Kumti për asqerët e Edi Ramës, Berisha: Skavica nuk do ndërtohet kurrë!

Duke ju përgjigjur Edi Ramës për ofendimin publik që i bëri dibranëve, Kryetari i Partisë Demokratike, Sali Berisha, tha se burrat e Dibrës janë si malet e Dibrës, mjerë ai që i sulmon, ndërsa lëshoi kumtin për të gjithë ata që ishin të shqetësuar se do ngelen pa kulm mbi kokë për shkak të ndërtimit të hidrocentralit: Skavica nuk do të ndërtohet kurrë!

Fjalën e tij nga Dibra, Kryetari i Partisë Demokratike e filloi me urimin për Pashkë: Ngjallja është shpresa, është përjetësia e jetës, e vlerave, e njeriut!

Të dashur dhe të nderuar dibrane dhe dibranë, të pranishëm në këtë sallë, qindra të tjerë jashtë kësaj salle dhe të gjithë banorëve fisnikë të këtij qarku, Peshkopisë, Bulqizës, Matit, përshëndetjet e mia më vëllazërore, mirënjohjen time më të pakufishme për këtë pritje të jashtëzakonshme.
Për këtë mesazh triumfi dhe fitoreje që ju u përcillni shqiptareve dhe shqiptarëve në Shqipëri dhe kudo në botë.

Të dashur kandidatë për deputetë të PD dhe Aleancës për Shqipërinë Madhështore për qarkun e Dibrës, bij dhe bija të shquar të këtij qarku, përfaqësues tuaj dinjitozë, krenari e vërtetë kombëtare për Dibrën, Bulqizën, Matin dhe mbarë Shqipërinë.
Sot ky entuziazëm, ky optimizëm i juaji, dhe i gjithë qarkut, është dëshmia më madhore e pranverës dibrane të demokracisë.
E fitores së 11 majit.
Sot ne mblidhemi ndërkohë që vëllezërit dhe motrat tona të krishterë, katolikë dhe ortodoksë, kudo që ndodhen, festojnë nesër ngjalljen e Krishtit, festojnë Pashkën. Le t’u urojmë nga zemra gëzuar festën.
Ngjallja është shpresa, është përjetësia e jetës, e vlerave, e njeriut,” tha Sali Berisha duke vazhduar me qëllimin pse është sot në Dibër, për të paraqitur në emër të koalicionit për Shqipërinë Madhështore, koalicionit më të madh që ka pasur Shqipëria në 32 vite, koalicionit të 25 partive politike, Programin.

