Krimi zgjedhor, SPAK: U administruan 156 materiale kallëzuese, hetimet nisën për 39 prej tyre

Prokuroria e Posaçme ka bërë të ditur se aktualisht janë janë 156 materiale të administruara lidhur me krimet zgjedhore për zgjedhjet e 11 Majit, prej të cilave 39 janë regjistruar si procedime penale.
“Prej tyre 25 janë vendime për mosfillim të hetimit penal. 24 materiale kallëzuese janë dërguar për kompetencë në prokuroritë e rretheve gjyqësore. 17 materiale janë dërguar për verifikim në Drejtorinë Vendore të Policisë. 1 material është bashkuar me një çështje tjetër ekzistuese. Pjesa e mbetur është në proces verifikimi,” thekson SPAK përmes një njoftimi

Nga 39 procedimet penale të regjistruara: 21 janë iniciuar mbi bazën e referimeve nga Policia e Shtetit. 1 është referuar nga Shërbimi i Kontrollit të Brendshëm të Burgjeve. 8 janë nisur kryesisht nga SPAK. 3 kanë ardhur si rezultat i kallëzimeve nga shtetas të ndryshëm. 3 janë referuar nga Prokuroritë e Rretheve Gjyqësore. 3 janë bazuar në kallëzimet e subjekteve politike.

Këto, sipas Prokurorisë së Posaçme janë veprat penale të lidhura me krimet zgjedhore.

– 33 procedime janë regjistruar për veprën penale të nenit 328 (korrupsionit aktiv në zgjedhje).
– 4 procedime janë regjistruar për të dy nenet, respektivisht, sipas nenit 328 me nenin 328/b (korrupsioni aktiv/pasiv në zgjedhje).
– 1 procedim është regjistruar sipas nenit 328/a (përdorimi i funksionit publik për qëllime politike).
– 1 procedim është regjistruar për nenin 328/a (përdorimi i funksionit publik për qëllime politike dhe nenin 248 (shpërdorimi i detyrës).