vjet arrestuam një prokuror në detyrë, proceduam një gjyqtare në detyrë. Ne jemi shumë të vëmendshëm. Koha do e tregojë, do të takohemi pas një viti dhe këtu do të jemi. Jemi të fokusuar. Të jemi dakord se kaluam vettingun dhe nuk do të korruptohen gjyqtarët, kjo është utopi. Ne jemi të vëmendshëm.”

Për deklaratën e tij në KLP lidhur me bashkëpunimin me Policinë e Shtetit, kreu i SPAK tha para Komisionit Ligjeve se fenomeni i bashkëpunimit të policisë me krimin është real, ndërsa e cilësoi ulëritëse faktin që drejtues të kësaj strukture kanë rezultuar se ishin pjesë e këtyre krimeve.

“Do të doja të kishim 200 prokurorë, e them nga ngarkesa e madhe që kemi. Po punojmë bashkërisht që të arsyetojmë kërkesat tona për rritjen e numrit të hetuesve. Lidhur me bashkëpunimin me policinë e shtetit, shqetësimi që kam adresuar sa i takon kësaj strukture, duhet ta them që në krye të herës. Është e rëndësishme që të bëjmë dallimin mes shumicës absolute mes punonjësve të policisë që janë të angazhuar me mish e shpirt me luftën kundër krimit.

Dua të distancoj këtë pjesë, nga një pakicë e inkriminuar.

Siç është paraqitur në raport, bashkëpunime me policinë është në parametra pozitiv. Ky numër u rrit në 63% në 2023. Në shumë nga hetimet tona janë evidentuar lidhje të krimit me funksionarë të policisë. Fenomeni në radhët e agjencive ligjzbatuese është real. Kam pasur në konsideratë në atë deklaratë para KLP, rezultatet nga 2020 deri në 2023 lidhur me subjekte, punonjës të proceduar penalisht. Më rezulton se janë proceduar rreth 70 punonjës nga ne.

Na ka rezultuar se drejtues të lartë të policisë së shtetit, të lidhur me krimin e organizuar. Është ulëritëse kur bëhen pjesë dhe bashkëpunojnë në krime që krimi i organizuar kryen. Shembujt janë publik. Ish-drejtori i Operacionales. Disa drejtor komisariatesh apo shefa krimesh.”

Më fund, për atë që raportonin mediat dhe dje Guvernatori i Bankës së Shqipërërisë, Gent Sejko, dje e mohoi me arrogancë, sot kreu i SPAK, Altin Dumani, tha se bankat dyshohet se janë të përfshira në skemën e pastrimit të parave, përmes bashkëpunimeve të bizneseve me mafian ndërkombëtare ndërsa foli për rast konkret ndryshe nga Sejko.

“Shpresojmë të gjejmë mbështetje nga Kuvendi për shtim të prokurorëve. Nuk dimë çfarë ndodh me ne, s’kemi status pas përfundimit të mandatit. Grupet kriminale janë përfshirë në trafikim të drogave të forta. Grupet kanë aktivitete poli-kriminal, duke përfshirë dhunën për shkak të kontrollit të territorit, komunikimi i koduar, konvertimi i parave në kriptovaluta. Ka shumë grupe kriminale që operojnë përmes call center. Dëmi ndaj viktimave është në mijëra euro. Qytetet më problematike janë Tirana, Elbasani, Durrës, Vlorë, Kurbin, Shkodër, Laç, Fushë Krujë. Në Fushë Krujë ka veprimtari kriminale si vrasja dhe shpërthimet.

Ka prani të pastrimit të parave, që bëhet edhe me ndërtimet. Edhe terrorizmi është ndër aktivitetet kriminale më të rralla. Sa i takon korrupsionit, përdoret procedura që përfitojnë nga fondet publike, që përdorin llogari offshore.

Gjithashtu dyshohet se shuma të konsiderueshme parash depozitohen në llogaritë bankare, në emra shoqërish tregtare, ose të të afërmeve të të dyshuarve. Një nga skemat komplekse të pastrimit të parave në Shqipëri, përfshin përdorimin e bankave në Shqipëri nga bizneset shqiptare si ndërmjetës për organizatat kriminale ndërkombëtare, si mafia italiane.

Në një rast, një biznes shqiptar bashkëpunoi për t’i dhënë akses mafies ndërkombëtare të integronte të ardhurat në sektorin bankar, për shtresëzimin e transfertave që do të transferoheshin përmes këtij biznesi.”

Kreu i SPAK është i pakënaqur me mosreferimin e rasteve në Prokurorinë e Posaçme, por sot u bë e qartë pa dashje se pse u intensifikua edhe lufta kundër trafikut të kokainës, përfaqësues të DEA janë vendosur në SPAK.

“SPAK si ekip ka treguar se ka një përmirësim të punës krahasuar si një vit më parë. Në këto shifra gjendet puna, mundi dhe profesionalizmi i 18 prokurorëve dhe stafit tjetër. E gjithë trupa e SPAK ka hetuar 820 materiale, për të cilat 113 materiale nuk është vendosur nisja e hetimit. Në gjykatë janë dërguar 53 kërkesa për gjykim, 38 kërkesa me natyrë korruptive. Janë sekuestruar pasuri me vlerë 41 milionë euro. Ne jemi prokurorë dhe jo vizitorë, ne mbledhim prova dhe nuk akuzojmë pa to. Shifrat janë kokëforte në lidhje me politikat penale. Masa arrest me burg zë vetëm 49% të totalit për të cilat është kërkuar një masë sigurie. Totali i burgosjes me urdhër të SPAK është 8.5%.

Sa i takon bashkëpunimit me institucionet ndërkombëtare, kemi arritur që të kemi besueshmëri dhe bashkëpunim me institucione partnere. Përfaqësues të DEA janë vendosur në SPAK,” tha Altin Dumani duke mos e fshehur shqetësimin që krimi po sofistikohet, koha e hetimit do të jetë më e gjatë ndërkohë po shkurtohet koha e qëndrimit në detyrë të prokurorit, që sipas mendimit të kreut të SPAK, mandati duhet të zgjatet për t’i shkuar gjykimeve deri në fund.

“Po hyjmë në një fazë të re të sofistikimit të krimit të organizuar. Jemi para botës digjitale e po shkojmë drejt inteligjencës artificiale. Krimi po sofistikohet më shpejt se ne që do të thotë që koha e hetimit do të jetë më e gjatë e ndërkohë shkurtohet koha e qëndrimit në detyrë të prokurorit. Ja pse institucioni nuk është gati të përballojë sfidën e re me rregullat ekzistuese. E përsëris është çështje e sfidave të reja që na presin. Konsiderojeni këtë çështje duke përjashtuar emrin tim nëse kjo ju bën punë, por mbrojeni institucionin.”

Në fund, përkundër optimizmit ai nuk dha shenja optimizmi për qytetarët që kanë humbur besimin tek sistemi elektoral pikërisht për shkak të krimit elektoral ndone tha se ka nisur punën për hetimin e krimeve zgjedhore duke qenë se 2025 do të jetë vit zgjedhor.

“Ne kemi nisur përgatitjet dhe në janar do bëjmë prezent publike strategjinë që do ndërtojmë për veprat penale të vitit 2025. Kemi nisur punën që tani për t’i dalë përpara punës. Është trefishuar numri i krimeve zgjedhore që janë hetuar.”