PD do të kërkojë pavlefshmëri. Berisha: Këto zgjedhje nuk do njihen kurrë!

Partia Demokratike do kërkojë pavlefshmëri tha sot Kryetari i PD, Sali Berisha duke e bërë të qartë se zgjedhjet e majit 2025 nuk do të njihen kurrë, ndërsa shtoi se opozita ka zgjedhur rrugën e qëndresës për votën e lirë dhe fton qytetarët të angazhohen në këtë betejë. 

Kryetari i Partisë Demokratike tha se ata që i paraqesin si sukses, janë në një linjë me kartelet, Edi Ramën dhe autorët e këtij procesi të deformuar ndërsa akuzoi analistë dhe intelektualë se po justifikojnë kapjen e zgjedhjeve nga kartelet e drogës, duke e paraqitur këtë si sukses të qeverisë. Ai i quajti “intelektualë kriminelë” dhe akuzoi drejtësinë për zvarritje të qëllimshme. 

“Përpjekjet për të injoruar ndikimin në farsën elektorale të karteleve të drogës, organizatave dhe grupeve kriminale, të koordinuara nga Ergys Agasi, përbëjnë një krim tjetër madhor dhe të shëmtuar, dimension tipik të farsës elektorale të narkoshteteve,” tha Sali Berisha duke i bërë thirrje çdo qytetar shqiptar të analizojë propagandën e këtyre ditëve se si njëlloj si në diktaturë.

“Intelektualët kriminelë që mbronin diktaturën dhe krimet e saj, sot prapë, këta janë pseudo-intelektuale, këta nuk kanë asgjë të përbashkët me intelektualin e vërtetë, shërbëtorin publik. Kërkojnë t’u servirin si sukses qeveritar elektoral kartelet e drogës dhe brutalitetin e tyre në zgjedhje,” tha Kryetari i Partisë Demokratike, Sali Berisha duke sh[reh habinë se si mund të mbrohet një krim i tillë i shëmtuar elektoral ndërsa përfundoi:

“Unë edhe njëherë deklaroj se këto zgjedhje kurrë nuk do njihen dhe se ata, të cilët përpiqen t’u shesin shqiptarëve krimin si sukses elektoral, nuk bëjnë gjë tjetër vetëm se rreshtojnë veten me kartelet, me Edi Ramën dhe me të gjithë autorët e farsës më të shëmtuar elektorale të majit 2025.”

Deklaratë:

Përpjekjet për të injoruar ndikimin në farsën elektorale të karteleve të drogës, organizatave dhe grupeve kriminale, të koordinuara nga Ergys Agasi, përbëjnë një krim tjetër madhor dhe të shëmtuar, dimension tipik të farsës elektorale të narkoshteteve.

Kandidati i kartelit Troplini, karteli më i fuqishëm i kokainës në Ballkan dhe ndër më të fuqishmit në Europë, i cili është i vetmi kartel me port në dispozicion, është karteli që kontrollonte në çdo metër katror portin e Durrësit, është karteli që bënte çdo emërim dhe anulonte çdo shkarkim në këtë port, duke filluar nga pozicioni i fshesarit te vinçieri, drejtori dhe me radhë.

Është karteli që kontrollon me dhjetëra biznese të paprekura nga Altin Dumani.

Është karteli që një vit më parë do gjendej me 3 milionë euro dhe që nuk u ndodhi asgjë.

Ky kartel kishte përcaktuar Arkend Ballën si ministër të ardhshëm të Brendshëm të Shqipërisë.

Në marrëveshjen Agasi-Rama-Doçi, që është nipi i Troplinëve, por eksponent i spikatur, perandoria e kartelit Troplini shtrihet nga Peruja në Europën e Veriut.

Pra, ky kartel nxori Arkend Ballën 5 mijë vota më të votuar se Edi Ramën në vitin 2021.

Po, Edi Rama mori 15 mijë vota.

Arkend Troplini mori 21 mijë vota.

Shikoni se çfarë krimi monstruoz bën propaganda.

Kërkon t’u shesë shqiptarëve për zgjedhje këtë farsë të shëmtuar droge dhe krimi.

Arkend Troplini, në vitin 2021, si Arkend Balla, mori gjithsej 2500 vota.

Dhe kur u konvertua në Arkend Troplini, mori 21 mijë vota.

