Hetimi i krimeve zgjedhore, kreu i KQZ: 115 materiale kallëzuese në SPAK, 35 procedime penale

Vetëm pesë ditë para zgjedhjeve parlamentare të 11 majit, kreu i Komisionit Qendror të Zgjedhjeve, Ilirian Celibashi, tha se aktualisht janë 115 materiale kallëzuese të referuara në SPAK, të cilat vijnë nga burime të ndryshme si partitë politike, denoncimet online apo qytetarët.

“Sipas të dhënave të deritanishme, nga subjektet politike janë paraqitur 25 kallëzime, ndërsa 35 të tjera janë denoncime online. Në total, SPAK ka hapur 35 procedime penale, nga të cilat 8 janë nisur me iniciativë të vetë institucionit,” tha Ilirian Celibashi duke fol për bashkëpunimin mes KQZ-së dhe SPAK-ut në lidhje me hetimet për krimet zgjedhore.

Nga Prokuroria e Përgjithshme janë regjistruar 32 kallëzime penale në prokurori të ndryshme të vendit, tha kreu i KQZ duke sqaruar se çdo institucion po ndjek me vëmendje parregullsitë dhe çdo indicie për krime zgjedhore, ndërsa theksoi rëndësinë e ruajtjes së integritetit të procesit zgjedhor në të gjitha nivelet.

Lidhur me problematikat e evidentuara deri më tani në procesin e votimit nga jashtë vendit, ai tha se deri më tani janë regjistruar 156 ankesa nga votuesit. Në 90 raste, është raportuar se zarfi me fletën e votimit është lënë në derë ose në kutinë postare nga DHL, pa njoftim. Ndërkohë, 21 ankesa lidhen me refuzimin e DHL për të tërhequr zarfin e plotësuar për rikthim.

Po ashtu, 9 votues kanë raportuar se nuk u ka mbërritur fleta e votimit në dokumentacionin zgjedhor, ndërsa në 8 prej tyre, KQZ ka ndërhyrë për ridërgim. Gjithashtu, 4 zgjedhës janë ankuar se nuk janë njoftuar për dorëzimin e zarfit, ndërsa 3 të tjerë thonë se nuk e kanë marrë ende fare.

Celibashi siguroi se të gjitha rastet janë duke u ndjekur dhe se çdo votues ka të drejtën të raportojë çdo problem në KQZ.

Në fund, kreu i KQZ sqaroi se Komisioni Qendror i Zgjedhjeve ka një kontratë me kompaninë postare DHL për shpërndarjen e fletëve të votimit për emigrantët, por vlerësimi për performancën e saj do të bëhet pas përfundimit të procesit.

“Kur të mbarojë kontrata, do të ulemi me DHL dhe do të shikojmë se sa dhe si e ka përmbushur këtë shërbim. Është herët për të dhënë verdikte!”