Trump: Çmenduria transgjinore prioriteti kryesor, do ta ndaloj
Presidenti i zgjedhur i SHBA-së, Donald Trump premtoi se do të ndalojë çmendurinë transgjinore në ditën e parë të presidencës së tij, derisa republikanët, të cilët do të kontrollojnë të dy dhomat e Kongresit dhe Shtëpinë e Bardhë në mandatin e ri, vazhdojnë presionin ndaj të drejtave të LGBTQ.
“Unë do të nënshkruaj urdhra ekzekutivë për t’i dhënë fund gjymtimit gjenital të fëmijëve dhe largimin e personave transgjinorë nga ushtria dhe shkollat tona fillore dhe të mesme,” tha dje presidenti i zgjedhur në një takim me konservatorët e rinj në Phoenix të Arizonas.
⚡️Trump announces plans to meet with Putin "as soon as possible" to end the war.
— NOELREPORTS 🇪🇺 🇺🇦 (@NOELreports) December 22, 2024
"President Putin said he wants to meet with me quickly. We’re waiting for that, but we need to end this war," stated the U.S. President-elect in Phoenix. pic.twitter.com/nPA95LjZ3r
“Politika zyrtare e SHBA-së do të jetë se ekzistojnë dy gjini – mashkull dhe femër”
Donald Trump gjithashtu u zotua se do t’i mbajë burrat jashtë sporteve të grave, duke shtuar se politika zyrtare e qeverisë së Shteteve të Bashkuara do të jetë se ekzistojnë vetëm dy gjini – mashkull dhe femër!
Duke folur në konferencën e AmericaFest në shtetin kufitar që fitoi bindshëm në zgjedhjet presidenciale në nëntor, Trump premtoi gjithashtu masa urgjente kundër “kimit migrator” dhe premtoi se do të përcaktojë kartelet e drogës si organizata të huaja terroriste dhe konfirmoi vendosmërinë e tij për të rivendosur kontrollin amerikan mbi Kanalin e Panamasë.
Çështjet transgjinore kanë tronditur politikën amerikane vitet e fundit, duke pasur parasysh se shtetet e kontrolluara nga demokratët dhe republikanët lëviznin në drejtime të kundërta në politika të tilla si kurimi dhe çfarë librash mbi këtë temë lejohen në bibliotekat publike ose shkollore.
Javën e kaluar, Kongresi Amerikan miratoi një buxhet vjetor të mbrojtjes që bllokoi fondet për financimin e disa kujdeseve të veçantë gjinor për fëmijët transgjinorë të pjesëtarëve të ushtrisë.
Në fjalimin e së dielës, Trump bëri premtime të mëdha për mandatin e dytë dhe foli për një pamje të errët të katër viteve që i paraprinë nën Presidentin Joe Biden dhe Zv/Presidenten Kamala Harris.
“Do t’i jap fund luftës në Ukrainë, do të parandaloj Luftën e Tretë Botërore”
“Më 20 janar, Shtetet e Bashkuara do ta kthejnë faqen përgjithmonë pas katër viteve të gjata e të tmerrshme dështimi, paaftësie, kalbjes kombëtare dhe ne do të përurojmë një epokë të re paqeje, prosperiteti dhe madhështie kombëtare,” tha Trump, duke folur për ditën e inaugurimit të tij.
“Unë do t’i jap fund luftës në Ukrainë. Do të ndaloj kaosin në Lindjen e Mesme dhe do të parandaloj, premtoj, Luftën e Tretë Botërore.”
“Epoka e artë e Amerikës është përpara nesh,” shtoi ai ndonëse ende nuk ka sqaruar publikisht se si planifikon t’i japë fund shpejt luftës në Ukrainë ose të sjellë paqe në Lindjen e Mesme.
Problemi i Kanalit të Panamasë
I prerë dhe me një gjuhë luftarake të cilën e ka përdorur edhe kundër aleatëve amerikanë në të kaluarën, Trump tha se autoritetet panameze nuk na trajtuan me drejtësi në menaxhimin e Kanalit të Panamasë.
Tarifat për përdorimin e kanalit, ndërtimi i të cilit filloi nga Franca dhe përfundoi nga Shtetet e Bashkuara, tha ai, ishin groteske.
Nëse nuk ndiqen parimet e marrëveshjes së viteve 1970 që i dha Panamasë kontrollin e plotë të kanalit, Trump tha:
“Atëherë ne do të kërkojmë që ai ti kthehet Shteteve të Bashkuara në tërësi, shpejt dhe pa diskutim”.
Ndryshe, mijëra anije kalojnë nëpër këtë kanal çdo vit, duke e bërë atë vendimtar si për tregtinë amerikane ashtu dhe atë ndërkombëtare.
