Garantimi i procesit zgjedhor më 11 Maj, në KQZ diskutojnë Celibashi, Dumani, Çela dhe Proda

KQZ, SPAK, Prokuroria e Përgjithshme dhe Drejtoria e Përgjithshëm e Policisë së Shtetit, rikonfirmuan sot angazhimin e tyre publik për të adresuar shpejt dhe në përputhje me parashikimet respektive ligjore, jashtë çdo interesi politik dhe elektoral, çdo parregullsi që synon të cënojë integritetin dhe standardin e zgjedhjeve parlamentare në 11 Maj 2025.

Sot, me qëllim të forcimit të bashkëpunimit ndërinstitucional për garantimin e një procesi zgjedhor të qetë, të sigurt dhe të besueshëm në çdo fazë të tij, në Komisionin Qendror të Zgjedhjeve zhvilluan një takim Komisioneri Shtetëror, Ilirjan Celibashi, Drejtuesi i SPAK, Altin Duman, Prokurori i Përgjithshëm, Olsian Çela dhe Drejtori i Përgjithshëm i Policisë së Shtetit, Ilir Proda, ku u diskutua për masat konkrete për parandalimin e shkeljeve dhe ndërhyrjeve në vullnetin e zgjedhësve, hetimin dhe ndëshkimin e shpejtë të shkeljeve të ligjit zgjedhor, votimin nga jashtë vendit, sfidat dhe garancia e së drejtës së votës për emigrantët, si dhe koordinimi i ngushtë për një menaxhim efikas të ditës së votimit dhe numërimit.

Me këtë rast, krerët e institucioneve rikonfirmuan angazhimin për të vepruar me prioritet kundër shitblerjes së votës, presioneve dhe intimidimeve ndaj zgjedhësve, si dhe çdo tentative për të cenuar integritetin e zgjedhjeve.

Në fund të këtij takimi, krerët e institucioneve vizituan Qendrën Operacionale të Kundër Krimeve Zgjedhore në KQZ, ku janë vendosur përfaqësues të SPAK dhe Prokurorisë së Përgjithshme.