A ka më pafytyrësi se sa të bësh avokatinë e këtij procesi?

Çfarë morali u mbetet avoketërve të këtij procesi?

Avoketërit e Troplinit në gjykatë janë me ligj, paguhen prej tij dhe është normale se nuk duhet të ketë njeri pa avokat.

Por avoketërit e tij në studio, të cilët duan t’u servirin shqiptarëve një proces elektoral të tillë si sukses të qeverisë, janë të denjë për çdo epitet.

Si mundet të flasin për zgjedhje?

Si mund të flasin për fitore zgjedhjesh, kur i njëjti person ka marrë 2500 vota në vitin 2021, dhe pasi ndërron mbiemrin në Arkend Troplini, merr 21 mijë vota. Tejkalon me 5 mijë vota Edi Ramën.

Unë mund t’u rreshtoj ju një seri të tjerësh.

Çfarë janë këta që duan të legjitimojnë krimin në zgjedhje?

Çdo kriminel duhet të ketë një avokat në përputhje me ligjin, po këta, avoketër në studio televizive të farsës më të shëmtuar, çfarë emri mund t’i quaj?

Ua lë qytetarëve t’ua vënë emrin këtyre.

Në këtë farsë të kartelit, dora e shtetit është po kaq e zezë sa dora e kartelit.

Sepse Irena me 5 mbiemra, e cila duhej të kishte ikur me kohë atje ku e ka vendin, KLGJ me ligj për 20 ditë duhej të jepte verdiktin, po ajo mban 42 ditë për të marrë vendimin për Elvis Doçin.

E morët vesh besoj, që të gjithë krerët e kartelit Troplini janë të lirë, në arrati gjoja, por janë të gjithë në Durrës në shtëpitë e tyre.

Pra, a nuk është ky qëndrim, ftoj qytetarët t’i shtrojnë pyetjen vetes: a nuk është ky qëndrim një akt i shëmtuar me të cilin skllevër të krimit, intelektualë kriminelë, analistë kriminelë, të quajtur analistë, por që nuk kanë asgjë të përbashkët me gazetarinë dhe analizën, kërkojnë t’u servirin qytetarëve, suksesin e kartelit si suksesin e zgjedhjeve.

A përbën ky një krim të shëmtuar propagandistik?

Pra, është koha të ndalemi.

Çdo qytetar shqiptar të analizojë propagandën e këtyre ditëve se si njëlloj si në diktaturë, intelektualët kriminelë që mbronin diktaturën dhe krimet e saj, sot prapë, këta janë pseudo-intelektuale, këta nuk kanë asgjë të përbashkët me intelektualin e vërtetë, shërbëtorin publik.

Kërkojnë t’u servirin si sukses qeveritar elektoral kartelet e drogës dhe brutalitetin e tyre në zgjedhje.

Pra, duhet të bëjmë dallimin të dashur qytetarë, midis avokatit ligjor dhe këtyre skllevërve të krimit që përpiqen të mashtrojnë, që përdorin valët e radiove dhe ekranet televizive për të mashtruar qytetarët.

Për të përligjur një monstruozitet evident. Nuk është i fshehur.

Ju jeni dëshmitarë, sa herë unë denoncova Sara Milen dhe Suel Çelën.

A nuk e denoncova gjatë fushatës disa herë Klodian Danin, ushtar i Suel Çelës, që thërriste në Përrenjas qytetarët të votonin për Sara Milen.

Sa herë kam denoncuar takimet e fshehta te Kodra e Kuajve të Ergys Agasit me Suel Çelën dhe më pas me Vangjush Dakon dhe me Edi Ramën.

A mundet të kapërdihet?

A mundet të mbrohet një krim i tillë i shëmtuar elektoral?

Unë edhe njëherë deklaroj se këto zgjedhje kurrë nuk do njihen dhe se ata, të cilët përpiqen t’u shesin shqiptarëve krimin si sukses elektoral, nuk bëjnë gjë tjetër vetëm se rreshtojnë veten me kartelet, me Edi Ramën dhe me të gjithë autorët e farsës më të shëmtuar elektorale të majit 2025.

