S’bëhet stan me Flamingo!
nga Agim Popoci
Pas tre javë kolapsi të jetës politike dhe shoqërore në Tiranë duke kërkuar dorëheqjen e Kryeministrit Edi Rama, ku qytetarët dëgjuan nga Bulevardi Dëshmorët e Kombit çudira nga më të ndryshmet që ka prodhuar politika shqiptare për 80 vjet, dhe, më të zëshmit kundër Qeverisë Rama ishin ata që e sollën Edi Ramën në pushtet, u krijua ideja se vetëm ata që janë të qartë pse janë në protestë si dhe ata demokratë që janë aty dhe po e vetëshkatërrojnë partinë e zemrës së tyre, duke e ditur atë që populli shqiptar e ka thënë me kohë se stan me Lepuj nuk bëhet, nuk e kanë kuptuar se situata është shumë më alarmante në përpjekjen e tyre që stanin ta bëjnë me Flamingo!
Të gjithë pjesëmarrësit u munduan ta bindin opinionin publik dhe ndërkombëtar se në protestë janë shqiptarët më të pa ndrojtur, nuk shpërndahen shpejt dhe do të mbahen në një vathë deri në arritjen e qëllimit, por, pasi protesta e së shtunës që mblodhi numrin më të madh që ka arritur të mbledh një protestë ndonjëherë u shpërnda pa asnjë rezultat, dhe kërkesat e mbrëmjes së të hënës që iu drejtuan Kryeministrit Edi Rama i cili e ka thënë qartë se mund të mbledhen edhe 1 milion njerëz dhe ai dorëheqje nuk jep, tregon se ky stan ka disa probleme shumë më serioze se sa strukturore, me njerëz që të lënë në baltë ose që tremben.
Problemi madhor i kësaj proteste është se në krye të saj zunë vend njerëzit më revolucionarë të këtij kombi, socialistë, marksistë-leninistë, ambientialistë e analistë me gjithë mediat e tyre kriminale, që nuk denjuan fillimisht as të kërkojnë falje pse luftuan për ardhjen në pushtet të Edi Ramës 13 vjet më parë duke përfshirë shumicën prej tyre edhe në betejën elektorale të një viti më parë, dhe pa një të keqe i thonë po këtij populli se sa abuzues me pushtetin që është ky Kryeministër, ndonëse ishte po ky abuzues me pushtetin në krye të Bashkisë Tiranë për tre mandate kur ata filluan betejën për ta ulur në fronin e kreut të Këshillit të Ministrave!
Po këta revolucionarë, po i shesin si vlera të kombit gjithë atë llum që ishte në shërbim të kësaj Qeverie Kriminale si, Ditmir Bushati, Erisa Spiropali, Erion Braçe, e deri te neokatunarja Marjana Koçeku, dhe luftuan për Edi Ramën deri në minutën e fundit për të kanabizuar dhe plaçkitur Shqipërinë, me kokat e të cilëve sot thonë se mund të prodhojnë zgjidhje, duke harruar faktin se ata nuk janë në fronin e qeverisë vetëm pse Kryeministri Rama ose Banda që i mblodhi votat, i flaki në rrugë, dhe jo se ikën për parime ligjore ose qoftëlarg, demokratike!
Revulcionarëve nuk po ju pengon prezenca në protestë e asnjë lideri të partive të vogla që i përdori Edi Rama për shkërmoqjen e Partisë Demokratike dhe korrjen e një fitore të sigurt me këtë metodë kriminale, por vetëm lideri i PD, Sali Berisha, të cilin e duan madje edhe në burg; Nëse kësaj i shtojmë edhe faktin se po këta liderë me shpurën e tyre vetëm ditë më parë para kësaj proteste, kundërshtonin protestat e Saliut me argumentin se Qeveria Rama nuk bie me protesta, e bënë më të pakuptimtë prezencën e tyre në një protestë ku kërkohet pikërisht rënia e kësaj Qeverie dhe krijimi i një Qeveria Teknike, që ishte dhe kërkesa kryesore në protestave të Partisë Demokratike për vite me radhë!
Problem serioz i kësaj proteste është trajtimi i Drejtësisë nga ana e protestuesve ndërsa dëgjohet nga drejtuesit e saj se kanë besim dhe mbështesin SPAK-un dhe në të njëjtën kohë nga goja e tyre del klithja më idiote që mund të prodhoj një tru normal: Rama në burg, Berisha në burg!
