Protesta e Opozitës, Policia nuk kujdeset për rendin por kërcënon: Drejtuesit dhe pjesëmarrësit, përgjegjësi penale!

“Policia është me Ne”, ishte dikur një krenari me të cilin protestuesit e çdo lloj proteste, pavarësisht nëse protestonin kundër pushtetit apo opozitës, Nanos apo Berishës, anëtarësimit në NATO apo mbrojtjen e pallatit të Dash Pezës, hapjen e kutive ose largimin nga pushteti deri bllokimin e Bulevardit me Çadër, ishin të sigurt se Policia e Shtetit ishte me ata që protestonin dhe vetëm sa do të bënin detyrën që i ngarkon Ligji!

Sot, kur Kryeministri Edi Rama i thotë policit ik leje kapelën dhe voto Partinë, edhe komunikatat e Policisë kanë ndryshuar, ato nuk kujdesen për rendin por për rrahjen dhe prangosjen e atyre që organizojnë protestat dhe ata që marrin pjesë.

I tillë është rasti me protestën e sotme, ku Kryefjala e Policisë është përgjegjësia penale me të cilën do të pësojnë si organizatori ashtu dhe pjesëmarrësi, dhe vazhdon të demonstroi forcën se është ajo që jep leje, kur, po me Ligjin që i referohet, leje nuk i kërkon njeri por vetëm sa e njofton.

“Drejtoria Vendore e Policisë Tiranë ka bërë me dije Sekretarin Organizativ të Partisë Demokratike se bllokimi i rrugëve është vepër penale dhe se për veprime në kundërshtim me ligjin, organizatori, drejtuesi i tubimit dhe pjesëmarrësit në tubim, do të mbajnë përgjegjësi administrative dhe penale,” thekson Policia e Shtetit dhe po në këtë paralajmërim thekson se garanton të drejtën për tubim, të drejtat dhe liritë e pjesëmarrësve në tubime, por pa cenuar lëvizjen e lirë të qytetarëve dhe të automjeteve, garantim që shqiptarët nuk e panë në protestën e fundit, ku ishte Policia ajo që krijoi tensione dhe shkaktoi rrëmujë duke prangosur pjesëmarrësit në kohën kur po largoheshin.

Ndryshe, në kërkesën drejtuar Drejtorisë Vendore të Policisë Tiranë, Partia Demokratike e Shqipërisë ka njoftuar për zhvillimin e tubimeve, nga ora 17:00 deri në orën 20:00 të datës 26.11.2024, në këto akse rrugore në Tiranë: Unaza e vogël, rrethrrotullimi i Zogut të Zi, ura afër xhamisë në Rrugën e Elbasanit, sheshi “Wilson” dhe nga pallati me shigjeta drejt Rrugës së Kavajës.

Drejtoria Vendore e Policisë Tiranë

Në Drejtorinë Vendore të Policisë Tiranë, Sekretari Organizativ i subjektit politik “Partia Demokratike e Shqipërisë” ka paraqitur kërkesën për zhvillim të tubimeve, nga ora 17:00 deri në orën 20:00 të datës 26.11.2024, në disa akse rrugore kryesore në Tiranë, konkretisht: Unaza e vogël, rrethrrotullimi i Zogut të Zi, ura afër xhamisë në Rrugën e Elbasanit, sheshi “Wilson” dhe nga pallati me shigjeta drejt Rrugës së Kavajës.

Në zbatim të germës “a” të nenit 6 të ligjit nr. 8773, datë 23.04.2001, “Për Tubimet”, Drejtoria Vendore e Policisë Tiranë i ka kthyer përgjigje subjektit politik se organizimi i tubimeve në disa segmente rrugore në bashkinë Tiranë krijon probleme dhe premisa për cenime të rendit publik dhe sigurisë së shtetasve të tjerë, pengon qarkullimin e automjeteve të emergjencës, cenon të drejtat dhe liritë themelore për lëvizjen e lirë të shtetasve, si dhe pengon lëvizjen e lirë të automjeteve të transportit publik dhe privat.

Gjithashtu, Drejtoria Vendore e Policisë Tiranë ka bërë me dije Sekretarin Organizativ të Partisë Demokratike se bllokimi i rrugëve është vepër penale dhe se për veprime në kundërshtim me ligjin, organizatori, drejtuesi i tubimit dhe pjesëmarrësit në tubim, do të mbajnë përgjegjësi administrative dhe penale, në zbatim të germës a, të nenit 24 të ligjit nr.8773, datë 23.04.2001 “Për Tubimet” dhe nenit 293 të Kodit Penal të Republikës së Shqipërisë.

Policia e Shtetit garanton të drejtën për tubim, të drejtat dhe liritë e pjesëmarrësve në tubime, por pa cenuar lëvizjen e lirë të qytetarëve dhe të automjeteve.

Për të ndihmuar qytetarët që do të qarkullojnë në akset rrugore të mësipërme, Policia e Shtetit ka ndërmarrë masa që në rast bllokimi, të devijojë qarkullimin e automjeteve në rrugë alternative.

Policia e Shtetit apelon dhe një herë për zbatim të ligjit dhe respektim të lëvizjes së lirë të qytetarëve dhe automjeteve, gjatë orarit të tubimeve.