“Për të paraqitur projektin tonë për Dibrën Madhështore, për Shqipërinë Madhështore.
Asgjë nuk kemi shpikur ne në projektin e Shqipërisë Madhështore.
Themelet e këtij projekti janë në shpirtin e madh të grave dhe burrave të Dibrës dhe Shqipërisë.
Themelet e këtij projekti janë në trashëgiminë e Dibrës dhe Shqipërisë.
Themelet e këtij projekti janë në trashëgiminë e kësaj treve, që i dha kombit kryeheroin e vet, i dha kombit mbretin që ndërtoi shtetin e parë të shqiptarëve.
I dha kombit qeverinë e parë të Lidhjes së Prizrenit, qeverinë e parë shqiptare.
I dha kombit lavdinë e pamposhtur të burrave dhe grave të tij, maleve dhe kodrave, fushave të tij.
Rroftë Dibra, rroftë Mati, rroftë Bulqiza, rroftë Shqipëria.
Unë kam nder të madh që përfaqësoj sot 25 forca politike dhe u garantoj se vij tek ju me sensin e shërbëtorit tuaj. Vij tek ju me bindje dhe vendosmëri, me misionin për të bërë gjithçka që kjo situatë të përmbyset. Që Dibra, që Shqipëria të shndërrohet në vendin e ëndrrës shqiptare. Që Dibra, që Shqipëria të bëhen të jetueshme dhe të mos braktisen si toka të shkreta.
Miqtë e mi, në këtë moshë, në këto vite, në vjeshtën time të mrekullueshme, nuk më duhet pushteti. Nuk kam ambicie për para, as për luks, por kam një ambicie, por kam një qëllim, por kam një mision, të bëj gjithçka për të ndryshuar jetën tuaj.
Për të përmbushur me nder para jush, për të përmbushur me faqe të bardhë para jush këtë mision, unë kam edhe atë që të tjerët ma sulmojnë. Kam një eksperiencë, e cila më bën mua të mundur të mbaj çdo premtim timin, të realizojmë çdo premtim. Dhe u jap fjalën se ky program do jetë realitet për ju. Po, po!
Nga e nisim ne këtë program? E nisim nga ata të cilët janë më në nevojë. Nga ata të cilët jetojnë duke folur me vete për shkak të skamjes dhe mjerimit. E nisim pra për ta bërë këtë shoqëri më të drejtë, më njerëzore, më humane, më të barabartë.
Ne kemi çdo potencial, por kemi edhe eksperiencën që ta bëjmë këtë me shpejtësi të madhe. Ta bëjmë këtë brenda 100 ditëve. Ata që mund të pyesin, po ç’janë këto çudira, u them nuk ka asnjë çudi. Qeveria e ardhshme, brenda 100 ditëve do u kthejë paratë e vjedhura shqiptarëve.
Miq, filozofia jonë, thelbi i këtij programi, bazohet në parimin e thjeshtë, paratë qytetarëve, paratë qytetarëve, paratë qytetarëve! Po këtu, Sali Berisha nuk ka asnjë shpikje, asnjë zbulim.
Sali Berisha nuk bën gjë tjetër vetëm zbaton atë parim të hekurt që është i detyrueshëm për çdo qytetar të përgjegjshëm.
Miqtë e mi, cilido që mund të dyshojë, të gjejë një mësuese në Dibër apo në Shqipëri që nuk iu mbidyfishua rroga nga viti 2005 deri në vitin 2013. Të gjejë një mjek, një infermiere, një punonjës që nuk iu dyfishua rroga.
Të gjejë një pensionist me pension të ulët që nuk iu dyfishua pensioni.
Të gjejë një pensionist me pension të mesëm që nuk iu rrit pensioni 60 përqind.
Të gjejë një pensionist me pension të lartë që nuk iu rrit pensioni 40 përqind.
Ne bëmë atë që bën një qeveri e përgjegjshme. Duke u kthyer paratë qytetarëve, njerëzit me rrogat më të ulëta dolën si njerëzit më të paguar se të gjithë popujt e Ballkanit, më të paguar se bullgarët dhe rumunët. Këtu e lamë në vitin 2013.
Jo vetëm kaq, por nga viti 2009, madje edhe më parë, por nga viti 2009 gjer në vitin 2013, 180 mijë vëllezër e motra, emigrantë tanë, u kthyen në Shqipëri, nisën investimet, vendosën bizneset,” tha duke u zotuar edhe para dibranëve për dyfishimin e buxhetit të shëndetësisë dhe arsimin, rrogën e mësuesit 1.500 euro, heqjen e tarifave për studimet dhe mesataren.

