Sekuestrohen 10 milionë dollarë në kriptomonedha të vëllezërve Çopja

Prokuroria e Posaçme, SPAK, njoftoi sot se janë sekuestruar të paktën 10 milionë dollarë në kriptomonedha, të cilat i përkisnin dy vëllezërve nga Elbasani Franc dhe Hajdar Çopja, të cilët dyshohet të kenë drejtuar një prej organizatave më të rrezikshme e më të fuqishme në vend.

Sipas njoftimit të Prokurorisë së Posaçme, vendosja nën sekuestër i portofoleve me kriptomonedha u bë e mundur falë “një bashkëpunimi të ngushtë me një kompani globale të njohur në menaxhimin e kriptovalutës ‘stablecoin’ si dhe një exchange të njohur në rang botëror, i cili menaxhon asete të ndryshme kriptovalutash”, si dhe prej koordinimit të veprimeve me Europol-in si dhe autoritetet policore në Belgjikë, Hollandë dhe Spanjë përgjatë periudhës nga 25 nëntori 2024 deri më 15 janar të këtij viti.

Grupi i vëllezërve Çopja u godit në fund të muajit korrik të vitit të kaluar, kur u lëshuan 33 urdhëra arresti. Prej tyre 13 u ekzekutuan në Shqipëri, 2 persona ishin arrestuar më herët jashtë vendit. Pjesa tjetër prej disa kohësh e kishte lënë Shqipërinë.

Hajdar Çopja dyshohet se gjendet në Dubai, ku deri në vitin 2023 kishte qëndruar dhe vëllai i tij Franc, derisa u ekstradua drejt Belgjikës. Të dy dyshohen për një seri vrasjesh, tentativa vrasjeje, pastrim parash si dhe në vjedhjen e 10 milionë eurove në pistën e aeroportit të Rinasit në vitin 2019.

Disa llogari rrjedhëse dhe dhjetëra pasuri të paluajtshme, pjesa dërrmuese nën emra të bashkëpunëtorëve të tyre, u sekuestruan disa muaj më parë. Bëhet fjalë për kompani, vila dhe apartamente në zonat më të shtrenjta të kryeqytetit, si dhe sipërfaqe të mëdha trojesh nga Tirana deri në pjesë të ndryshme të bregdetit të vendit.

Në mes të arrestuarve në korrik të vitit të kaluar ishin dhe pronarët e një pike këmbimi valutor në qendër të Tiranës, Bashkim Lika dhe Maklen Mici, të cilët dyshohen se ofronin shërbime financiare për organizatën e vëllezërve Çopja.

Në atë kohë, Europol do të njoftonte se gjatë operacionit të zhvilluar nga autoritetet shqiptare ishte “arrestuar një figurë e rëndësishme në pastrimin e parave me qendër në Tiranë, i cili i ka ofruar shërbimet e tij grupeve të ndryshme kriminale të nivelit të lartë, të përfshirë në rrafsh ndërkombëtar, në vrasje, korrupsion e trafik droge në shkallë të gjerë”.

Hetimet e mëtejshme bënë të mundur, disa muaj më vonë, realizimin e një operacioni tjetër nga autoritetet e 6 vendeve të ndryshme, falë të cilit u godit një rrjet kriminal që vepronte si një bankë e nëndheshme, për të qarkulluar dhe pastruar të ardhurat nga trafiku i drogës në shkallë të gjerë e nga krime të tjera të rënda.

Në njoftimin e Europol-it për këtë rast theksohej se i arrestuari në Shqipëri “po lehtësonte transferimin e shumave të mëdha parash përmes kriptomonedhave. Kjo mënyrë është përdorur jo vetëm nga bota kriminale shqiptare, por edhe nga organizata të tjera kriminale dhe përbën një qasje të re për pastrimin e parave”./VOA/