Protestë masive në Ulqin, kundër shitjes dhe privatizimit të bregdetit

Një numër i madh qytetarësh të Ulqinit iu përgjigjën ftesës për pjesëmarrje në protestën kundër “shitjes së Ulqinit”. Protesta është organizuar nga Komuna e Ulqinit, e cila kundërshton vendimin e qeverisë së Malit Zi për dhënien e një pjese të bregdetit për investitorët arabë, duke theksuar se nuk janë përfshirë në procesin e vendimmarrjes dhe konsultimeve.

Sipas marrëveshjes së qeverisë së Malit Zi, një pjesë e bregdetit prej 12 kilometrash plazh do t’u jepet këtyre investitorëve për 99 vjet. Ky vendim ka shkaktuar shqetësim tek qytetarët dhe përfaqësuesit e Komunës.

“Protesta organizohet si reagim ndaj tentativës për dhënien me qira dhe privatizimin e hapësirave publike bregdetare, përfshirë Plazhin e Madh – një pasuri e përbashkët dhe simbol identitar i Ulqinit dhe banorëve të tij,” theksohet në njoftimin e Komunës së Ulqinit.

Komuna bën me dije se në këtë protestë po marrin pjesë përfaqësues të të gjitha partive politike në Kuvendin e Komunës, shoqëria civile nga mbarë trevat, si dhe qytetarë të shumtë, të bashkuar për të mbrojtur pronën publike dhe të ardhmen e qytetit. 

Për shkak të situatës së krijuar, është anuluar festimi zyrtar i Ditës së Ulqinit, ndërsa mbledhja solemne e Kuvendit Komunal u mbajt përpara qytetarëve, në kuadër të protestës.