Konferenca e dëshirave të Edi Ramës, mbi 10 mln turistë, në 2030 Shqipëria anëtare e BE…

Zyrtarisht u pagëzua Konferenca e Ambasadorëve “Tirana Diplo 2024”, por para ambasadorëve dhe konsujve të përgjithshëm të Shqipërisë, Kryeministri Edi Rama rendi një sërë dëshirash që nuk kishin lidhje as me realitetin shqiptar për të cilin ai tha se ka pësuar transformim rrënjësor, dhe as me “rrugëtimin dhe dinamikat e procesit të integrimit në BE” për të cilat ishte ftuar të ligjëroj mashtruesja e Partisë Socialiste, Zv/Kryeministrja dhe ministrja për Punët e Jashtme dhe Çështjet Evropiane të Sllovenisë, Tanja Fajon!

Shqipëria ka pësuar transformim rrënjësor, kush thotë të kundërtën lufton me faktet, tha Kryeministri Rama dhe deri sa plazhet janë bosh ai thotë se këtë vit e vizituan mbi 10 milionë turistë.

“Janë ndërmarrë hapa dhe veprime për të përmbushur ëndrrën e vjetër kombëtare. Por natyra e procesit e ndërveprimit është shumë dinamike dhe këtu dua të sjell në vëmendje një fakt konkret që lidhet me rolin pro aktiv të Shqipërisë, përmes një diplomacie dinamike, në funksion të vetë ndikimit të BE-së për interesat tona, të para në një kënd më të gjerë,” tha Edi Rama ndërsa foli për integrimin gradual në hapësirën ekonomike dhe tregun e përbashkët europiane.

“Kjo është diçka e re, u krijohet si mundësi vendeve të Rajonit tonë dhe lidhet me rolin tonë pro-aktiv dhe me një qasje të re këmbëngulëse për të bërë më të mirën në funksion të interesave tona.

Plani i ri i rritjes, që është ky instrument, është në dorën tonë dhe sëbashku me partnerët në Bruksel jemi në një proces sistemimi të të gjithë hapave dhe të të gjithë piketave që do të duam të arrijmë përmes këtyre hapave. Në këtë mënyrë do të rrisim masën e integrimit pa u bërë anëtar të Bashkimit Europian.”

E kur jemi te rritja, Kryeministri e quan rritje edhe numrin e turistëve ndonëse janë plazhet bosh.

“Sot Shqipëria është mangnet që tërheq vizitor, vjet arritëm që të kishim 10 milionë turistë dhe shifra e këtij viti mund të jetë edhe më e lartë dhe është një e dhënë që reflektohet në zhvillimin e vendit, në rritjen e ekonomisë dhe pagave në vend. Sot kemi një pagë në sektorinë publik që shkon 900 euro, në sektorin privat sot paga është më e lartë se më parë.

Kemi një rritje të investimeve të huaja dhe kemi një interesim të madhe për Shqipërinë, jo vetëm në askeptin e turizmit, por edhe në sektorët strategjik nga energjia tek telekomunikacioni, ndërtimi e me radhë dhe këto duhet të na thonë që stadi në të cilin gjendemi është i favorshëm për të synuar hapin e madh përfundimtar dhe për ta vendosur flamurin tonë në oborrin e BE në Bruksel.”

Për të gjitha bizneset shqiptare në bregdet dhe operatorët turistik që dështuan keq këtë vit, ky fjalim mund të shkaktoj një irritim të pështirë, por ai nuk përfundoi këtu. Shqipëria në vitin 2030 anëtare e BE mund të jetë ekzagjeruar por kur del nga goja e kryeministrit Edi Rama dhe në krah ka mashtruesen Tanja Fajon që rrëfente për shqiptarët kanbial kur PS ishte në opozitë, edhe mund të kuptohet.

“Trupi ynë diplomatik duhet të ngjitet në një nivel të ri. Kjo është plotësisht e mundur duke shfrytëzuar eksperiencën që ka, shembujt e shkëlqyer që janë përfaqësues të këtij komuniteti, por edhe elementin transformues të Shqipërisë.

Sot Shqipëria është një magnet që tërheq vizitorë nga e gjithë Bota. Vitin e kaluar tërhoqëm 10 mln turistë, këtë vit shifra do të jetë edhe më e lartë, dhe kjo është një e dhënë që shoqërohet me rritjen e ekonomisë, me rritjen e të ardhurave, me rritjen e pagave.

