I mirëpres në zyrë, Kurti: Prokuroria po keqpërdor lirinë, për ta luftuar Qeverinë!
Pas vendosjes së gurëthemelit të çerdhes në Gjilan në kohën kur ishte ftuar për intervistim në Prokurorinë Speciale për , Kryeministri i Kosovës, Albin Kurti, tha se ai ka dhënë ofertën që të jap dëshminë në zyrën e Kryeministrit ndërsa ka akuzuar Prokurorinë për luftë ndaj Qeverisë.
“Së pari unë asnjëherë nuk kam thënë se nuk do të jap dëshmi apo se refuzoj të jap dëshmi. Përkundrazi kam thënë se jo vetëm që jam i gatshëm, por edhe i interesuar që të dëshmoj. Në anën tjetër kam shkruar letrën në të cilën kam specifikuar edhe oraret se kur mund të bëhet dëshmia. Unë e mirëpres Prokurorinë e Shtetit në zyrën e Kryeministrit. Ka pasur raste edhe në të kaluarën kur prokurorët, hetuesit kanë ardhur për kryeministra madje jo veç si dëshmitarë por edhe si të pandehur,” tha Albin Kurti duke theksuar se intervistimi do të mund të ndodhte në muajin dhjetor.
“Qysh në muajin dhjetor ka qenë i mundur të bëhet ky intervistim dhe të jepej dëshmia. Nëse prokuroria e ka pasur shumë të rëndësishme dëshminë, ajo do të vinte tek ne. Një prokuror që e ka synim kryesor dëshminë e dëshmitarët, ai nuk humb kohë,” tha Kryeministri i Kosovës, Albin Kurti, duke përfunduar:
“Kurrë Prokuroria e Kosovës s’ka qenë më e lirë për veprim. Fatkeqësisht lirinë po e keqpërdor për ta luftuar Qeverinë, e jo krimin dhe korrupsionin.”
Ndërkohë para Prokurorisë Speciale, ashtu siç kishte parashikuar spektaklin Kryeministri Kurti, ishin tubuar një numër i madh gazetarësh në pritje të paraqitjes së Albin Kurtit në orën 10:00, kur kishte urdhëruar dhe Gjykata Themelore në Prishtinë që Kurtin të japë dëshminë e tij në cilësinë e dëshmitarit në çështjen mbi keqpërdorimet me rezervat e shtetit, pasi Kryeministri nuk është paraqitur në dy ftesa që i kishte bërë Prokuroria në muajt e fundit.
Më pas, Prokuroria Speciale e Republikës së Kosovës ka njoftuar se dëshmitari Albin Kurti nuk është paraqitur për të dhënë dëshminë.
“Dëshmitari A.K. nuk është paraqitur në Prokurorinë Speciale për të dhënë dëshminë e tij edhe përkundër faktit se ka qenë i obliguar me Urdhër të Gjykatës Themelore në Prishtinë që të paraqitet në cilësi të dëshmitarit, për të dhënë dëshminë e tij me datë 04.03.2025 në ora 10:00, në Prokurorinë Speciale të Republikës së Kosovës,” thekson Prokuroria Speciale e Kosovës duke shtuar se edhe në këtë rast penal, sikurse në të gjitha rastet tjera do të veprojë duke respektuar legjislacionin në fuqi.
Ndryshe Kryeministri i Kosovës, Albin Kurti, ministrja e Arsimit, Shkencës, Teknologjisë dhe Inovacionit, Arbërie Nagavci dhe Kryetari i Komunës Gjilan, Alban Hyseni, sot kanë vendosur gurëthemelin e çerdhes së re në Gjilan.
