Emigrantët e parë në Shëngjin, shoqërohen nga autoritetet italiane, kontroll…

Anija “Libra” me 16 emigrantët e parë nga Egjipti dhe Bangladeshi është ankoruar në Portin e Shëngjinit mëngjesin e sotëm, të shoqëruar nga autoritetet policore.

Në bordin e anijes u ngjit dhe një ekip shëndetësor dhe më pas një pjesë e tyre zbriti nga anija për të hyrë në qendrën e pritjes ku dhe u akomoduan, dhe do të qëndrojnë përreth 8 orë.

Ndërkohë në pjesën e jashtme të qendrës ishin forcat e policisë shqiptare dhe efektivë të policisë italiane që pritën emigrantët. Qendra e pritjes, por edhe kampi në Gjadër monitorohen me kamera sigurie.

Emigrantë që do kapen në det të hapur dhe vijnë nga vende që konsiderohen të sigurta, do të dërgohen në Shqipëri pa prekur tokën italiane. Pas plotësimit të dokumentacionit për secilin prej tyre dërgohen në kampin e Gjadrit për të pritur më tej përgjigjen për kërkesat e tyre për azil.

Përkundër propagand%s qeveritare të perfeksionimit të kësaj procedure që është parashikuar në marrëveshjen Rama-Meloni, një grup qytetarësh janë mbledhur sot duke protestuar kundër emigrantëve.

Me pankarta në duar, ato u shprehën se këtu merr fund ëndrra europiane, ndërsa shtuan se marrëveshja mes vendit tonë dhe Italisë, cënon të drejtat e njeriut.

“Kërkesa jonë që në fillim që e kemi marrë vesh, ka qenë që marrëveshja të shpallet jo kushtetuese. Gjykata Kushtetuese për fat të keq ka vendosur që marrëveshja nuk është jokushtetuese, në gjykimin tonë kjo marrëveshje cenon të drejtat e njeriut,” theksojnë protestuesit të bindur se kjo praktikë jodemokratike shkel të drejtat e njeriut ndërsa ata do të vazhdojmë të ngrenë narrativën për të treguar që Perëndimi po mbështet liderë autokratikë si Rama dhe Meloni dhe kriza e emigrantëve nuk është një krizë që zgjidhet duke i rënë në qafë disa popujve të tjerë.

Ndryshe, anija patrulluese Libra e marinës italiane u nis drejt Shqipërisë dy ditë më parë për të mbërritur sot me grupin e parë me 16 emigrantë, 10 nga Bangladeshi dhe 6 nga Egjipti në qendrat e ngritura për t’iu nënshtruar procedurave të përshpejtuara kufitare.