Pilotët e FSK-së nisin fluturimet stërvitore në Bazën Ajrore të Farkës! Alarmohet Beogradi!
Pas përfundimit të fazës teorike, pilotët e Forcës së Sigurisë së Kosovës, FSK, kanë nisur fluturimet stërvitore në Bazën Ajrore të Farkës me helikopterët “Cougar”.
Lajmin e ka bërë të ditur Ministria e Mbrojtjes së Shqipërisë përmes një postimi në rrjetin social Facebook duke theksuar se bashkëpunimi për rritjen e nivelit të kapaciteteve njerëzore me Kosovën është në qendër të vëmendjes së Ministrisë Mbrojtjes.
“Përveç Kolegjit të Mbrojtjes dhe Sigurisë dhe Akademisë së Forcave të Armatosura, dyert ndaj forcave të FSK-së i kanë hapur edhe njësi të tjera të FA-së, pasi në fushën e sigurisë Kosova dhe Shqipëria kanë shumë dimensione bashkëpunimi.
Ditët e fundit, pilotët e FSK-së nisën fluturimet stërvitore në Bazën Ajrore të Farkës me helikopterët “Cougar”, pas përfundimit të fazës teorike,” theksojnë Forcat Ajrore të Shqipërisë në mesazhin e shoqëruar edhe me një video.
Ky lajm ka alarmuar pushtetin në Beograd ndërsa mediat në shërbim të Presidentit të Serbisë, Aleksandar Vuçiç raportojnë:
“Njësitë speciale të Albin Kurtit por stërviten për sulme të reja!”
Ndryshe, pilotët bashkë me teknikët e FSK-së, po asistohen nga instruktorët e Forcave Ajrore të Shqipërisë për ruajtjen e reflekseve të fluturimit, aq i domosdoshëm për ekuipazhet .
