Holanda dëshiron të dalë nga sistemi i BE-së për azilin

Koalicioni i djathtë prej katër partish në Hagë ka nisur luftën për një politikë shumë më të rreptë për azilin. Por kërkesa e Holandës e dorëzuar pranë Komisionit Evropian nuk ka shumë shanse për sukses.

Holanda i ka kërkuar Komisionit të BE-së që të tërhiqet nga rregullat e BE-së për azilin. Ministrja për Azilin, Marjolein Faber, e bëri këtë kërkesë përmes rrjetit social X.

“Ne duhet të vendosim përsëri vetë për politikën tonë të azilit,” thekson Faber duke shtuar se qeveria e djathtë dëshiron ta reduktojë në mënyrë drastike hyrjen e azilkërkuesve dhe të emigrantëve të parregullt.

Sipas ministres për Azilin, Marjolein Faber, kjo është e nevojshme për të përmbushur detyrat tona kushtetuese si sigurimi i strehimit, kujdesit shëndetësor dhe arsimit.

“Presion ndaj mënyrës sonë të bashkëjetesës”

Edhe mbreti i Holandës Willem Aleksander shpalli në emër të kabinetit të ri nën kryeministrin Dick Schoof një politikë më të shpejtë dhe më të rreptë azili në vendin e tij.

“Emigracioni po ushtron presion ndaj mënyrës sonë të bashkëjetesës.” tha Mbreti Willem Aleksander gjatë fjalimit tradicional mbretëror, në të cilin ai prezaton përmbledhtazi prioritetet e qeverisë për vitin e ardhshëm.

Megjithatë sipas ekspertëve duket e pamundur që Holanda të ketë sukses me kërkesën e saj drejtuar Brukselit për t’u tërhequr nga rregullat e BE-së për azilin. Për të ashtuquajturin opt-out duhet të bien dakord të 27 shtetet e BE-së, të cilat në vitin 2023 kanë rënë dakord për një reformë të sistemit të azilit në mbarë BE-në, CEAS . Prandaj pritet që Komisioni i BE-së të mbajë qëndrim kritik ndaj planeve të qeverisë holandeze, sepse largimi i një vendi të caktuar nga vendimet e përbashkëta mund ta rrezikojnë stabilitetin e të gjithë Bashkimit Evropian.