Diplomatët britanikë në selinë e PD, shqetësime për përndjekjen politike të opozitës dhe qeveria teknike
Qeveria teknike për garantimin e standardeve minimale për zgjedhjet e vitit 2025, dhe përndjekja politike e eksponentëve të opozitës, ishin çështjet kryesore që u diskutuan në takimin i cili u zhvillua me dyer të mbyllura në selinë e Partisë Demokratike, të diplomates Shakira Birtwhistle, e cila ndjek çështjet politike në Ambasadën Britanike në Tiranë, me Drejtuesen e Departamentit të Marrëdhënieve me Jashtë në PD, Ilda Zhulali dhe Drejtuesin e Këshillit Bashkiak të Tiranës, Ilir Alimehmeti.
“Në takim u diskutua situata politike, ku përfaqësuesit e PD i përcollën qëndrimet mbi domosdoshmërinë për qeveri kujdestare me synim sigurimin e standardeve minimale për zgjedhjet e vitit 2025.
Kjo skemë e përdorur me sukses në Maqedoninë e Veriut mund dhe duhet të zbatohet në Shqipëri, si garanci minimale për zgjedhje garuese,” shprehet Partia Demokratike përmes një njoftimi duke theksuar se kjo përputhet dhe me dy rekomandimet prioritare të OSBE/ODIHR që kërkojnë marrjen e masave për keqpërdorimin e burimeve shtetërore si armë për tjetërsimin e votës dhe shitblerjen masive të votës përmes fondeve publike.
“Përfaqësuesit e PD e informuam diplomaten britanike për sulmin politik të qeverisë ndaj opozitës, përmes burgosjes politike të Kryetarit të opozitës, Sali Berisha, nënkryetarit të Grupit Parlamentar, Ervin Salianji, anëtarit të Këshillit Kombëtar, Jamarbër Malltezi, dhe kërcënimit publik drejtuar kryetarit të Grupit Parlamentar, Gazment Bardhi,” thekson Partia Demokratike për takimin në të cilin u ra dakord për shpeshtim të kontakteve mes Ambasadës Britanike dhe përfaqësuesve të PD.
