Presidenti Trump refuzon takimin në Florida, Vuçiç minon projektin e Trump Jr. në Beograd

Pas refuzimit të Presidentit të Shteteve të Bashkuara, Donald Trump, që të takoj Presidentin e Serbisë, Aleksandar Vuçiç, në Florida, ajo që po ndodhë me projektin e të birit Trump J. dhe dhëndrit Jared Kushner në Beograd po konsiderohet hakmarrje!

Në fakt, vetëm pas dështimit të Aleksandar Vuçiçit me takimin në Florida, Prokuroria për Krimin e Organizuar në Beograd zbuloi se godina e Shtabit të Përgjithshëm të Ushtrisë që i ishte dhënë në vitin 2024 kompanisë së afërt me presidentin amerikan Donald Tramp “Affinity Global Development” që drejtohet nga dhëndri i tij Jared Kushner, pas disa takimeve me Vuçiçin dhe Trump Jr, për ndërtimin e hotelit luksoz me vlerë 500 milionë dollarë, “Trump International”, ishte hequr në mënyrë të paligjshme nga lista e trashëgimisë kulturore.

Dhe jo vetëm kaq! Personi që kishte marrë këtë vendim, U.D. i Drejtorit të Entit Republikan për Mbrojtjen e Trashëgimisë Kulturës, Goran Vasiç u arrestua më 13 Maj nën dyshimin se ka falsifikuar Propozimin për marrjen e vendimit për ndërprerjen e statusit të pronës kulturore të godinës së Shtabit të Përgjithshëm.

Prokuroria thotë se këtë dokument pa e konsultuar me ekspertë e ka dërguar në Qeverinë e Serbisë përmes Ministrisë së Kulturës, dhe më 14 nëntor 2024 Qeveria mori Vendim për ndërprerjen e statusit të kësaj prone kulturore duke e hequr edhe nga Regjistri i Trashëgimisë Kulturore.

Në këtë mënyrë, thotë drejtësia serbe, Goran Vasiç ka dëmtuar trashëgimin kulturore të Serbisë, po kjo drejtësi e cila heshti kur ky njeri u emërua si U.D. pasi ishte dorëhequr nga posti i Drejtorit, Dubravka Gjukanoviç, profesoreshë e njohur e Akademisë së Arteve në Novi Sad, pasi kishte refuzuar të firmos ultimatumin e ministrit Financës, Sinisha Mali, që godina e Shtabit të Përgjithshëm të hiqet nga mbrojtja e trashëgimisë kulturore, për ti hapur rrugë lejes për ndërtimin e hotelit “Trump International”.

“Kushdo që dëshironte mund të shkonte në faqen e internetit të Jared Kushner, Affinity Global Development, dhe të shihte ato foto, renderime të ndërtimit të planifikuar, që ishin të disponueshme për të gjithë. Prandaj nuk mund ta besoj që askush në hierarkinë e marrjes së vendimit për heqjen e mbrojtjes së trashëgimisë kulturore të Shtabit të Përgjithshëm, nga iniciativa që, sipas pretendimeve të sotme të prokurorisë, u iniciua nga Goran Vasiç me iniciativën e tij, nuk e dinte se për çfarë bëhej fjalë, kështu që Qeveria u mashtrua në nëntor të vitit të kaluar për të marrë një vendim për fshirjen e Shtabit të Përgjithshëm nga regjistri i trashëgimisë kulturore të mbrojtur,” thotë Dubravka Gjukanoviç duke shtuar se është e pabesueshme që në një periudhë të shkurtër kohore ai studioi rregulloret ligjore, dokumentet doktrinare të krijuara për dekada, i zotëroi të gjitha shpejt dhe në mënyrë të pavarur shkroi propozimin për marrjen e një vendimi për ndërprerjen e statusit të pronës kulturore të Shtabit të Përgjithshëm të Ushtrisë Serbe dhe ia paraqiti atë Ministrisë së Kulturës, ndërsa përfundon:

“Ku, dikush duhej të kontrollonte saktësinë dhe vlefshmërinë e dokumentacionit që u përcoll për procedurë të mëtejshme. Injoranca nuk është justifikim dhe kjo sjell përgjegjësi.”

Avokati Bozho Preleviç tha për të përditshmen serbe ” Danas”, se dihet saktësisht se kush e nisi atë projekt, kush ia ofroi djalit të Trump, kush ushtroi presion mbi Institutin, kështu që disa punonjës dhanë dorëheqjen.

“Dihet gjithashtu se kush e solli Vasiçin dhe në interes të kujt ishte të ndryshonte statusin e Shtabit të Përgjithshëm në një mënyrë të tillë, të cilën prokurori pretendon se e përdori. Prandaj, ekziston një vepër penale, por nuk ka askush që e nxiti Vasiçin ta bënte ose që e urdhëroi, sepse kjo mund të kishte ardhur vetëm nga autoritetet. Prandaj, kjo është një tjetër akuzë ‘shaka’,” sqaron Preleviç ndërsa paralajmëron se me 19 e 20 maj, një zyrtar i lartë i Kombeve të Bashkuara do të vijë në Beograd dhe do të zhvillojë takime me autoritetet serbe, në lidhje me sjelljen e këtij shtet ndaj trashëgimisë kulturore, për të cilën ky vend i dha edhe mbrojtje.

“Pra, nuk është OKB-ja, por ne e shënuam në atë mënyrë. Këta zyrtarë dolën në pah edhe herën e fundit kur u ngrit një pyetje në lidhje me gondolën e Goran Vesiç për në Kalemegdan, dhe mendoj se ata ndikuan ndjeshëm në shpëtimin e tij dhe në ndalimin e ndërtimit të atij projekti,” thotë avokati Bozho Preleviç duke theksuar faktin më të rëndësishëm në këtë skandal.

“Në thelb, është e mundur që pas vendimit për ndjekjen penale të Goran Vasiçit qëndron refuzimi që Aleksandar Vuçiç të pritet nga Donald Trump në Florida,” beson avokati Bozho Preleviç.

Ndryshe, dhëndri i Presidentit Trump, Jared Kushner, së bashku me partnerët e tij të biznesit, planifikon të ndërtojë një kompleks luksoz banimi dhe biznesi në vendin ku ishte Shtabi i Përgjithshëm i Ushtrisë Serbe, i cili do të përfshinte hotelin “Trump International”.

Donald Trump Jr. djali më i madh i Presidentit Trump, ka vizituar Serbinë dy herë gjatë muajve të fundit për të shprehur mbështetje për Presidentin Aleksandar Vuçiç, administrata e të cilit miratoi shpejt projektin e hotelit të familjes Trump dhe Kushner.

Projekti mori miratimin paraprak nga qeveria serbe vitin e kaluar u dha para se të hiqet statusi i trashëgimisë kulturore të mbrojtur.

Godina e Shtabit të Përgjithshëm të Ushtrisë Serbe u dëmtua gjatë bombardimeve të NATO-s në vitin 1999.