Hapja e Urës Ibrit në Mitrovicë, Presidentja e Kosovës: Duhet koordinim me aleatët!

Presidentja e Kosovës, Vjosa Osmani, tha se hapja e Urës mbi Ibër duhet të bëhet në koordinim me aleatët në veçanti me Shtetet e Bashkuara duke hartuar një plan të zbatimit të përbashkët.

“SHBA asnjëherë, në takimet që kemi pasur, nuk i kanë shprehur Presidentes qëndrim kundër hapjes së urës, por thjesht kanë kërkuar bashkëpunim në përcaktimin e momentit më të përshtatshëm nga aspekti i sigurisë dhe ndërtim të një plani të përbashkët për zbatimin e hapjes së urës, që është në interes të të gjithë qytetarëve tanë,” tha Vjosa Osmani e bindur se Ura mbi lumin Ibër duhet të hapet duke mos nxit konflikt me aleatët e vendit e as prani të shtuar të misionit të NATO-s në Kosovë, KFOR.

“Ura duhet të hapet patjetër, por ne duhet të sigurohemi që kur të hapet të jetë e hapur përherë, e jo që kur të hapet të nxitë një prezencë shumë më të madhe të NATO-s në të. Ne nuk kemi arsye të jemi në konflikt me aleatët tanë.”

Sa i për ketë deklaratave të zëdhënësit të BE-së, Peter Stano, Presidentja e Kosovës tha se ato janë raciste, dhe për hapjen e urës nuk pyetet Serbia.

“Deklaratat e zëdhënësit të BE-së janë raciste, as nuk meritojnë më shumë vëmendje. Jam deklaruar në raport me ato deklarata raciste, nuk ka asnjë arsye dhe kundërshtoj në çdo mënyrë diskutimin e çështjes së hapjes së Urës në Bruksel. Nuk kemi çka e pyesim Serbinë, njëjtë sikur zëdhënësi nga Sllovakia që nuk e pyet asnjë shtet fqinj kur e kalon urën e vet. Nuk pyetet Serbia për Urën tonë. Dialog nuk do të duhej të pranonte askush për këtë temë,” tha Presidentja e Kosovës, Vjosa Osmani duke përfunduar:

“Dialog me shpëtimtarët tanë, jo vetëm që është e nevojshme, është në interesin tonë mbi të gjitha. I lus qytetarët tanë në situatën kur në botë aleatët tanë po merren me lloj lloj konfliktesh, dhe po shohim vuajtjet njerëzore të konflikteve, që të punojmë me njerëzit që gjithmonë kanë qenë në krahun tonë.”