Sot festohet Dita e Alfabetit të Gjuhës Shqipe
Sot festohet 22 Nëntori, Dita e Alfabetit të Gjuhës Shqipe, i cili u unifikua në Kongresin e Manastirit.
Kongresi i Manastirit u zhvillua mes 14-22 nëntorit të vitit 1908. Në të morën pjesë 50 delegatë nga 26 qytete të ndryshme, klube dhe shoqata. Në këtë Kongres u miratua vendimi që të pranohet alfabeti latin me disa ndryshime të shkronjave duke i adaptuar ato për gjuhën shqipe.
Në Kongresin e Manastirit kanë marrë pjesë intelektualë nga të gjitha trojet shqiptare, pasi qyteti ka qenë qendër e konsujve dhe ishte më i sigurt për mbarëvajtjen e këtij procesi të rëndësishëm kombëtar.
Kryetar i Kongresit u zgjodh Mit’hat Frashëri, kurse nënkryetarë ishin Luigj Gurakuqi dhe Gjergji Qiriazi, ndërsa motra e tij Parashqevi Qiriazi, ishte gruaja e vetme në këtë Kongres.
Sipas numrit dhe rëndësisë së pjesëmarrësve, Kongresi i Manastirit ka qenë ngjarja më e rëndësishme e popullit shqiptar në fillimet e shekullit XX, ku si rezultat i kësaj pune më 28 Nëntor të vitit 1912 u shpall edhe pavarësia e Shqipërisë.
Për qytetarët e Shqipërisë dhe shqiptarët në Maqedoni të Veriut kjo ditë është Ditë feste dhe nuk punohet, ndërsa në Manastir funksionon Muzeu i Alfabetit të Gjuhës Shqipe, në të cilin gjenden rreth 56 fotografi të pjesëmarrësve dhe 230 dokumente në formë digjitale dhe në letër.
Duke uruar ditën e Alfabetit të Gjuhës sonë të mrekullueshme, të gjithë shqiptarëve kudo janë, Kryeministri Edi Rama shprehet:
“Gëzuar ditën e Alfabetit të Gjuhës sonë të mrekullueshme, të gjithë shqiptarëve kudo janë dhe u prehshin në paqe e me lavdi të gjithë luftëtarët e paepur për shpëtimin, mbrojtjen dhe kultivimin e saj, ndër të cilët zotnitë e Alfabetit tonë, 36 anëtarët e Kongresit të Manastirit, shkëlqejnë si yje të pashuajtshëm në Altarin e Kombit,” thekson Edi Rama në urimin e tij përmes rrjetit social Facebook duke e shoqëruar dhe me një video.
Ndryshe, në Ditën Mbarëkombëtare të Alfabetit të Gjuhës Shqipe, gjuhëtarët nga Shqipëria, Kosova e Maqedonia e Veriut, prezantojnë për projektin e shumëpritur “Fjalori i Madh i Gjuhës Shqipe”, në Kuvendin Kombëtar për Gjuhën Shqipe i cili drejtohet nga Akademia e Shkencave të Shqipërisë me mbështetjen financiare të Qeverisë Shqiptare.
