40% e të punësuarve në Shqipëri përdorin forcën e krahut

Rreth 40% e shqiptarëve të punësuar pohuan se kanë ngritur ose mbajtur objekte të rënda, ngarkesa ose njerëz, pa ndihmën e një makinerie, në vitin 2023.

Kjo është më shumë se vlerat mesatare në pesë vendet e tjera të Ballkanit Perëndimor, WB5 37 për qind, dhe BE, 34 për qind, evidenton Anketa Europiane për Aftësitë dhe Vendet e Punës që u zhvillua për herë në dytë në Shqipëri në vitin 2023.

Rezultatet treguan se burrat kanë shumë më shumë gjasa të përfshihen në detyra të tilla manuale sesa gratë, 47 për qind kundrejt 27 për qind, si dhe punëtorët më të vjetër nëse krahasohen me ata më të rinjtë, 48 për qind e atyre të moshës 55- 64 vjeç përkundër 28 për qind të atyre të moshës 25- 34.

Përdorimi i forcës fizike në vendin e punës është më së shumti një tipar i të punësuarve me arsim të nivelit të ulët, 54 për qind, dhe të mesëm 46 për qind, ndërkohë që vetëm 15 për qind e atyre me arsim të lartë deklarojnë se e kanë bërë këtë.

Më shumë se gjysma e punëtorëve në profesionet që lidhen me punë manuale dhe elementare, përkatësisht 53 për qind dhe 50 për qind i përgjigjen në mënyrë pozitive kësaj pyetjeje, krahasuar me 30 për qind të atyre në profesione gjysmë të kualifikuara dhe 18 për qind të atyre në profesione të kualifikuara.

Ngritja e objekteve dhe ngarkesave është gjithashtu më e zakonshme tek të anketuarit që punojnë në bujqësi ose industri, 50 për qind, 36 për qind të atyre që punojnë në shërbime dhe 22 për qind e të anketuarve nga sektori publik, arsimi apo shëndetësia.

Tre në dhjetë, 29 për qind, shqiptarë të anketuar raportojnë se punojnë në një mjedis me nxehtësi ose temperatura shumë të ftohta, kimikate ose pjesë të rrezikshme, afërsisht në linjë me mesataret e BE-së, 27 për qind dhe WB5 32 për qind.

Për më tepër, afër gjysma 46 për qind e shqiptarëve thonë se përdorin ose lëvizin duart ose gishtat për të kapur, manipuluar ose montuar saktësisht objektet, përjashtuar miun kompjuterik, shtypjen në tastierë ose shkrimin e dorës, afërsisht në përputhje me mesataren e WB5, 51 për qind, por dukshëm më shumë se në BE-27, 38 për qind.

Një pakicë e shqiptarëve përdorin makineri të kompjuterizuar. Rreth një në pesë, 21 për qind shqiptarë thonë se përdorin makineri të kompjuterizuar, krahasuar me gati katër në dhjetë, 39 për qind në BE, dhe tre në dhjetë, 28 për qind në WB5.

Pak më shumë se një në dhjetë, 12 për qind e të anketuarve në Shqipëri thonë se përdorin pajisje dixhitale të dorës si monitorë ose skanerë që përdoren për kontrollin e stokut dhe përpunimin e porosive, krahasuar me dyfishin e kësaj shifre, 26 për qind nëpër BE-në dhe rreth një në pesë, 17 për qind në WB-5.

Vetëm 1 për qind tregon se punon me robotë ose përdorën printerët 3D, 6 për qind. Një përqindje e ngjashme e të anketuarve, 5 për qind, raportojnë se punojnë me makineri kompjuterike të kontrolluara numerikisht, CNC, për shembull si torno ose frezë, 9 për qind në BE, 5 për qind në WB5, dhe 2 për qind tregojnë se përdorin operatorë logjikë të programueshëm, OLP-t, 8 për qind në BE dhe 3 për qind në WB5./Monitor/