Lufta e Harris përballë llogaridhënies, Sanders: A ka marrë leksion oligarkia që kontrollon demokratët!

Deri sa fituesi i zgjedhjeve presidenciale në Shtetet e Bashkuara, republikani Donald Trump u zotua se do të marrë leksione nga mandati i tij i parë në Shtëpinë e Bardhë dhe do t’i zbatojë ato për të shmangur gabimet që penguan për të qeverisur ashtu siç dëshironte, në kampin demokrat ka filluar llogaridhënia deri dhe te akuzat ndaj oligarkëve që kontrollojonë partinë e cila që katër vite ishte në pushtet.

“Unë nuk kam njohur askënd gjatë mandatit tim të parë. Unë nuk isha një person i Washingtonit. Rrallë kam qenë atje,” tha Donald Trump në një intervistë për Fox News tashmë i bindur.

“Tani i njoh të gjithë. Unë i njoh të mirët, të fortët, të dobëtit, budallenjtë. I njoh të gjithë. Dhe ne do ta bëjmë këtë vend të madh përsëri, ne duhet ta shpëtojmë vendin tonë,” ishte i qartë Donald Trump!

Por, në kampin humbës gjithçka është konfuze, si nga pretendentja për Presidente, Kamala Harris, që nuk bëri dot as edhe një fjalim të denjë të humbjes, qëndrimi i atyre që e financuan deri në 1 miliardë për të fituar, dhe demokratët që sot kërkojnë llogaridhënie dhe liri nga oligarkët që e kanë kapur partinë e tyre.

“Jam shumë krenare për garën tonë dhe si e kemi drejtuar,” tha Kamala Harris e cila më fund vendosi t’i drejtohet demokratëve pas humbjes, pasi strategët e saj e këshilluan të ndryshoj vendimin sepse ishin shumë të zemëruar, por ky fjalim dëshpëroi edhe më shumë sepse ata nuk dëgjuan asgjë më shumë se sa gatishmërinë e saj për luftë, luftë e cila i shkaktoi dhe humbjen e turpshme. 

Në fjalën e saj, humbësja Harris tha se e kishe uruar Donald Trumpin dhe i premtoi tranzicionin e qetë të pushtetit.

“Ne i qëndrojmë parimit të tranzicionit të qetë të pushtetit. Kjo dallon demokracinë nga monarkia dhe tirania,” tha Harris që me artikulimin e saj dëshmoi pse pësoi humbje . 

“Nuk i kemi borxh luajalitetin presidentit dhe partisë, por Kushtetutës amerikane,” tha një ish-prokurore që Presidentin e SHBA nuk e sheh si pjesë të Kushtetuës, dhe, premtoi luftë: 

“E pranoj humbjen, por nuk heqi dorë nga lufta që kam udhëhequr në fushatë. Luftën për liri, drejtësi. Kjo është lufta nga e cila kurrë nuk do të heqi dorë. Nuk do të heq dorë nga ajo që Amerikanët mund të realizojnë aspiratat e tyre, nga Amerika ku gratë kanë zgjidhje, ku shkollat dhe rrugët mbrohen nga dhuna me armë,” tha Harris. 

Por me humbjen e Kamala Harris dhe fjalimin e saj u konfirmua se jo të gjithë demokratët janë bosh si kjo zonjë që për fat të mirë nuk u zgjodh Presidente e SHBA!

Sondazhisti demokrat Paul Maslin beson se Harris nuk mund të kishte arritur një rezultat më të mirë duke pasur parasysh mjedisin dhe rrethanat.

“Ajo bëri një punë shumë të mirë, por nuk mundi ta fitonte këtë garë. Trump dhe linja e tij kryesore e sulmit ndaj gjendjes së vendit, administratës Biden dhe Partisë Demokratike përfunduan të pamposhtur,” tha Maslin për Politico pas humbjes së kandidates demokrate, atë që të gjithë e kuptuan sapo u tërhoq Joe Biden.

Por derisa ndër demokratë gëlon zemërimi, korrespondenti politik i CNN, Alex Thompson raporton se një ish-këshilltar i Joe Biden është i habiitur edhe për një tjetër fakt:

“Si mund të shpenzoni një miliardë dollarë dhe nuk fitoni?” tha Thompson për rrjetin televiziv të mërzitur për humbjen më shumë se vetë Kamala Harris, duke cituar disa anëtarë të rangut të lartë të partisë që sugjeruan që Biden duhej të ishte larguar nga gara më herët.

Njëri prej tyre i tha se partia eci në gjumë drejt katastrofës dhe se “zëvendësimi i hedhësit në radhën e gjashtë nuk ishte i mjaftueshëm, dhe, se Kamala Harris e bëri punën sa më mirë që mundi”.

Ndërkohë që zyrtarja e lartë demokrate Lindy Li mendon se humbja vjen nga zv/presidenti i majtë që zgjodhi Harris, Tim Walz, dhe jo një njeri si guvernatori i Pennsylvanisë, Josh Shapiro, i cili do të arrinte të bind votuesit amerikanë se Harris nuk është “liberalja nga San Francisco”, siç e prezantoi Trump. 

