12 vjet dhëndër! I kujt?!
nga Agim Popoci
Në darkën e fundvitit me trupin diplomatik të akredituar në Shqipëri, Edi Rama i dha fund dilemave pse e trajton me kaq egërsi opozitën, por, dhe zbardhi edhe një enigmë po aq të madhe e cila lindi sapo u ul në fronin e Kryeministrit: I kujt është ky dhëndër?!
Këtë tragjikomedi që e shkatërroi popullin shqiptar do ta qëndiste në letër Andon Zako Çajupi siç bëri me “14 vjeç dhëndër” duke ballafaquar ankthin e ekzistencës me afshin e jetës ndonëse sot nuk ka se kush të qesh me dhimbjen që e ka pushtuar tokën shqiptare me dramën e krijimit të familjes, dramë e cila u ngjiz pasi Edi Rama me politikat e tij kriminale vuri në dyshim edhe ekzistencën e popullit shqiptar!
Po, në këtë dramë nuk ka vend as për zakon patriarkal ndonëse edhe në ambientin e sotëm flitet për bukën e gojës, por, asgjë nuk ka të bëjë me bindjen, sepse realja është vetëm një, që nga viti 1944: Heshtë, nëse dëshiron të jetosh!
Që u martua me Lindën, për komunistët kjo nuk është risi dhe nuk u duhet as Tana e as Vangjeli dhe pak rëndësi ka mosha, sepse këtë gjë e bënin që nga lindja e partisë kriminale të Edi Ramës, kur krijonin celula dhe i shtrinin ato në popull me kushërinj, shoqe e shokë, që nga çerdhja e deri te shkolla!
Në rastin e Edi Ramës nuk u përfol ndonjë Tanë, por, ky rol iu dedikua George Sorosit dhe kuratorëve të Kryeministrit të ri të Shqipërisë, që e donin një burrë të përkushtuar për bashkëshorten dhe familjen, që tek rasti i Ramës ishte defiçencë e madhe: As burrë, as bashkëshort, as familjar, madje shquhej për dhunë ndaj gruas edhe në ambiente publike, siç ishte rasti me bashkëjetuesen R.M!
Ndërsa për Vangjelin, shqipet si mjeshtër që janë nuk do ta mundonin as Çajupin, i gjetën vendin dhe e bënë Kryetar të Parlamentit!
Në qendër të kësaj tragjikomedie sikur edhe Çajupi ta vendoste Georgin apo Alexin, pak rëndësi si ka, si strumbullar i të gjitha veprimeve dhe situatave qofshin ato komike ose absurde, por që po i vuan populli shqiptar, nuk ka çajup në botë që do ti binte ndër mend ta trajtonte opozitën siç e trajtoi Kryeministri Edi Rama!
A ka vërtetë njeri që i ka thënë se e ka opozitën e dobët, kjo nuk duhet vënë në dyshim, dhe, ata janë nga soji i batonëve dhe kolëve, me këshillat e të cilëve do të ishte inekzistent dhe kulmi i komizmit të Çajupit, sikur Lindën ta quante herë motër e herë mëmë!
Por, trishtim dhe hidhërim të thellë shkakton fakti, jo se për Edi Ramën është normale situata në të cilën ndodhet Shqipëria, por edhe për Lindën të cilën e ai e konsideron opozitë të ashpër.
“…ndodhi që u bëra Kryeministër me të në krah, që do të thotë, me opozitën më të ashpër. Në shtëpi! Pa britma, pa sharje, pa shpifje, të cilat, në fund të fundit, i përballon lehtë, por me pyetje të vështira e me argumente të forta për t’u rrëzuar dhe, meqë ra fjala, ose natën vonë, ose herët në mëngjes.
Pra, nëse ka një arsye kryesore për fitoret e mia, është se jam jo vetëm i stërvitur mirë, por edhe në mënyrë të pandërprerë me opozitën më të ashpër dhe më të mirëpërgatitur…” sqaroi Kryeministri Edi Rama në darkën e fundvitit me trupin diplomatik të akredituar në Shqipëri!
Në këtë situatë, vështirësi do të kishte edhe vetë Çajupi që ta përshkruante një fitore elektorale të Edi Ramës që miratohet edhe nga opozita e tij e ashpër Linda duke mbyllur sytë para 1 milion shqiptarëve të larguar nga ky regjim, Tiranën e mbytur në gaz lotsjellës kur proteston opozita, të mekur në dru çdo person që proteston kundër kësaj qeverie, të zhdukur nga lista zgjedhore edhe emri i liderit të opozitës me vendim KQZ-je duke emëruar një Nënkryetar Kryetar të PD, të vjedhura të gjitha koncesionet e dhëna miqve të Kryeministrit dhe përgjegjësit të mos përfundojnë para drejtësisë, të arrestuar liderët e opozitës, dhe së fundi, festë për zgjedhjet e blera me paratë e krimit!
Çajupi mund ta pasqyronte këtë dramë si dramën e të gjitha vajzave shqiptare që u bënë viktima të regjimit të mykur komunist vetëm për një vend pune, dhe, sot e ngushëllojnë veten se nuk janë pjesë e Sigurimit të Shtetit por janë thjeshtë patronazhiste; Por, në fund edhe kjo dramë sado e kuruar të ishte që të mos shkaktoj tërbim tek Kryeministri, nga i madhi Andon Zako Çajupi do përfundonte si një dramë e vërtetë familjare, një martesë e paradënuar të dështojë, sepse nuk është rezultat i lidhjes shpirtërore dhe i pjekurisë seksuale, por i interesit të partisë.