PYETJE-PËRGJIGJE

Daniela Maloku, Report Tv: Mes të gjitha diskutimeve sa i takon kundërshtimit të zgjedhjeve të 11 majit, është edhe pikëpyetje se çfarë do të bëjë PD me mandatet e fituara në parlament kur të vijë shtatori. Ka demokratë në rrjetet sociale që kanë artikuluar një tezë që: PD deputetët e saj duhet të shkojnë drejt grevës së urisë. Ae sheh PD si opsion këtë, apo Sali Berisha e mohon?

Berisha: Tani, çfarë mund të them sot unë.

Unë mund të them sot atë që kam thënë shumë e shumë herë më parë, se me Edi Ramën, zgjedhje të lira kurrë nuk mund të ketë.

Kjo nuk është asgjë e re.

E kam thënë para këtyre zgjedhjeve, e them edhe sot me bindjen më të madhe pasi Edi Rama ka krijuar shtet elektoral dhe zhvillon farsë elektorale.

Imagjinoni ju pak, në Durrës janë 50 mijë vota të diktuara nga krimi.

Se nuk është vetëm ky, është Ani Dyrmishi, është Drazhi, janë disa.

Po ky ka qenë stari, se ky ishte projektuar për Ministër të Brendshëm.

Dhe tani këtu 2-3 ditë, meqë u kompromentuan rëndë, po bëhet beteja për kryetar bashkie në vend të Sakos. Kjo është e vërteta.

Pra, për të dalë tek pyetja juaj.

Në qoftë se me këto fakte që paraqesim, këto denoncime që bëjmë, duam t’u them shqiptarëve se me shtet elektoral ka vetëm farsë elektorale dhe se Edi Rama zhvillon vetëm farsë elektorale.

Dhe se farsat nuk fitohen kurrë nuk nga opozita.

Farsa nuk fitohet nga opozita.

Atëherë ka një qëllim, që çdo qytetar shqiptar, që beson se këto zgjedhje ishin farsë dhe se farsa nuk fitohet kurrë nga opozita, të pyesë veten a është i gatshëm të sakrifikojë për votën e lirë.

A është i gatshëm të angazhohet në një betejë për t’u rikthyer shqiptarëve të drejtën e votës së lirë.

Çka nënkupton të gjitha përpjekjet, të gjitha sakrificat për ata që besojnë se kjo është një farsë.

Për ata që besojnë se me Edi Ramën nuk ka zgjedhje të lira dhe natyrisht largimi i Edi Ramës duhet të jetë qëllimi më madhor i shqiptarëve.

Daniela Maloku, Report Tv: Duke qenë se ju thoni se farsa nuk fitohet nga opozita, kishit në dorë mbase të mos futeshit në zgjedhje. Ju u futët në zgjedhje. A nuk ishte ky pranim i kushteve të një gare?

Berisha: Ka dy rrugë. Ka një rrugë, bojkoti i zgjedhjeve. Në qoftë se ju lexoni rezolutën e 30 prillit, të votuar nga 82 parti politike të qendrës së djathtë të Europës, parti që qeverisin Europën sot, aty është e qartë se 11 Maji do jetë një farsë, sepse Edi Rama gjatë fushatës po blinte vota me lekë, po blinte vota me kanabis, po blinte vota me prokurime, po blinte vota me punësime.

Dhe se drejtësia e kapur nga Edi Rama nuk qëndronte ndaj gjithë këtyre krimeve.

Përveç kësaj, u zhvillua një hearing në Parlamentin Europian i të gjithë spektrit politik të parlamentit.

Dhe në këtë hearing, zgjedhjet u quajtën një emergjencë.

Tani, në qoftë se ishim para dy rrugëve, pjesëmarrje ose mospjesëmarrje.

Në qoftë se nuk merr pjesë, do zgjedhësh rrugën e dhunës ose rrugën e shuarjes.

Ose do pranosh se këtu nuk do merrem më me politikë, ose do merrem dhe do përdor forcën ndaj kësaj qeverie që të merr liritë.

Është njëra rrugë.

Rruga tjetër është rruga që ndjekim ne. Rruga në të cilin ne marrim pjesë në proces, paraqesim të gjitha dokumentet e vërteta që ishte farsë dhe ftojmë shqiptarët të luftojnë për votën e tyre.

Të dyja janë të vështira, por kjo e dyta ka një mbështetje ndërkombëtare.

E para mund ta krijojë, por fillimisht nuk ka.

E dyta po, ja ku janë raporti, ja ku janë rezolutat.

