PS-PD bien dakord, Këshilli i Legjislacionit: Mandati i Olta Xhaçkës më 12 shtator në seancë plenare

Më në fund mazhoranca socialiste mori parasysh rekomandimet e opozitës, dhe sot në Këshillin e Legjislacionit vendosi që në seancën plenare të 12 shtatorit të shqyrtohet vendimit i Gjykatës Kushtetuese, për mandatin e deputetes së PS, Olta Xhaçka.

“Kuvendi ka detyrimin që të votojë për dërgimin e këtij mocioni në Gjykatën Kushtetuese, si mënyra e vetme për zbatimin e vendimit të Gjykatës Kushtetuese dhe mënyra e vetme e zgjidhjes së këtij konflikti kompetencash.

Kryetarja e Kuvendit duhet të informojë Kuvendin se duhet të vendosë dërgimin në Gjykatën Kushtetuese të mocionit për papajtueshmërinë e mandatit të deputetes Olta Xhaçka, pa vonesa, për t’i hapur rrugë ushtrimit nga Gjykata të kompetencave të saj kushtetuese,” theksoi Kryetarja e Këshillit, Dhurata Çupi, duke paraqit opinionin e opozitës ndërsa sqaroi detyrimin e Kuvendit që të votojë dërgimin e mocionit për Olta Xhaçkën në Gjykatën Kushtetuese.

Ndryshe, pas diskutimit të çështjes, me konsensus u vendos që opinionet e mazhorancës dhe opozitës të paraqiten në seancën plenare të 12 shtatorit duke dhënë sinjalin se pas më shumë se dy viteve, mandati i Olta Xhaçkës mund të lihet edhe në duart e Gjykatës Kushtetuese.