E Harris vulosi paaftësinë e saj edhe në emisionin “The View”, kur u pyet nëse do të bënte diçka ndryshe nga Bideni, e ajo u përgjigj: “Nuk më bie në mend asgjë!” Përgjigje që, sipas tyre, e përdorën republikanët për të ndërlidhur Harrisin me Bidenin jopopullor duke e akuzuar për inflacionin dhe imigrimin. 

E në lumin e akuzave demokrate ndaj Harris nuk mungoi dhe devijimi partiak që i bëri Harris fushatës duke performuar me njerëz super të pasur në tubime. Ish-Këshilltari i Barack Obamës, Van Jones, kritikoi paraqitjet e njerëzve të famshëm në mitingjet demokrate ndërsa këshilltar i lartë i fushatës presidenciale të Sanders në vitin 2020, David Sirota, tregoi dhe një moment shumë të keq që kishte përjetuar në përpjekje pë ta çuar Harris drejt fitores.

“Disa prej nesh kanë kaluar vite duke i paralajmëruar demokratët që ta marrin më seriozisht politikën e klasës punëtore dhe të mos lavdërojnë neokonistët. Ne e bëmë këtë duke shpresuar ta shmangnim atë, dhe megjithatë elitat demokrate dhe ekspertët liberalë na shanë si tradhtarë,” vuri në dukje Sirota.

E vet senatori i pavarur tashmë, Bernie Sanders, ish-kandidat për president i demokratëve, tha se shkaku i dështimit të Partisë Demokratike është që nuk pranoi politika që mund ti ndihmonin Amerikanët e mesëm.

“Nuk duhet të jetë një surprizë e madhe nëse Partia Demokratike që braktisi njerëzit e klasës punëtore zbulon se klasa punëtore i ka braktisur ata. Fillimisht ishte klasa punëtore e bardhë, dhe tani janë edhe punëtorë latinë dhe zezakë. Ndërsa udhëheqja demokrate mbron status quon, populli amerikan është i zemëruar dhe duan ndryshim. Dhe, kanë të drejtë,” tha Sanders, i cili dje u rizgjodh për mandatin e katërt si senator nga Vermonti.

“A do të marrim leksion nga kjo humbje?”

Sanders, i vetëquajtur socialist demokrat, në Senat iu bashkua demokratëve dhe drejtoi fushatën për Kamala Harris edhe pse nuk është dakord me mainstream politikat demokrate, siç janë ato ekonomike dhe shoqërore, të cilat konsideron se duhet të jenë me njdeshmëri shumë më të madhe sociale dhe të drejtuara nga punëtorët, ndërsa kritikoi edhe mbështetjen amerikane ndaj politikës izraelite në Lindjen e Mesme.

Ai u bëri thirrje demokratëve që të marrin leksion nga humbja e Kamala Harris, si dhe nga disfata e demokratëve në Senat, ku Partia Republikane rifitoi kontrollin dhe ka shumë mundësi që e njëjta të ndodhë edhe në Dhomën e ulët.

“Sot, megjithë kundërshtimin e fortë të shumicës së Amerikanëve, ne vazhdojmë të shpenzojmë miliarda për financimin e luftës agresive të qeverisë ekstremiste Netanyahu kundër popullit palestinez, e cila ka çuar në një katastrofë të tmerrshme humanitare, vdekje, kequshqyerje masive dhe uri të mijëra fëmijëve.

A do të nxjerrin ndonjë mësim real nga kjo fushatë katastrofike interesat e mëdha, konsulentët e mirëpaguar dhe oligarkët që kontrollojnë Partinë Demokratike? A do ta kuptojnë ata dhimbjen dhe tjetërsimin politik që po përjetojnë dhjetëra miliona amerikanë? A kanë ata ndonjë ide se si mund të përballemi me oligarkinë gjithnjë e më të fuqishme që ka kaq shumë fuqi ekonomike dhe politike? Me siguri se jo.

Në javët dhe muajt e ardhshëm, ata që në mesin tonë janë të shqetësuar për themelet e demokracisë dhe drejtësinë ekonomike duhet të kenë diskutime politike shumë serioze,” përfundoi Bernie Sanders.

Në fund, ndërsa sondazhistët komunistë si në SHBA ashtu dhe me zell të madh në Shqipëri po mundohen të arsyetojnë humbjen e Kamala Harris, duke sjellë në sy mbështetësve ato pjesë të sondazheve që bëjnë pis fitoren e Donald Trump, harrojnë thënien e famshme të strategut politik të ish-presidentit Bill Clinton, James Carville, i cili në vitin 1992 e shpjegoi se çfarë ishte më e rëndësishme për votuesit në zgjedhjet presidenciale, dhe, këtë, siç rezultoi, kandidati republikan e respektoi me kujdes:

“It’s the economy, stupid” /Lexo shqip: Është ekonomia, budalla!/