Kemi 10 mijë biznese të reja në Shqipëri referuar shifrave të 6-mujorit, kemi rritje të investimeve të huaja me 15 % vetëm në 3-mujorin e parë të vitit, kemi rritjen e numrit të të punësuarve,.

Stadi në të cilën gjendemi është plotësisht i favorshëm për të hedhur hapin tonë përfundimtar, duke vendosur kështu flamurin tonë kombëtar në oborrin e BE-së në Bruksel,” tha Kryeministri Edi Rama duke folur për promovimin e paqes, stabilitetit dhe Rajonit si një të tërë, pasi ky është dhe interesi ynë.

“Duhet të nxisim çdo energji që e bën Rajonin sa më bashkëpunues, që e bën më të ndjeshëm ndaj së ardhmes dhe sa më pak ndaj të shkuarës. Ne duhet ta lexojmë të shkuarën me sytë e së ardhmes dhe kjo është pika kyçe mbi të cilën ne ngremë marrëdhëniet me vendet e Rajonit.”

Nëse e lexojmë të shkuarën me sytë e të ardhmes së Ministrisë për Evropën dhe Punët e Jashtme si organizatore e Konferencës së Ambasadorëve “Tirana Diplo 2024”, mungon qoftë dhe një fjalë për angazhimin e saj në njohjet e reja të shtetit të Kosovës dhe shtyrjes së proceseve të integrimit euroatlantik.

Nëse e lexojmë të shkuarën me sytë e të ardhmes së Kryetarit të Partisë Socialiste Edi Rama është i pakuptimtë synimi për anëtarësim në BE në vitin 2030, ndërsa sot ka në krah Tanja Fajonin që për të sjell PS-në në pushtet fliste në vitin 2011 në Bruksel për Qeverinë e Shqipërisë me Kryeministër që rrëmbenë dhe i prenë barkun gruas shtatzënë të Kryetarit të Bashkisë Kavajë, Elvis Roshi!

Edi Rama, Lali Eri dhe Tanja Fajon mund ta harrojnë atë që mikja e tyre në Parlamentin Evropian dhe jo vetëm, u angazhua për të promovuar gogolin “Sali Berisha” dhe deri më sot nuk ka kërkuar falje që gënjeu, por jo dhe të gjithë ata që e dëgjuan këtë mashtruese ordinere të së majtës!

“Një lajm i trishtuar na ka shokuar të gjithëve ne në PS. Natën e kaluar, gruaja shtatzënë e kryetarit të sapozgjedhur të Bashkisë së Kavajës, Elvis Roshi, u rrëmbye në një qendër tregtare në Tiranë. Pasi është keqtrajtuar barbarisht nga rrëmbyesit, ajo është dërguar në një vend të panjohur, ku i kanë hequr fëmijën. Në orën 4 të mëngjesit, e mbuluar nga gjaku, znj. Roshi është lënë afër shtëpisë së saj në Kavajë (50 kilometra larg kreqytetit). Nuk ka ende ndonjë njoftim nga policia.

Kavaja ka qenë zona elektorale ku është zgjedhur Berisha deputet për 20 vjet. Socialistët fituan në Kavajë për herë të parë më 8 maj, dhe kjo është konsideruar si fitorja më simbolike e zgjedhjeve. Gjatë fushatës elektorale, z.Roshi dhe shtabi i tij kanë marrë kërcënime për shkak të garimit të tij për postin e kreut të Bashkisë. Kreu i PS, Edi Rama, do të lëshojë një deklaratë shtypi pas një ore…”, thuhej në emailin e 1 Qershorit 2011 të cilin Lali Eri e nisi në e-mailin e gjithë ambasadorëve të huaj të akredituar në Tiranë, që shumë shpejtë u dëgjua përmes Tanja Fajon edhe në Bruksel.

E shkuara na thotë se deklarata e Edi Ramës nuk u bë kurrë sepse brenda 24 orëve ajo që nisi si një rrëmbim, përfundoi, i zbardhur nga Policia e Shtetit si një skenar i sajuar nga vetë gruaja e Elvis Roshit, Griselda Zaimi, ndërsa sytë e të ardhmes na thonë se me një mashtruese si Tanja Fajon që deri më sot as nuk e përgënjeshtroi dhe as nuk ka kërkuar falje për rrëfenjën makabre me Kryeministrin e Shqipërisë josocialistë, anëtarësimi në BE, jo në vitin 2030 por edhe në vitin 2300, është iluzion.