Hapet Zyra e postës në Leposaviç, Kurti: Ligjshmëri dhe cilësi!
Në qendër të qytetit të Leposaviçit, sot u hap pika e re e Postës së Kosovës, e katërta në këtë komunë, në objektin e rikthyer nën menaxhim e Postës së Kosovës.
Kryeministri në detyrë, Albin Kurti, duke falënderuar Postën, Ministrinë e Ekonomisë dhe Komunën e Leposaviçit për punën tha se hapja e Zyrës së re në pronën e rikthyer, është bashkëdyzim i ligjshmërisë dhe cilësisë.
“Ata operatorët e pa licencuar që kanë funksionuar më herët janë mbyllur dhe tash e kemi Postën e Kosovës ku përveç dërgesave të zakonshme të postës mund të pranohen edhe mjete financiare në euro për qytetarët e Leposaviqit. Ky është një lajm i mirë edhe për banorët e komunës, por edhe për shërbimin postar publik të Republikës së Kosovës,” u shpreh Albin Kurti duke theksuar se dikur Posta e Kosovës ka operuar me humbje, kurse tash me kryeshefen e re, Nora Rracin, ajo operon me fitim, dhe përveç kësaj ka shtrirje territoriale gjithandej, anekënd komunave të Kosovës dhe përbrenda komunave, përfshirë edhe në zonat të cilat janë më larg qyteteve dhe qytezave, ndërsa përfundoi:
“Posta e Kosovës nuk e shikon se ku ka fitim që të ketë zyre, por ka ku qytetarë që të ketë shërbimI”
Kryetari i Komunës, Lulzim Hetemi, falënderoi dhe përgëzoi nga ana e tij qeverinë dhe postën për përurimin e sotëm dhe e ftoj këtë të fundit që të hapë edhe pika tjera në komunën që ai drejton.
Ndërkaq, kryeshefja e Postës së Kosovës, Nora Rraci foli për planet e ndërmarrjes që drejton, për të qenë sa më të pranishëm aty ku qytetarët kanë nevojë për shërbimet e operatorit publik.
“Nëse flasim në krahasim me vitin e kaluar, kemi pasur një rritje prej 11% të numrin të zyrave postare gjithandej Kosovës. Nëse flasim për katër komunat veriore të Kosovës, para dy vjetëve kemi pasur vetëm dy zyra në pikat kufitare, ndërsa po festojmë pikën 13-të, që besoj që është një rezultat shumë i madh duke qenë se e kemi arritur brenda dy vjetëve,” tha Nora Rraci.
Në njoftimin e Kryeministrisë tutje theksohet se Posta e Kosovës, me mbështetjen e Qeverisë së Republikës së Kosovës, po zbaton program e zgjerimit dhe modernizimit të rrjetit të saj.
Ndryshe, të pranishëm në këtë përurim zyrtar përveç Kryeministrit në detyrë, Albin Kurti, ishin edhe ministrja e Ekonomisë në detyrë, Artane Rizvanolli, kryetari i Komunës së Leposaviçit, Lulzim Hetemi, kryesuesi i Bordit të Postës së Kosovës, Gëzim Paci dhe kryeshefja e Postës së Kosovës, Nora Rraci.
