Parimet e Rubios dhe shqetësimi “Grenell”!

nga Agim Popoci

Fitorja e thellë e Presidentit Donald Trump në zgjedhjet e SHBA me shumicë republikane në Kongres dhe Senat, pasoi me një shqetësim të radhës në Ballkan, aty ku Perandoria propagandistike Soros po frymon grahmat e saj të fundit: Sekretari i Shtetit!

Duke i servirur ish-të dërguarin e Presidentit të SHBA për Ballkanin, Richard Grenell si njeriun kyç për Sekretar të ri të Shtetit, impianti propagandistik i Sorosit i sjell në kujtesë Ballkanit dekorimin para një viti të këtij njeriu nga Presidenti i Serbisë, Aleksandar Vuçiç, me medaljen e Flamurit serb të shkallës së Parë, ndërsa i shton konotacionin e rrezikut jo vetëm për shqiptarët dhe boshnjakët, por, për gjithë rajonin!

Dhe, kur shfaqet propozimi i radhës që është në tavolinë, Marco Rubio, altoparlantët e Sorosit heshtin jo vetëm pse kemi të bëjmë me një njeri të padekoruar nga Serbia, por, me parime dhe i qartë mbi të këqijat që rrezikuan njerëzimin gjatë shekullit të kaluar dhe forcat e armatosura amerikane që e shpëtuan: nazizmi, komunizmi dhe spastrimi etnik serb.

Aksesi që ka në media Ambasadori Richard Grenell pas konfliktit të fortë që kishte me kancelaren Merkel kur shërbente në Berlin dhe komplotit që thuri për Qeverinë Kurti I, padyshim që e bënë më të njohur për botën ballkanike që bluan çdo thashethem të rrjeteve sociale edhe pa e hedhur në qafë medaljen serbe, por nuk e bënë atë më të rrezikshëm për Kosovën, siç është ngritur një flluskë nga analfabetët funksional në politikën kosovare që vazhdojnë dhe korrin frytet e viteve ’90, pa e kuptuar se nga ju vjen dashuria amerikane për Shtetin e Kosovës!

Kjo kastë marksiste që mendon se Kosova lindi në vitin 1999 dhe populli pa kujtesë shqiptarë, duhet të shfletojnë historinë e shtetndërtimit të Kosovës për të kuptuar se pse ajo në fillim të viteve ‘90-të u vizitua nga 7 senatorë republikanë në krye me legjendën Bob Dole dhe cili mund të jetë ndikimi i Richard Grenell me medalje serbe në qafë!   

Kur ta kuptojnë se çfarë është lobimi dhe pse po investohet Serbia tek republikanët dhe jo tek demokratët që i kishte për zemër historikisht, si partia në pushtet Vetëvendosje ashtu dhe ato të opozitës PDK e LDK, do të qartësohen pse atë që nuk e bënë dot Soros sikur ta pjellë një herë në javë nga një Alex, i kanë dhe i zbatojnë republikanët në Amerikë: Parimet konservatore të politikës së jashtme!

Jo për të kuptuar pse Vuçiçi pasi flet me Presidentin e ri Donald Trump nuk e quan Serbinë por Amerikën e Madhe, dhe, pse ka ndryshuar synimin dhe tani e dëshiron shtetin e denjë serb, por që ta kenë të qartë pse Marco Rubio që beson se bota është një vend më i mirë kur Amerika është e fortë dhe e begatë, pasi e ka studiuar “Plani moral në politikën e jashtme” të senatorëve Jesse Helms dhe Ronald Reagan, nga Platforma republikane e vitit 1976, pritet të ulet në fronin e Sekretarit të Shtetit.

Dhe jo vetëm kaq! Shqiptarët duhet të jenë të qetë jo vetëm pse jetojnë në shtetin që e krijoi po kjo Amerikë, por është ajo që një njeriu si Marco Rubio i jep rastin të bëhet arkitekti kryesor i vizionit të Donald Trump, Amerika e Para.

“Disa sugjerojnë që Amerika duhet të dëgjojë fjalët e famshme të John Quincy Adams dhe të shkojë ‘jo jashtë vendit, në kërkim të përbindëshave për të shkatërruar’. Problemi është nëse Amerika kthehet nga brenda dhe injoron përbindëshat jashtë vendit, ata ka të ngjarë të vijnë këtu,” tha Marco Rubio në fjalën e tij që mbajti para të rinjve në Qendrën Helms ndërsa fliste në vitin 2011 për parimet e politikës së jashtme, kur Richard Grenell nuk dihet se nga bredhte e liderët politik shqiptarë shikonin se çfarë do të zhvatnin edhe në një ditë messhtatori me Kosovën vetëm 3 vjet shtet; Ndërkohë Rubio kishte parasysh vitin 1917 kur U-skafet gjermane siluruan anijet tregtare amerikane, vitin 1941 kur avionët japonezë bombarduan Pearl Harbor, dhe sulmin terrorist më vdekjeprurës në histori të Al Kaedas më 11 shtator 2001 nga një bazë në Hindu Kush.

Dhe, një arsye më shumë, se si të këqijat e kësaj bote mund të luftohen me parimet e Rubios, por, aty nuk ka vend për shqetësimin e pagëzuar “Grenell”!

“Forcat e armatosura amerikane kanë qenë një nga forcat më të mëdha të së mirës në botë gjatë shekullit të kaluar. Ata ndaluan nazizmin dhe komunizmin dhe të këqijat e tjera si spastrimi etnik serb,” ishte i prerë Marco Rubio i cili sapo kishte mbushur tetë muajt e të qenurit senator, por, me gjak republikan e kishte kuptuar pse ideja e vendosjes së moralit në qendër të marrëdhënieve amerikane me kombet e tjera u tall nga disa mendje të sofistikuara si joreale dhe e painformuar, dhe në fund u vendos nga Ronald Reagan në qendër të politikës së tij të jashtme duke sfiduar Perandorinë e Keqe.

“Rrëzoni këtë mur, kërkoi ai – dhe u rrëzua. Ai e fitoi Luftën e Ftohtë jo duke i përkëdhelur diktatorët, por duke u përballur me ta – dhe duke u mbështetur në parimet që na kanë përcaktuar që nga formimi i Republikës sonë të madhe,” tha Marco Rubio të cilin sot duhet ta kuptojnë jo vetëm shqiptarët dhe Ballkani, Ukraina dhe Lindja e Mesme, por edhe vetë Richard Grenell që aq shumë iu gëzua fitores së Donald Trump dhe te republikanët as që e ka mendjen; Republikan lind nuk bëhesh, ndryshe nuk mund ta qëndisësh këtë mesazh si senatori Marco Rubio:  

“Bota kishte nevojë për një Amerikë të fortë në kohën e Trumanit. Dhe nëse ky do të jetë një tjetër shekull amerikan, bota ka nevojë për një Amerikë të fortë tani. Sepse liria nuk mund të mbijetojë pa ne.”