E dhëndëri, 12 vjet Kryeministër si Edi Rama, do të ishte e qartë sikur të qëndisej edhe nga njeriu me pikëpamjet demokratike si Çajupi që goditi shtypjen dhe pabarazinë shoqërore, dhe, ngriti lart e me dinjitet jetën e lirë, se vetëm dhëndër i pensionistëve nuk ishte sepse ata sot vuajnë për bukën e gojës edhe kur pushteti i tij i ka ditët e numëruara dhe po i mashtron me bonuse nga më të ndryshmet; Nuk ishte as i punëtorëve sepse ata kanë marrë botën në sy jo për mirëqenie por për bukën e fëmijëve; Nuk mendoi as për mjekët që aq shumë i lavdëroi gjatë pandemisë COVID-19, sepse në pushtet erdhi për “shëndetësi falas” dhe sot nuk ka as Shëndetësi; Ndërsa gjithë ajo shpurë komuniste që zuri vend dhe gumëzhinë në Arsim, sot me nivelin arsimor nuk e mbron dot ashtu siç nuk po e mbron edhe për dramën me të cilën sot po përballen nxënësit, që edhe pse dërgohen në shkollë nga prindërit, merren në arkivol!
Meqë edhe kjo dramë ka një fund sikur të ngjallet dhe ti jap dorën e fundit Andon Zako Çajupi, sot, pas 12 vjetëve në pushtet, po, edhe Edi Rama është dhëndër!
Por, jo dhëndër i Tanës dhe Vangjelit por dhëndër i oligarkëve!
Sheqfet Kastrati, që ka blerë ujin, tokën dhe ajrin shqiptar, sot krenohet sikur ai shpiku oligarkinë. Jo, ai ishte në mesin tonë dhe dhëndëri i partisë nuk e lëvizi dot nga vendi as me opozitë të ashpër! Pasi e dha provimin antishqiptar me sukses në Rrugën e Kombit, iu dhurua Aeroporti I Rinasit dhe futja e duarve në xhepat e shqiptarëve vazhdoi në gjithë Shqipërinë!
Klodian Allajbeu që aq shumë u akuzua me Spitalin e tij Amerikan me pronar Argitën dhe Erdoganin, kishte vlerë deri në momentin kur Edi Rama u ul në fronin e Kryeministrit! Gjithçka u harrua, madje edhe uzurpimi i Spitalit Ushtarak, dhe kur gjithçka zuri vend, Spitali Amerikan filloi të blejë Spitale!
Bashkim Ulaj, të cilin aq shumë e akuzoi partia e Edi Ramës sa u krijua përshtypja se do marrë dhen më 2013, sot vazhdon të jetë në prehrin e Kryeministrit; Madje si rrallë me të tjerët e mund të thuhet se kjo nuk ka ndodhë as me opozitën e ashpër, duke e gostitë në shtëpi nga ora 21:00 deri në 09:00 të mëngjesit! Gjithë kjo dashuri, mos ta gënjen njeri mendja se vjen vetëm nga Autostrada e frikshme për xhepat e shqiptarëve, Thumanë-Kashar!
Askush nuk i besoi Edi Ramës me Alabaarin për investitor të madh që do ndërtonte Portin e ri në Durrës, pasi kishim të bënim me një mashtrues që e filloi projektin “Beogradi në Ujë” dhe i la në ujë për vite të tëra jo duke investuar por duke ndërtuar me paratë e apartamenteve që shiste. Si i shkeli afatet, ja shqiptarët po e shohin në Durrës dhe po e vajtojnë Portin që e humbën ndonëse nuk i pyeti njeri!
Dhe, qershia mbi tortë, dhëndër i Samir Manes dhe pak rëndësi ka se u akuzua si mik i Xenit! Kur u ndërtua mbikalimi për TEG-un e Samir Manes dhe ndryshoi plani i Autostradës Tiranë-Elbasan, shqiptarët menduan se ndodhi hataja! Por, jo, në radhë erdhi Palasa! Çerdhe për oligarkë, por nuk kishin ujë, dhe, ajo Qafa e Llogarasë shumë e bezdisshme për sojin e Samirit!
Uji ishte problem për gjithë Zonën e Parë Operative që është dhe hambari i votave të partisë së Edi Ramës, por, pak rëndësi ka kjo! Samir Mane do ujë, që nuk ka Vlora e Kuçi ky nuk është problem i Samirit me shokë! U tha, u bë, dhe, ujësjellësi nisi udhëtimin mespërmes nër Shqipëri, sikur Drini plak dhe i përrallshëm që po mburon prej Shëndaumi, dhe drejt e në “Green Coast”!
Për Qafën e Llogarasë u kujdes gjithashtu dhëndëri, dhe nusja e partisë u angazhua seriozisht deri në hapjen e tunelit!
Në fund, në këtë vend ku gjithçka shitet por asgjë nuk blihet, sikur të ishte sot Çajupi, nuk do ti shkonte nëpër mend të parodizonte Biblën sepse nuk do ti linte vend Kryeministri Edi Rama, me terroret shtetërore biblike, moral hipokrit dhe shumë shfaqje negative të shoqërisë me klasa që po ndodhin nën këtë regjim, gjithsesi, titullin e poemës nuk do ta ndryshonte: Krejt Hajvan!
