Bruksel, Serbia refuzon takimin e Komisionit të përbashkët për të pagjeturit
Ndonëse ishte planifikuar para dy javësh, sot ka dështuar mbajtja e takimit të Komisionit të Përbashkët për Personat e Zhdukur në Bruksel për shkak të refuzimit të Serbisë për të marrë pjesë në këtë takim.
Kryetari i Komisionit Qeveritar për Persona të Pagjeturit, Andin Hoti, tha se kryenegociatori i Serbisë ishte i pranishëm në Bruksel, pavarësisht që nuk e kishte të qartë se çfarë ka kërkuar aty, pasi që takimi ishte i paraparë vetëm për çështjen e Personave te Zhdukur, dhe formati ishte me zëvendësues te Komisioneve.
“Prania e Petkoviçit në Bruksel është dëshmia më e qartë se pikërisht ai orkestroi dhe garantoi dështimin e takimit të paraparë, duke e kthyer një proces teknik jetik në një mjet të turpshëm të politizimit dhe obstruksionit,” tha Andin Hoti duke shtuar se arsyetimi i Serbisë për mospjesëmarrje në takim përveç se banal është edhe i dëmshëm për procesin e zbardhjes se fatit të personave të zhdukur, dhe nuk ka të bëjë asgjë me temën që sot janë thirrur në Bruksel.
“Kjo demonstron për të satën herë mungesën e gatishmërisë së Serbisë për të bashkëpunuar në këtë çështje të rëndësishme. Kjo tregon edhe njëherë politizimin e tejskajshëm të Serbisë në raport me çështjen e personave të zhdukur,” shprehet Kryetari i Komisionit Qeveritar për Persona të Pagjeturit, Andin Hoti, në reagimin e tij përmes rrjetit social Facebook.
Mediat në Serbi kanë raportuar se kryenegociatori serb, Petar Petkoviç, e ka lëshuar takimin e Komisionit të përbashkët Kosovë-Serbi për të zhdukurit, që ishte paraparë për sot në Bruksel, pasi u informua se ishin mbyllur institucionet e Serbisë në Kosovë.
“Ndërkohë, delegacioni i Kosovës ka mbajtur takime me përfaqësuesit e Bashkimit Evropian dhe ka parashtruar kërkesat tona sipas agjendës së parashikuar, dhe për këtë kemi marrë njoftimin nga z. Lajçak që do të raportohet konstruktiviteti ynë dhe kërkesat tona tek vendet anëtare të BE-së,” tha duke siguruar se do të vazhdojnë të kërkojnë një zgjidhje të drejtë dhe të qëndrueshme për çështjen e Personave të Zhdukur ndërsa shpresojnë në bashkëpunimin e plotë të të gjitha palëve të përfshira.