“Çfarë ndodhi? Miq, do më falni. Për ata që kanë përjetuar diktaturën, u rikujtoj këtu se të gjithë gazetarët që vinin në Shqipëri, e kishin një titull në çdo artikull: Shqipëria, vendi i kohës së ndaluar.
Çfarë ndodhi 12 vite me regjimin e Edi Ramës? Rrogat i ngriu, pensionet pothuajse i ngriu. Kurse çmimet u rritën nga viti në vit. Paratë nuk iu kthyen shqiptarëve.
Dhe ne, dibranët, shqiptarët, që ishim me rroga, pensione më të larta se popujt përreth, arritëm me çmimet më të larta dhe rrogat më të ulëta.
Bashkëmoshatari i pensionistit shqiptar, që merrte në vitin 2013, 143 mijë lekë dhe në Mal të Zi merrte 138 mijë, sot merr në Mal të Zi 450 mijë. Sot merr në Serbi 405 mijë. Sot merr në Maqedoni 319 mijë.
Pse kjo? Sepse u kthejnë paratë qytetarëve.
Po këta çfarë bënë? Këta kur ndanë buxhetin, u lanë thërrime.
Grabitën 90 përqind të investimeve. 12 miliardë kanë investuar në rrugë, të cilat nuk shkojnë më shumë se 2.3 miliardë. Pra kanë vjedhur 80-90 përqind të të gjitha taksave tuaja. Kjo merr fund.
Miqtë e mi, PD do vendosë minimumin jetik 200 euro për çdo shqiptar, për çdo pensionist që ka pensionin nën 200 euro, për çdo të papunë, për çdo njeri në ndihmë ekonomike, për çdo student, për çdo jetim.
PD do vendosë rrogën minimale 500 euro. PD dhe koalicioni i ardhshëm në qeveri zotohet para jush për kartën e konsumatorit, me të cilën rrogëulëtit dhe pensionistët do marrin ushqimet 20 për qind më lirë se të tjerët. Nafta, të cilën Kosova e merr nga Durrësi dhe e shet 40 përqind më lirë, do zbresë në çmimin që e shet Kosova dhe Maqedonia. Fermerët e Dibrës, këta njerëz të mrekullueshëm, do kenë mbështetje të fuqishme, 5 herë më të madhe se sot.
Do kenë atë mbështetje për çdo fidan të mbjellë, për çdo njësi prodhimi, për çdo kokë bagëti. Fermerët do kenë linjat e kreditimit të butë të tyre. Mbrojtjen e prodhimeve të tyre, mbrojtjen sezonale, mbrojtjen nga faktorë natyrore, mbrojtje nga inputet toksike që sillen sot. Dibra dhe shqiptarët jetojnë sot një katastrofë në shërbimin shëndetësor.
Miq, tre ditë më parë, INSTAT informoi se shqiptarët paguajnë në vit 820 milionë euro për kujdesin shëndetësor. Pra, paguajnë për ilaçe dhe kujdesin shëndetësor 410 euro për person. Ky është çmimi më i lartë që paguan një qytetar në Europë dhe në botë. Ndërkohë nga taksat tuaja për shëndetësinë jepen 1 miliard euro.
Pse kjo? Sepse vidhen, vidhen dhe vetëm vidhen. Sot gjendja e spitaleve është katastrofale. U garantoj se ka qenë më mirë në vitin 1986 kur unë kam bërë këtu tre muaj praktikë mjekësore. Po, ka qenë më mirë.
Mjekët i kishit këtu, humanistë të vërtetë ata, ditë e natë punonin për qytetarët e Dibrës. Me aftësi dhe zotësi mbulonin shumë mungesa të tjera. Kurse sot mjekët ikin, infermierët ikin, shëndetësia është shpartalluar. Kjo është, ndaj dhe ne do dyfishojmë buxhetin për shëndetësinë.
Do dyfishojmë buxhetin për arsimin. Mësuesin, këtë misionar të kombit dhe të dijes, do e vendosim përsëri në piedestal. Rroga e mësuesit do jetë jo më pak se 1500 euro. Shkollat do modernizohen.
Tarifat për studimet do hiqen. Mesatarja do hiqet,” tha Berisha duke premtuar për Dibrën, Matin dhe Bulqizën infrastrukturën më moderne ndërsa zotimin solemn se Skavica nuk do ndërtohet kurrë!

“Këto të gjitha i bën qeveria për 100 ditë, por përsëri kjo nuk është Shqipëria Madhështore.
Shqipëria Madhështore është Shqipëria e prodhimit. Shqipëria Madhështore është Shqipëria e shpresës dhe besimit të shqiptarëve, kur nga diaspora të kthehen qindra mijëra prej tyre që u larguan për të ndërtuar ëndrrën në Shqipëri. Ndaj dhe biznesit do t’ia ulim në mënyrë drastike barrën fiskale.
Vetëm me uljen në 10 për qind të tatim fitimit, rrogat e rrogëtarëve mbi rrogën e ulët rriten me 13 përqind, sepse kjo taksë është 23 për qind. TVSH do zbresë në 15 për qind. Energjia për bizneset në 6 lekë, për qytetarët në 7 lekë.
Dibrës i premtoj kompletimin e plotë të infrastrukturës së saj në rrugë, ujësjëllesa, kanalizime. Dibra, Mati dhe Bulqiza do kenë infrastrukturën më moderne.
Skavica nuk do ndërtohet kurrë.
Të dashur miq, ky vit është një vvit vendimtar për t’u ndarënga kjo e keqe e madhe. Diaspora shqiptare është e tëra në këmbë. Ka jo një, por shumë përfaqësues të saj në këtë sallë dhe unë i përshëndes shumë përzemërsisht.
I përshëndes vëllezërit, motrat tona kudo që janë. I ftoj të votojnë me dinjitet, të votojnë në privacinë e tyre, të votojnë si qytetarë dinjitozë për të shpëtuar këtë vend nga narkodiktatura, për të rikthyer në Shqipëri shpresën, besimin, të ardhmen tonë.
Miq, Shqipëria Madhështore është Shqipëria e familjes shqiptare madhështore. Ne jemi dhe do mbetemi për shenjtërinë e familjes. Për ne, familja është djepi i të gjitha vlerave. Ndaj dhe ne kurrë prindërit nuk do mund t’i quajmë me numra, nënë dhe babë do jetë e sanksionuar në të gjitha ligjet tona.”

