Ambasadori Hovenier vlerësohet me urdhrin “Dr. Ibrahim Rugova”: Privilegj të shërbeja në Kosovë!
Jeff Hovenier për Kosovën ishte më shumë se sa vetëm Ambasador, tha Presidentja Vjosa Osmani, pasi dekoroi Ambasadorin amerikan në Prishtinë me urdhrin “Dr.Ibrahim Rugova”
“Urdhri ‘Dr. Ibrahim Rugova’ për Jeff Hovenier – i cili për Kosovën ishte më shumë se një Ambasador. Ishte me ne kur populli i Kosovës ishte viktimë e krimeve të llahtarshme, ishte me ne kur raportonte për masakrën e Reçakut, ishte me ne kur vendosnim themelet e shtetit tonë të pavarur, e ishte me ne edhe përgjatë viteve të fundit në mbrojtje të pavarësisë, sovranitetit dhe aleancës së pathyeshme me SHBA-të. Faleminderit Ambasador Hovenier,” shprehet Vjosa Osmani duke e falenderuar edhe përmes rrjetit social Facebook, duke e shoqëruar dhe me një video nga ceremonia e nderimit të Ambasadorit amerikan.
Ndërsa Ambasadori Hovenier i cili ka vendosur të largohet nga misioni në Kosovë dhe të pensionohet, tha se ishte privilegj të shërbejë si ambasador në Kosovë.
“Thellësisht i nderuar dhe mirënjohës që mora urdhrin presidencial ‘Dr. Ibrahim Rugova’ nga presidentja Vjosa Osmani mbrëmë. Kjo ka domethënie të madhe për mua pasi përfaqëson punën kolektive dhe përkushtimin e kujtdo që ka qenë pjesë e përpjekjes për të siguruar paqen dhe stabilitetin në Kosovë dhe për të avancuar vizionin tonë të përbashkët për shtet sovran, demokratik e multietnik. Ka qenë privilegj i madh të shërbej si ambasador i SHBA-së këtu në Kosovë,” shprehet Ambasadori Hovenier përmes rrjetit social “X”.
Ndryshe, Urdhri “Dr. Ibrahim Rugova” u jepet personave vepra jetësore e të cilëve cilësohet si kontribut i veçantë për ndërtimin e paqes, zhvillimin e demokracisë dhe kultivimin e humanizmit.
