Shuhet Gert Bogdani
Shuhet patrioti i madh shqiptar, Gert Bogdani! Ish-deputeti i PD Gerti Bogdani ndërroi jetë pas një arresti kardiak që pësoi duke konsumuar kafe në ambientet e hotelit Rogner në Tiranë, kur ka shfaqur shqetësime.
“Kam probleme me frymëmarrjen,” iu është drejtuar ai miqve të tij, me të cilët po pinte kafen dhe është laguar për në tualet.
Pasi është vonuar, miqtë e tij të shqetësuar shkuan në tualet dhe kanë hapur derën me forcë. Ata e kanë gjetur ish-deputetin e PD-së të shtrirë përtokë dhe i kanë dhënë ndihmën e parë.
Më pas kanë lajmëruar ambulancë, por, sipas dëshmitarëve ajo është vonuar.
“Më datë 18.09.2024, rreth orës 11:30, në ambientet e një hoteli në bulevardin “Dëshmorët e Kombit”, është gjetur pa ndjenja shtetasi G. B., 45 vjeç. Ky shtetas është transportuar në spital për ndihmë mjekësore, por ka ndërruar jetë. Nga veprimet e kryera paraprakisht dyshohet se vdekja ka ardhur për shkaqe natyrale,” ka bërë të ditur Policia e Shtetit!
Ndërkohë bëhet e ditur se ceremonia e homazheve do të mbahet nesër në sallën e seancave plenare të Parlamentit nga ora 10-12:00 ndërsa varrimi i të ndjerit do të bëhet në orën 12:00.
Ndërsa nga Partia Demokratike bëhet e ditur se në shenjë nderimi të figurës së Ish-Deputetit Gert Bogdani, PD ka shpallur ditë zie 19 shtatorin 2024, dhe, në të gjitha selitë e degëve të Partisë Demokratike flamuri i PD do të ulet në gjysmështizë.
Gerti Bogdani la pas dy vajza të mitura dhe bashkëshorten, aktivisten e njohur Edlira Çepani.
Kush ishte Gert Bogdani!
Gerti Bogdani lindi më 7 korrik 1980 në Tiranë, mbaroi shkollën e mesme “Harry Fultz”, me rezultate të shkëlqyera dhe ‘Medalje Ari’, vijoi studimet e larta në Universitetin Politeknik të New York-ut, ku diplomohet me ‘Nderimet më të Larta’ (Summa Cum Laude), duke u shpallur edhe fitues i Outstanding Graduate Award – ‘Medalje Ari’.
Ai është themelues dhe drejtues i Rrjetit të Studentëve Shqiptarë në Botë.
Karrierën politike e fillon në vitin 2007, kohë kur kandidoi me Partinë Demokratike për Kryetar të Njësisë Bashkiake nr. 10 Tiranë, garë të cilën e fiton.
Gjatë kësaj kohe vazhdon edhe aktivitetin si zëdhënës politik i PD. Në vitin 2009, Gerti Bogdani, kandidon në Zgjedhjet Parlamentare të 28 qershorit 2009, dhe zgjidhet deputeti më i ri në Kuvendin e Shqipërisë. Nga viti 2009 e në vijim, ai vazhdon aktivitetin e tij si Kryetar i Forumit Rinor të Partisë Demokratike.
Në vitin 2011 ai zgjidhet zv/president i “Bashkimit Ndërkombëtar të të Rinjve Demokratë” (International Young Democrat Union – IYDU) e më pas, në janar të vitit 2012, nën/Kryetar. Në shtator 2015 zgjidhet Kryetar i IYDU, ne Kongresin e zhvilluar në Lisbonë të Portugalisë, duke u bërë kështu politikani i parë shqiptar që mban një post kaq të lartë në një organizatë ndërkombëtare.
