Stuhi, reshje shiu dhe përmbytje në Spanjë, 64 të vdekur
Të paktën 64 persona kanë humbur jetën gjatë stuhisë dhe përmbytjeve që përfshinë lindjen e Spanjës, raportuan autoritetet lokale.
Fjala është për përmbytjen më vdekjeprurëse në Spanjë në 30 vitet e fundit, e cila u shkaktua nga reshjet e papara të shiut që përfshinë dje rajonin e Valencias, duke lënë pas rrugë dhe qytete nën ujë.
Raportohet për 62 të vdekur në Valencia, ndërsa autoritetet në rajonin qendror Castilla La Mancha kanë bërë të ditur se gjatë stuhisë dy persona kanë humbur jetën dhe disa janë zhdukur.
Gjatë gjithë natës, ekipet e kërkim-shpëtimit kanë shpëtuar disa njerëz përgjatë kontrollit të zonave të përmbytura, disa prej të cilëve u gjetën nëpër pemë ku kishin hipur për të shpëtuar, ndërsa në qytetin Utiela ku shërbimet emergjente po ndërhyjnë në zonat e përmbytura, dhjetëra persona konsiderohen të zhdukur.
Kryeministri: E gjithë Spanja qanë me ju që kërkoni të dashurit tuaj!
“Për ata që në këtë moment kërkojnë të dashurit e tyre, e gjithë Spanja qanë me ju,” tha kryeministri Pedro Sanchez në fjalën e tij drejtuar kombit.
“Fshatërave dhe qyteteve të shkatërruara në kët tragjedi, u them poashtu: Së bashku do të rindërtojmë rrugët tuaja, sheshet dhe urat tuaja,” tha Sanchez.
Ky është numri më i madh i të vdekurëve nga përmbytjet që nga viti 2021 në Evropë, kur në Gjermani humbën jetën 185 persona. Dhe, kjo është katastrofa më e madhe e përmbytjeve në Spanjë që nga viti 1996, kur 87 persona humbën jetën në Pirenej.
Përveç shkencëtarëve që këto ndryshime ekstreme të motit i lidhin me ndryshime klimatike, meteorologët në Spanjë vlerësojnë se ngrohja e Mesdheut, që rritë avullimin e ujit, ka rolin kryesor tek përmbytjet.
“Ngjarjet e këtij lloji, që përpara ndodhnin njëherë në disa dekada, tani bëhen gjithnjë e më të shpeshta dhe kapaciteti i tyre shkatërrues është më i madh,” tha meteorologu spanjoll, Ernesto Rodriguez Camino.
Ndryshe, Agjencia shtetërore meteorologjike spanjolle, Aemet, ka shpallur alarmin e kuq në qytetin e Valncias, e në nivelin e krahinës paralajmërim operativ emergjent për shkak të përmbytjeve.
Shërbimi për parashikimin e motit në Barcelonë, Servei Meteorològic de Catalunya, gjithashtu ka aktivizuar alarmin e kuq për mot të keq dhe breshër në rajonin e Katalonisë, në verilindje të Spanjës.
