Shkëmbime të ashpra Trump-Zelenskyy, VOA: Përfundon para kohe takimi në Shtëpinë e Bardhë

Shkëmbimet e ashpra mes Presidenti Donald Trump dhe Presidentit të Ukrainës Volodymyr Zelenskyy u bënë shkak për anulimin e një konference të përbashkët për shtyp të dy udhëheqësve si dhe tërheqjen e një projekt-marrëveshjeje mbi mineralet, mbi të cilët palët kishin rënë dakord pak ditë më parë.

Presidenti Zelenskiy u largua nga Shtëpia e Bardhë pas debatit të nxehtë, ku Presidenti Trump e akuzoi presidentin ukrainas për mungesë respekti ndaj Shteteve të Bashkuara, ndërsa ky i fundit sfidoi udhëheqësin amerikan për zbutje të qëndrimit ndaj Presidentit rus Putin.

Pas takimit, në një postim në median sociale, Presidenti Trump shkruajti se “kam arritur në përfundimin që Presidenti Zelenskyy nuk është gati për paqe nëse përfshihet Amerika, sepse ai mendon se përfshirja jonë i jep atij një avantazh më të madh në negociata. Unë nuk dua avantazhe, dua paqe. Ai ofendoi Shtetet e Bashkuara në Zyrën Ovale. Ai mund të vijë përsëri kur të jetë gati për paqe”, shkruante Presidenti Trump.

Vizita e zotit Zelenskyy në Washington erdhi mes përpjekjesh për t’i dhënë fund luftës në Ukrainë. Palët pritej të nënshkruanin dhe projekt-marrëveshjen për mineralet e cila do t’i jepte një qasje të gjerë Shteteve të Bashkuara tek pasuritë minerale të Ukrainës.

Por ngjarjet morën një tjetër rrjedhë kur dy presidentët u përplasën në mënyrë të vazhdueshme në komentet e tyre në zyrën ovale ndërsa Presidenti Zelenskyy i kërkoi Presidentit Trump të jetë i kujdesshëm me Rusinë, ndërsa zoti Trump e paralajmëroi atë me tërheqje të mbështetjes amerikane.

Po kështu Presidenti Zelenskyy e sfidoi hapur zotin Trump për zbutje të qëndrimit ndaj Presidentit rus Vladimir Putin.

Ai kundërshtoi argumentet e zotit Trump se qytetet ukrainase janë kthyer në rrënoja nga lufta tre vjeçare. Presidenti Trump theksoi se udhëheqësi rus Putin dëshiron të bëjë një marrëveshje.

Por Presidenti Zelenskyy i tha Presidentit Trump se zotimeve për paqe të Presidentit rus Vladimir Putin nuk mund t’u besohet, duke renditur rastet kur udhëheqësi rus ka dalë nga fjala. Presidenti Trump tha se Presidenti rus Putin nuk i ka shkelur marrëveshjet me të.

“Duhet të jesh më mirënjohës”, “po luan bixhoz me Luftën e Tretë Botërore”, i tha Presidenti amerikan homologut të tij Zelenskyy.

Zoti Trump e kritikoi presidentin ukrainas, pasi Zv/Presidenti JD Vance, njëri prej zërave më skeptikë të administratës ndaj Ukrainës, i tha zotit Zelenskyy se po tregonte mungesë respekti, duke debatuar me presidentin amerikan në Zyrën Ovale para mediave amerikane.

“A ke thënë të paktën një herë ‘faleminderit’?!, e pyeti Zv/Presidenti Vance zotin Zelenskyy, duke e kritikuar se ka filluar një “turne propagande”.

Presidenti Donald Trump i tha Presidentit Zelensky se ose duhej të bënte një marrëveshje, ose Shtetet e Bashkuara nuk do të vazhdonin ta mbështesnin më tej.

Më pas, Presidenti Trump u tha gazetarëve përpara se të largohej nga Shtëpia e Bardhë se bisedimet nuk “funksionuan shumë mirë”.

Presidenti Trump tha se nëse Shtetet e Bashkuara firmosin marrëveshjen minerare, përshtypja e tij është se Presidenti ukrainas Zelenskyy “do të kërkojë të vazhdojë të luftojë dhe të luftojë”.

“Nuk po kërkojmë t’i hyjmë një lufte dhjetëvjeçare dhe të bëjmë lojëra”, tha Presidenti Trump.

Kur u pyet nga një gazetar se çfarë duhet të bëjë presidenti ukrainas për të rifilluar bisedimet, Presidenti Trump u përgjigj: “Ai duhet të thotë ‘Unë dua paqen’.”

Presidenti Zelenskyy i kërkoi homologut amerikan Trump që të “mos bënte kompromise me një vrasës”, duke iu referuar udhëheqësit rus.

Megjithë përfundimin e papritur të takimit, udhëheqësi ukrainas iu drejtua mediave sociale për t’i dhënë një mesazh publikut amerikan dhe drejtuesve të vendit.

“Faleminderit, Amerikë”, shkruajti zoti Zelenskyy në platformën e mediave sociale X. “Faleminderit @Potus, Kongresit, dhe popullit amerikan. Ukrainës i nevojitet paqe e drejtë dhe e qëndrueshme dhe po punojmë pikërisht për këtë”.

Më pas të premten, Presidenti Zelenskyy i tha kanalit televiziv Fox News se ai beson se marrëdhënia mes Ukrainës dhe Shteteve të Bashkuara mund të shpëtohet dhe se nuk dëshiron të humbasë partneritetin e Shteteve të Bashkuara. Ai shtoi megjithatë se dëshiron që Presidenti Trump të jetë “më shumë në anën tonë”.

Kur u pyet nëse duhet t’i kërkojë ndjesë Presidentit Trump, Presidenti Zelenskyy tha se: “Mendoj se duhet të jemi shumë të hapur dhe shumë të sinqertë dhe nuk jam i sigurtë se bëmë ndonjë gjë të keqe”.

Presidenti Zelenskyy, i cili mori armatime me vlerë prej miliarda dollarësh dhe mbështetje morale amerikane nga administrata Biden për luftën kundër Rusisë, po përballet me një qëndrim krejtësisht të ndryshëm nga administrata Trump.

Presidenti amerikan dëshiron përfundimin e shpejtë të luftës trevjeçare, përmirësimin e lidhjeve me Rusinë dhe rikuperimin e parave të shpenzuara për të mbështetur Ukrainën./VOA/