Në fund, Kryetari i Partisë Demokratike sqaroi Kryeministrin Edi Rama për vlerësimin që ka bërë dibranët, duke theksuar se burrat e Dibrës janë si malet e Dibrës, mjerë ai që i sulmon!

“Dy ditë më parë erdhi këtu edhe ai burreci 2 metra i gjatë. Ai nuk u tha një fjalë se pse Rruga e Kombit zgjati 12 vite në një kohë kur kishte çdo fond dhe projekt për të mbaruar në vitin 2016.
Dhe një gjë do t’i them asaj zonjës së nderuar që i tha se shkojmë në Tiranë, të garantoj dhe të jap fjalën e nderit se po të qe për Edi Ramën, ajo rrugë kurrë nuk do ndërtohej.
Ja ku e keni rrugën e Lurës, Lura është bukuri përrallore dhe ka 12 vjet nuk e ndërton dot rrugën.
Por atë rrugë e meritoni plotësisht. Ajo është rruga e dytë e kombit dhe kemi krenari të madhe që ndërtuam 32 kilometrat e para dhe u garantoj se në vitin 2016 do ishte inauguruar me parametra shumë më të mirë se kjo sot.
Edi Rama nuk u tha ju se ku shkuan 130 milionë euro për djegësin e Tiranës që nuk ekziston asnjë tullë dhe paratë tuaja janë dhënë.
Nuk u tha një fjalë se me ç’para e bleu kopshtin e Edenit 5 milionë euro në kopshtin e kryeministrisë që nuk ka kryeministër në botë që të bëjë një shpenzim të tillë.
Nuk u tha një fjalë, si mundet një kryeministër të ulet në një ndeshje sporti me 28 mijë euro biletën?
Nuk u tha një fjalë, si mundet një kryeministër, në një kohë që fshatarët e tij përdorin parmendën, të shpenzojë 21 milionë euro me avion në dispozicion?
Jo, këto nuk i tha asnjë fjalë. Por këtu tani do i them Edi Ramës këto fjalë,” tha Kryetari i Partisë Demokratike, Sali Berisha, duke përfunduar:
“Në Dibër, në këtë sallë ti erdhe me gjuhën e pushtuesit dhe gjuhë e kopukut. Të dyja.
Në qoftë se mbrëmë në Kamzë unë të dhashë një përgjigje duke lexuar përroin tënd psikik frojdian, sot unë kam një përgjigje tjetër.
Ti erdhe si pushtues sepse i lejove vetes të ndërmarrësh një fyerje kolektive. Njëlloj si dikur paraardhësit e tu, që këta burra viganë, atdhetarë, patriotë, i shpallnin armiq se qëndronin për atdhe, qëndronin për besimin tek Zoti, për Dibrën dhe Shqipërinë.
Ti erdhe, ti fole dje si kopuk, sigurisht që me ato ministreshat e tua që xhinglaminglohen në atë mënyrë.
Tani të them unë dy, asnjë fjalë nuk të jap përgjigje sepse përgjigjen më të shkëlqyer ta dha dibrania në sallë, e cila u ngrit dhe të tha se burrat tanë janë të mrekullueshëm.
Por do ta them këtë këtu, burrat e Dibrës janë si malet e Dibrës, mjerë ai që i sulmon.
Rroftë Dibra, rroftë Shqipëria.
Fitore, fitore, fitore!”