Presidentja e Kosovës udhëton drejt SHBA

Me ftesë të Kongresit Amerikan, Presidentja e Kosovës, Vjosa Osmani, ka udhëtuar drejt Shteteve të Bashkuara ku pritet të marrë pjesë në ngjarjet e organizuara në kuadër të sesionit pranveror të Asamblesë Parlamentare të NATO-s, që sivjet mbahet në qytetin Dayton në SHBA.

Ky sesion, njofton Presidenca, shënon edhe 30-vjetorin e Marrëveshjes së Paqes së Daytonit për Bosnjen dhe Hercegovinën, prandaj edhe e tërë ngjarja do t’i dedikohet përpjekjeve për paqe e siguri në Ballkanin Perëndimor.

Në këtë ngjarje të rëndësishme marrin pjesë edhe Presidentë të vendeve të tjera nga rajoni, si dhe përfaqësues të lartë të NATO-s, BE-së e SHBA-ve.

Ndryshe, në agjendë të Presidentes së Kosovës, Vjosa Osmani janë një sërë aktivitetesh, përfshirë fjalime në darkën kryesore si dhe në panele, e poashtu takime me delegacionet pjesëmarrëse.