Masakra e Dubravës, Albin Kurti: Kosova, do të gjejë rrugë për të dëshmuar dhe vënë drejtësi!

Republika e Kosovës do të gjejë rrugë dhe mënyra, për të dëshmuar dhe për të vënë drejtësi për të vërtetën aq të rëndësishme të historisë, të sakrificës dhe të  qëndresës së popullit tonë, tha në 25-vjetorin e Masakrës në burgun e Dubravës, Kryeministri Albin Kurti, pasi nderoi dhe përkujtoi me homazhe të vrarët në mënyrë mizore nga forcat armike serbe.

“Secili prej të burgosurve shqiptarë që ishin në burgun e Dubravës në ato ditë të majit të vitit 1999, është dëshmitar i historisë dhe dëshmitar i së vërtetës së Kosovës dhe emrat e skalitur në memorialin e 116 të vrarëve në këtë masakër,  janë e vërteta dhe akuza më e fuqishme për masakrën e Dubravës,” tha Kryeministri Albin Kurti ndërsa për të zhdukurin në këtë masakër, politikanin dhe ideologun politik të çështjes sonë kombëtare Profesor Ukshin Hoti, ai tha se është e vërteta e shkruar dhe e jetuar e fatit politik të shqiptarëve nën Serbi.

“Është e vërteta e mijëra të zhdukurve me dhunë nga Serbia, prej të cilëve 1597 janë ende të pagjetur. Shteti ynë, Republika e Kosovës, do të gjejë rrugë dhe mënyra, për të dëshmuar sërish e përsëri, sikur sot, sikur vitin e kaluar, sikur që e  kemi bërë gjatë këtyre 25 viteve, për të vënë drejtësi dhe për të vërtetën aq të rëndësishme të historisë, të sakrificës dhe të  qëndresës së popullit tonë.”

Kryeministri i Kosovës përmendi edhe tre gjeneratat që përfshijnë të burgosurit politikë përgjatë tre dekadave, gjatë viteve ’50-të, ’60-të, e të viteve të ’70-të; gjenerata e dytë, e quajtur edhe Brezi ’81, që përfshinë të burgosurit politikë pas demonstratave studentore  të vitit 1981; si dhe gjenerata e tretë e viteve ’90-të, duke përfshirë edhe të burgosurit gjatë luftës.

“Këtu bëj pjesë dhe vetë unë, që bashkë me shumë prej jush që jeni sot këtu dhe me shumë të tjerë, u arrestova, u burgosa dhe u mbajta peng lufte, ndërkohë që edhe u gjykova në Nish në një proces politik nga autoritet e regjimit kriminal të Serbisë”,  shtoi kryeministri.

 Të pranishëm në këto homazhe, organizuar nga Zyra e Kryeministrit të Kosovës, në bashkëpunim me Këshillin organizativ të ish të burgosurve politikë të Burgut të Dubravës, ishin dhe Nënkryetarja e Parlamentit të Kosovës, Saranda Bogujevci, ministrja e Drejtësisë, Albulena Haxhiu, kryetari i Komisionit Qeveritar për personat e zhdukur, Andin Hoti, familjarë të të vrarëve, dëshmorëve dhe të mbijetuarve të masakrës së Dubravës, deputetë të Parlamentit dhe anëtarë të kabinetit qeveritar, .

Ndryshe, nga 19 deri më 24 maj të vitit 1999, forcat  serbe vranë e masakruan 116 të burgosur, një u zhduk ndërsa 185 mbetën të plagosur, nga 980 sa ishin në burgun e Dubravës. Prej tyre 771 i mbijetuan kësaj masakre.