Dhe jo vetëm kaq! Kur duan Berishën në burg që nuk e kërkoi as SPAK-u për shkak të moshës, siç e parashikon ligji, shtrohet pyetja pse nuk kërkohet “Balluku në burg” që e kërkon po kjo Prokurori dhe nuk e lejon Edi Rama, apo dhe ata oligarkë që janë nën hetim të Prokurorisë së Posaçme ku përveç pastrimit të parave kanë masakruar edhe bregdetin shqiptar, që e ka shumë merak koka e kësaj Proteste; Pa harruar këtu dhe Aeroportin e Vlorës të cilin nuk e zuri njeri në gojë për asnë çast, por anulimi i këtij koncesioni është kërkuar deri në Bruksel!
Por, problem jo i vogël i kësaj proteste është edhe vetë Partia Demokratike me liderin e saj Sali Berisha! Duke shpërfill gjithë këto probleme madhore, vetë PD dhe lideri i saj Berisha në emër të qëllimit madhor, largimit të Edi Ramës nga pushteti, pa e kuptuar po kontribuon seriozisht në krijimin e një sistemi politik, i cili me konsolidimin e këtij Stani duke spostuar Flamingot nga menaxhimi, pa e paragjykuar përdorimin e kësaj lëvizje me qëllim të shkatërrimit të Partisë Demokratike por jo edhe duke e përjashtuar si mundësi, mund të krijoj një sistem shumë më tragjik se sistemi politik që krijoi ndryshimi kushtetues i vitit 2008, me pushtet komunist dhe opozitë komuniste!
Në fund, për të arritur qëllimin final, para ndryshimeve që detyrimisht duhet të pësoj ky Stan i Flamingove që mjaftueshëm ka prit dorëheqjen e Kryeministrit me një Revolucion Paqësor, drejtuesit e saj duhet të jenë transparent dhe të japin sqarime pse protestuesit nuk morën pjesë në protestën për Mbrojtjen e Familjes të organizuar nga Pastor Akil Pano, kur me nëna shoqëruar me karroca me fëmijë proklamojnë në çdo rast se gjithçka këtu po bëhet për familjen shqiptare; Pse protestuesit u dërguan te Parlamenti me Edi Ramën pasi seanca kishte përfunduar; Pse u shpenzua gjithë ajo energji për organizimin e protestës më të madhe të të gjitha kohërave dhe nuk u mbajt në orën dhe para vendit të mbajtjes së Mbledhjes së Grupit Parlamentar të PS, aty ku Edi Rama u mor vetëm me akuza kundër protestës dhe protestuesve; Dhe, burimet e financimit të kësaj proteste nga zërimi, flamingot-tollumbace, pankartat, pajisjet për vizatim të fëmijëve e deri tek uji që kërkonin protestuesit mbrëmjen e së shtunës, që papritmas “ju ra nga qielli”!
Ndërsa shqiptarët nuk duhet të jenë skeptikë, vetëm pse bëhet fjalë për Stan me Flamingo! Jo, ky Stan nuk është as i tillë, ndryshe nuk do të kishte aq shumë trashëgimtarë të spiunëve të Sigurimit të Shtetit si në lëvizjen që e solli Edi Ramën në pushtet, ashtu dhe në këtë protestë; Sepse, dihet që Flamingot kur ndalojnë së ushqyeri të vegjlit, i braktisin dhe ata mblidhen në grupe të mëdha, të quajtura “shkolla”, dhe vazhdojnë të rriten vetë derisa të fillojnë të fluturojnë.
Por, duhet të jenë të kujdesshëm që kjo protestë të mos dështoj sepse dështimi nuk do ta rikthej situatën te Zvërneci, por do ta mbys edhe atë pak fije shprese që i kishte mbetur shqiptarëve kur panë shpërthimin e protestës; Ndryshe, sikur ky Stan të kishte pak lidhje me Flamingot, sot nuk do të kishte rrezik nga gjunjëzimi, përkatësisht dështimi i kësaj proteste! Flamingot shpesh qëndrojnë në njërën këmbë për të zvogëluar humbjen e nxehtësisë kur fryn era. Ajo që mund të duket si një pozicion i pakëndshëm për njerëzit nuk është aspak për një Flamingo, dhe është një mekanizëm i veçantë i cili parandalon që këmba mbi të cilën qëndron, të gjunjëzohet; Mekanizëm, të cilin për fat të keq nuk e kanë shqiptarët dhe vazhdojnë të gjunjëzohen dhe turpërohen që nga dita që ekzistojnë!
