Beograd, Vuçiç takon djalin e Trumpit
Presidenti i Serbisë, Aleksandar Vuçiç, tha sot se ka zhvilluar një bisedë të përzemërt me Donald Trump Jr. djalin e presidentit amerikan, Donald Trump, lidhur me marrëdhëniet dypalëshe midis Serbisë dhe Shteteve të Bashkuara, dhe për temat aktuale me rëndësi politike dhe ekonomike në botë.
“Theksova rëndësinë e marrëdhënieve ekonomike dhe politike ndërmjet Serbisë dhe Shteteve të Bashkuara dhe theksova rëndësinë e bashkëpunimit strategjik mes dy vendeve dhe projekteve të përbashkëta në vitet e ardhshme. Ky takim simbolizon angazhimin për forcimin e marrëdhënieve dypalëshe dhe punën së bashku për të adresuar sfidat globale,” tha Vuçiç përmes rrjetit social Facebook.
Trump Jr. në shtatorin e vitit 2024 ka diskutuar në Beograd me një grup biznesmenësh nga Serbia për investimet potenciale.
Dhëndri i Trumpit, Jared Kushner, veçse ka nisur të bëjë biznes në Beograd.
Me kompaninë e tij është nënshkruar një kontratë në maj të vitit 2024 për të ndërtuar një kompleks biznesi dhe rezidenciale aty ku ishte Shtabi i Përgjithshëm i Ushtrisë Serbisë, pjesë të të cilit janë shkatërruar si pasojë e ndërhyrjes së NATO-s më 1999.
Përpara takimit, Vuçiç u ka bërë thirrje të gjitha aktorëve politikë në Serbi që të shmangin dhunën.
“Të mos sillen në mënyrë jokushtetuese, të mos pengojnë lëvizjen e njerëzve tjerë, që të mos krijojnë kriza pengjesh duke ia parandaluar dikujt punën dhe jetesën, që të mos sulmojnë policinë, siç e kanë sulmuar para ndërtesës së Radiotelevizionit të Serbisë një natë më parë, të cilët nuk e kanë prekur askënd, dhe që të sillen në mënyrë të civilizuar, në përputhje me ligjet e këtij shteti,” tha Vuçiç.
Nga mbrëmja e së hënës, studentët kanë bllokuar hyrjen e ndërtesës së RTS-së në Beograd. Për pasojë ka pasur përleshje mes forcave policore dhe protesutesve.
Ministri i Brendshëm i Serbisë, Ivica Daçiç tha se policia nuk ka vepruar kundër protestueseve, por që ajo është sulmuar, ndonëse në pamjet që u publikuan në rrjetet sociale shihet qartë se policia i ka sulmuar dhe rrahur studentët dhe qytetarët tjerë.
Një zyrtar policor është plagosur, ndërsa presidenti serb, Aleksandar Vuçiç tha se plaga e tij e rëndë në sy është shkaktuar nga protestuesit, të cilët i ka quajtur “anëtarë të pleniumit bolshevik”.
Megjithatë, pamjet në rrjetet sociale tregojnë se zyrtari policor i plagosur ka qenë me veshje civile në protesta dhe ka mundësi të jetë plagosur nga kolegët e tij në uniformë.
Ndryshe, përmes bllokadave dhe protestave, studentët po kërkojnë që autoritetet të mbahen përgjegjëse për vdekjen e 15 personave, si pasojë e rrëzimit të një strehe betoni në stacionin hekurudhor të Novi Sadit, më 1 nëntor të vitit të kaluar.
Qeveria pretendon se i ka plotësuar kërkesat e studentëve, derisa një grup ekspertësh i formuar nga Senati i Universitetit të Beogradit i ka mohuar këto pretendime përmes një raporti.
Studentë prej shumë qyteteve të Serbisë veçse janë nisur drejt Beogradit, në një protestë të re që është planifikuar për 15 mars./RFE/
