Kryeministri Kurti: Fondi Sovran është jetik për rritjen ekonomike

 Kryeministri Albin Kurti tha sot se Fondi Sovran i Kosovës është jetik për rritjen ekonomike, shtimin e investimeve dhe pasurimin e strukturës të investimeve ndërsa ka uruar që Gjykata Kushtetuese nuk do ta hedhë poshtë ligjin për Fondin Sovran.

Duke e cilësuar bllokim të reformave pozitive dërgimin që opozita po ua bën ligjeve në Gjykatën Kushtetuese dhe vendimet e kësaj Gjykate, Kryeministri Kurti tha në mbledhjen e Qeverisë se ka një vit që Ligji për Fondin Sovran është në sirtar të Gjykatës dhe çdo ditë e humbur është jashtëzakonisht e vlefshme, ndërsa shteti po pengohet në një kohë të ndryshimeve dhe mundësive të mëdha në ekonominë botërore.

“Fondi Sovran është jetik për rritjen ekonomike, shtimin e investimeve dhe pasurimin e strukturës së investimeve. Urojmë që paralajmërimet opozitare që Kushtetuesja do ta hedhë poshtë Ligjin tonë për Fondin Sovran, sipas informacioneve të tyre të brendshme, të mos dalin të sakta. Urojmë që të ndërpritet ky avazi i bllokimit të reformave pozitive e progresiste siç ndodhi me ligjin për byronë, me ligjin për KPK-në, me ligjin për çmimet tavan për produktet bazë ndër të tjera.”

Me këtë rast, Kryeministri i Kosovës kishte fjalë të mira për punën e Institutit për krimet e kryera gjatë luftës ndërsa bëri thirrje për mbështetjen e këtij Instituti, misionin e drejtë të tij, që është thelbësor për të përjetësuar të vërtetën dhe për ta mundësuar e ndihmuar drejtësinë.

“Kujtojmë të gjithë ata që sakrifikuan për lirinë dhe pavarësinë e vendit tonë. Është detyra jonë morale dhe institucionale të sigurojmë që vuajtjet e tyre të mos harrohen kurrë,” tha Kryeministri i Kosovës, Albin Kurti, duke përfunduar:

“Është nderim e drejtësi ndaj atyre që kanë sakrifikuar për lirinë e Kosovës dhe ndaj familjeve që ende bartin dhembjen e të vrave dhe të zhdukurve me dhunë gjatë luftës.”