Video/ “5 vota 500 mijë lekë”, PD: Kërcënohet denoncuesi i shit-blerjes së votës në Dibër

Partia Demokratike përmes Kryetarit të Këshillit Kombëtar të PD, Edi Paloka, ka denoncuar sot socialistët që po kërcënojnë një qytetar i cili publikoi një video të shit-blerjes së votës në Dibër.

Edi Paloka i cili e nisi denoncimin me publikimin e videos ku tregohet shitja e 5 votave në Dibër për 500 mijë lekë, tha se denoncuesi Lulzim Memashi i cili punon si taksist, është kërcënuar nga dy persona në vendin e punës.

“Lulzim Memamshi është autor i kësaj video, anëtar i PD prej vitesh ka qenë komisioner në këto zgjedhje. Ai është  në gjendje shumë të vështirë  ekonomike, ka dhe një djalë të sëmurë, e ka lënë bashkëshortja disa muaj më parë. Pas daljes së kësaj video dje në vendin e tij të punë i kanë vajtur dy persona që e kanë kërcënuar.

Fjalët kanë qenë çfarë i ke bërë vetes me atë që ke nxjerrë, do ta shohësh çfarë do të bëjmë. Kërkojnë tu mbyllin gojën atyre që denoncojnë. Jam këtu për ta denoncuar si rast dhe për të marrë në mbrojtje publike Lulzimin,” tha Edi Paloka ndërsa paralajmëroi Kryeministrin Edi Rama që mos të luajë dhe të mos hakmerret ndaj qytetarëve që nuk pranuan t’i shesin votën.

“Rama mund të bëhet mbret po ta harrojë se mund të luajë me demokratët. Po e paralajmëroj që as mos ta çojë ndërmend që tashi do të hakmerret dhe ndaj atyre që nuk pranuan të shiten,” tha Kryetari i Këshillit Kombëtar të PD, Edi Paloka, duke i thënë kujtdo që mendon se me këtë mandatin e katërt të Edi Ramës mund të bëjë çfarë do me demokratët, e ka gabim.