Pas pengimit të SIPA-s për të arrestuar Dodikun, rritet prania policore në Sarajevën Lindore

Rreth 20 pjesëtarë të Ministrisë së Punëve të Brendshme, MPB, të Republikës Srpska u vendosën sot para qendrës administrative të Qeverisë së këtij entiteti në Sarajevën Lindore, një ditë pasi u pengua hyrja e pjesëtarëve të Agjencisë Shtetërore për Hetim dhe Mbrojtje, SIPA, në atë ndërtesë.

Siç raporton RFE, policët po pengojnë hyrjen në ndërtesë, para të cilës ndodhet një grup gazetarësh, ndërkohë që nuk ka konfirmim zyrtar nëse presidenti i Republikës Srpska, Milorad Dodik, ndodhet brenda saj.

Protokolli i presidentit të Republikës Srpska parashikonte që ai të marrë pjesë sot në mesditë në hapjen e ndërtesës së Rektoratit të Universitetit në Sarajevën Lindore, dhe më pas të zhvillonte një takim me udhëheqësit e komunave Palle dhe Sokollac.

Policët e MPB-së së Republikës Srpska mbrëmë ndaluan hyrjen pjesëtarëve të SIPA-s në ndërtesën e Qendrës Administrative në Sarajevën Lindore, në kohën kur Milorad Dodik po zhvillonte një takim me përfaqësues të Qytetit të Sarajevës Lindore.

Nga SIPA konfirmuan për RFE se pjesëtarët e kësaj Agjencie kishin synuar të vepronin sipas një urdhri të Gjykatës së Bosnje Hercegovinës dhe se nuk ka pasur përdorim force.

Milorad Dodik, së bashku me Kryetarin e Parlamentit dhe Kryeministrin e Republikës Srpska, Nenad Stevandiç dhe Radovan Vishkoviç, është i dyshuar për sulm ndaj rendit kushtetues, dhe hetimet po zhvillohen nga Prokuroria e Bosnje Hercegovinës që nga fundi i vitit të kaluar.

Nga mesi i muajit mars është lëshuar një fletarrest qendror ndaj tyre në Bosnje Hercegovinë, pasi ata nuk iu përgjigjën thirrjes së Prokurorisë për t’u paraqitur në një seancë dëgjimore.

Paraprakisht, Gjykata e Bosnje Hercegovinës i kishte kërkuar Interpolit ta rishikojë vendimin për refuzimin e kërkesës për lëshimin e fletarrestit të kuq për përfaqësuesit e udhëheqjes së entitetit të Republikës Srpska.

Në fund të muajit shkurt, Milorad Dodik u dënua në shkallën e parë nga Gjykata e Bosnje Hercegovinës me një vit burg dhe gjashtë vjet ndalim të veprimtarisë politike për mosrespektim të vendimeve të Përfaqësuesit të lartë të BE.

Një ditë pas aktgjykimit të shkallës së parë ndaj Dodikut, Parlamenti i Republikës Srpska miratoi ligje antikushtetuese për ndalimin e funksionimit të katër institucioneve shtetërore në këtë entitet./RFE/