Shtohet numri i viktimave në Greqi/ Dyshohet se mes të humburve janë edhe dy shqiptarë…

Numri i personave që humbën jetën si pasojë e zjarreve që përfshinë zonën e Matit në periferi të Athinës ka arritur në 80, ndërkohë që numri i të plagosurve është 187.

Grupet e shpëtimit dhe ato zjarrfikës vijojnë kontrollet në terren, ndërsa raportohet se mes të zhdukurve mund të jenë edhe dy shqiptarë.

Megjithatë kjo mbetet për t’u konfirmuar nga autoritetet greke, të cilët i janë nënshtruar kërkimeve intensive.

Ndërkohë raportohet se flakët vazhdojnë në dy vatra zjarri, një drejt Agioi Theodoroi dhe tjetri drejt Alepochori. Aktualisht janë 176 zjarrfikës me 74 automjete, 3 automjete ushtarake, aeroplanë, 3 helikopterë dhe 2 avionë.

Në të njëjtën kohë, 196 zjarrfikës me 96 automjete, 12 vullnetarë me 6 automjete, 10 hidrofora, 5 makineri ushtarake dhe 1 helikopter po tentojnë të shuajnë zjarrin në Kalitheinoupoli, Attica.