Takim me Sekretarin e Shtetit Vatikanit, Vuçiç: Vlerësojmë mosnjohjen e Kosovës nga Selia e Shenjtë!
Vlerësojmë qëndrimin parimor të Selisë së Shenjtë për mosnjohjen e shtetit të pavarur të Kosovës, tha Presidenti i Serbisë, Aleksandar Vuçiç, pas takimit me Sekretarin e Shtetit të Vatikanit, kardinalin Pietro Parolin, ku është diskutuar mbi mbajtjen e një dialogu të rregullt politik në të gjitha nivelet si dhe bashkëpunimin e shtetit serb me Kishën Katolike.
“Për Serbinë është e një rëndësie të veçantë çështja e mbrojtjes, respektimit dhe përparimit të të drejtave të popullsisë serbe dhe pjesës tjetër joserbe në Kosovë, si dhe mbrojtja dhe rindërtimi i trashëgimisë kulturore dhe fetare serbe, varrezave ortodokse, si dhe përmendoret e cenuara, në veçanti kishave ortodokse dhe manastiret nën mbrojtjen e UNESCO-s,” tha Aleksandar Vuçiç përmes rrjetit social Instagram duke treguar për atë që u tha në takim me Sekretarin e Shtetit të Vatikanit ndërsa përfundoi dhe me thelbin, pse e takoi Kardinalin Pietro Parolin dhe pse u shfaq në këtë rrjet social:
“Vlerësojmë lartë qëndrimin parimor të Selisë së Shenjtë për mosnjohjen e shtetit të pavarur të Kosovës dhe mirëkuptimin për qëndrimin e Serbisë, e cila është e bazuar në respektimin e të drejtës ndërkombëtare.”
Ndryshe, Sekretari i Shtetit të Vatikanit, kardinali Pietro Parolin, po qëndron në Beograd me rastin e kremtimit të 100 vjetorit të themelimit të Kryedioqezës së kryeqytetit serb. Ceremonia solemne u mbajtë mbrëmë në Katedralen e Zojës së Madhe, në prani të personaliteteve të hierarkisë së Kishës katolike të Serbisë, duke përfshirë përfaqësues të Kishës Ortodokse Serbe, Kishës Ungjillore dhe Bashkësisë Islame.
