Studimi: Ndalimi i celularëve në shkolla nuk përmirëson notat apo shëndetin mendor
Kufizimi i përdorimit të celularëve në shkollë nuk përmirëson notat apo shëndetin mendor të të rinjve, ka treguar një studim i kryer në Angli.
Studimi i realizuar nga Universiteti i Birminghamit ka treguar se koha që studentët kalojnë duke fjetur dhe duke ushtruar dhe performanca e tyre akademike nuk ndryshojnë kur krahasohen shkollat që lejojnë celularët me ato që nuk lejojnë.
Është konfirmuar se politikat kufizuese të celularëve nuk e zvogëlojnë kohën totale që kalojnë të rinjtë në telefonat e tyre çdo ditë.
Hulumtimi ka përfshi 1.227 nxënës në 30 shkolla të mesme.
“Nuk ka asnjë provë që politikat kufizuese kanë një efekt pozitiv”
“Nuk ka asnjë provë që politikat kufizuese të celularëve në shkolla, në formën e tyre aktuale, kanë një efekt pozitiv në shëndetin mendor dhe mirëqenien e adoleshentëve ose në rezultatet e lidhura me to,” erdhën në përfundim autorët e studimit.
Megjithatë, koha e zgjatur para ekranit në përgjithësi ndikon në shëndetin mendor të studentëve, sjelljen në klasë, aktivitetin fizik dhe ciklet e gjumit.
Autorja kryesore e studimit, Victoria Goodyear, tha për BBC se ndalimi i celularëve në shkolla nuk është një mënyrë efektive për të luftuar efektet negative të përdorimit të tepërt të celularit.
“Ne sugjerojmë se vetëm këto ndalime nuk janë të mjaftueshme për të luftuar efektet negative,” tha ajo.
“Ne duhet të bëjmë më shumë sesa thjesht të ndalojmë celularët në shkolla”.
Ministrja britanike refuzon thirrjen e konservatorëve për ndalimin e celularëve
Studimi bënë thirrje për një qasje më “holistike” për reduktimin e përdorimit të celularit midis studentëve.
“Kjo qasje nuk përjashton domosdoshmërisht politikat kufizuese për celularët në shkolla,” përfunduan autorët e studimit.
“Por këto politika duhet të lidhen me një qasje më të gjerë holistike ndaj përdorimit të telefonave celularë dhe mediave sociale tek adoleshentët.”
Hulumtimi u publikua pasi ministrja britanike e Arsimit refuzoi thirrjet e konservatorëve për të futur legjislacionin e ri që do të ndalonte celularët në shkolla.
Ministrja Bridget Phillipson tha se ishte dakord që celularët të mos lejoheshin në klasat e shkollës, por shtoi se opozita e ka gabim kur mendon se kjo mund të bëhet vetëm me mjete ligjore.
“Të rinjtë të jenë të sigurt”
“Mësuesit tashmë kanë udhëzime të qarta për menaxhimin efektiv të përdorimit të celularit në një mënyrë që është e përshtatshme për shkollat e tyre,” tha zëdhënësja e qeverisë.
“Fokusi ynë është që të rinjtë të jenë të sigurt ndërsa përfitojnë nga teknologjia më e fundit. Deri në verë, do të vendosen masa të forta mbrojtëse për fëmijët përmes Ligjit për Siguri në Internet në mënyrë që të mbrohen nga përmbajtja e dëmshme në internet dhe për të siguruar të rinjtë që të kenë një përvojë në internet, të përshtatshme me moshën.”
“Duhen më shumë prova të forta për të nxjerrë përfundime të qarta në lidhje me ndikimin e celularëve tek fëmijët, prandaj ne kemi nisur kërkimin tonë, të udhëhequr nga Universiteti i Cambridge, për ndikimin e mediave sociale në mirëqenien e përgjithshme të fëmijëve”.
