Fier, bleu vota për të bijën, vihet në pranga babai i kandidates së PSD

Pas hetimeve 1 mujore të SPAK, rezultoi se 63-vjeçari Pandeli Bozhe shpërndau shuma parash për blerjen e votave në favor vajzës së tij, Limonera Bozhe, e cila kandidon për deputete nën logon e PSD.

Sipas Policisë së Shtetit, Pandeli Bozhe akuzohet për “Korrupsion aktiv në zgjedhje”.

“Nga hetimet dyshohet se gjatë një muaji, ai iu ka dhënë shuma parash, shtetasve të ndryshëm, me qëllim blerjen e votave në favor të kandidates së një subjekti politik,” thekson Policia e Shtetit përmes njoftimit.

Ndërkohë kanë nisur hetimet edhe për një 27-vjeçar në Lushnjë, i cili në cilësinë e nënkryetarit të një subjekti politik ka kanosur në Messenger një 28-vjeçar për dhënien e votës.

Njoftimi:

Drejtoria Vendore e Policisë Fier

-Si rezultat i një hetimi njëmujor, në drejtimin e SPAK, dokumentohet një rast i blerjes së votave.

Vihet në pranga autori.

Specialistët për Hetimin e Krimeve Ekonomiko-Financiare ekzekutuan urdhrin e Prokurorisë së Posaçme Kundër Korrupsionit dhe Krimit të Organizuar, për ndalimin e shtetasit P. B., 63 vjeç, banues në fshatin Portëz, për veprën penale “Korrupsioni aktiv në zgjedhje”.

Nga hetimet dyshohet se gjatë një muaji, ai iu ka dhënë shuma parash, shtetasve të ndryshëm, me qëllim blerjen e votave në favor të kandidates së një subjekti politik.

Materialet procedurale iu referuan SPAK, për veprime të mëtejshme.

-Specialistët për Hetimin e Krimeve të Komisariatit të Policisë Lushnjë referuan materialet në Prokurori, ku nisi procedimi penal për shtetasin S. P., 27 vjeç, banues në fshatin Bubullimë, pasi ka kallëzuar shtetasi J. Ç., 28 vjeç, se shtetasi 27-vjeçari, nënkryetar i një subjekti politik në Lushnjë, e ka kanosur në platformën “Messenger”, për dhënien e votës. Materialet procedurale iu referuan SPAK, për veprime të mëtejshme, për veprën penale “Kanosja apo dhunimi ndaj pjesëmarrjes në zgjedhje”.