Është pra një betejë e vështirë, por jo e pashpresë.

Elda Menga, Top Channel: Z.Berisha, për t’u ndalur sërish te pyetja e koleges. Ju ftoni shqiptarët për luftë, për betejë, por a jeni i gatshëm që këtë betejë, pra sakrificën të jeni ju që ta bëni të parët dhe a e shihni si opsion grevën e urisë në shtator kur të nisë parlamenti i ri?

Berisha: Absolutisht i gatshëm ta udhëheq betejën gjer në fitore dhe me shembullin personal, t’u rikthej shqiptarëve votën e lirë.

Nuk përjashtohet asnjë variant.

Rëndësi të jashtëzakonshme për ne ka që shqiptarët me ndërgjegje të plotë të binden se kjo ishte një farsë dhe jo ajo siç ua paraqet propaganda kriminale e qeverisë dhe altoparlantëve të saj.

Sepse është shumë e rëndë kur sheh pseudo-intelektualë të bëjnë avokatinë e akteve mega-kriminale të karteleve të drogës në studiot televizive dhe të thonë se në xhepat e mi nuk ka paratë e tyre. Ti ndan moralin me ta kur pranon veprën e një karteli, ti nuk ke asnjë dallim moral nga ta.

Je i zhveshur, je njësh me krimin.

Pra, çfarë do ndodhë?

Edhe njëherë, me Edi Ramën nuk ka zgjedhje.

Cilido që është i gatshëm të luftojë në rrugën e zgjedhur nga PD. Thashë, jo jashtë institucioneve, është i mirëpritur dhe unë një betejë që nuk besoj se nuk do ta fitoja, nuk do e nisja.

Jam i bindur se kjo betejë do fitohet.

Elda Menga, Top Channel: Ndërkohë në krah të denconcimit të asaj që ju e quani farsë, a ka PD për të nisur një analizë të brendshme për rezultatin e zgjedhjeve?

Unë në fakt nuk dua t’ju pyes për nenin 46, pasi ju e keni dhënë një përgjigje, duke thënë se do e vijoni betejnë, por pyetja ime është: kur keni ndërmend të mblidhni forumet për të marrë një vendimarje edhe me mandatin tuaj?

Berisha: Forumet janë aktive më shumë se kurrë sot.

Po merren me analizën e gjithanshme të farsës.

Do përfundojë lufta për ndërgjegjësimin e Shqipërisë dhe botës për farsën elektorale dhe do merren të gjitha vendimet.

Kjo është një parti demokratike, e cila ka faktuar që ka të gjitha atributet e një force demokratike.

Por, ta harrojë kush se mund të mashtrojë shqiptarët apo demokratët se farsa elektorale fitohet nga opozita.

Farsa elektorale nuk fitohet nga opozita.

Dhe ata të cilët duan apo rreken të provojnë këtë, ata injorojnë efektet e arrestimit në vitin elektoral të liderëve të tre partive kryesore apo ndjekjen penale si dhe deputetëve. Pra injorojnë terrorin politik.

Ata injorojnë shtetin elektoral i cili shpërndau në këto zgjedhje 100 euro për 48 përqind të votuesve, zgjedhësve, pensionistëve.

I cili fali me vendim qeverie 200 milionë euro gjoba dy ditë para zgjedhjeve.

I cili shndërroi punonjësit e administratës në patronë të votuesve skllevër që i kontrollonin dhe që ngritën në mbarë vendin zyrat paralele të qendrave të votimit.

Injoron përdorimin e mijëra lejeve të legalizimit, licencave, certifikatave të pronësisë dhe lejeve të ndërtimit për vota.

Të gjitha në kundërshtim me ligjin.

Injoron përdorimin e 500 milionë eurove për prokurime të paligjshme publike.

Injoron organizimin e 4500 ngjarjeve, më shumë se tre vite e gjysmë të marra së bashku, për të ndikuar zgjedhësit.

Injoron, këndon këngën e Pojës, Suel Çelës dhe efektet e tyre.

Ndaj dhe unë e kuptoj që Edi Rama, mediat që e mbështesin atë janë thellësisht të interesuar të gjejnë çdo pretekst për të mbuluar farsën. Po dielli me shoshë nuk mbulohet me asgjë.

Kjo është përgjigjja ime.

Ermal Rizaj, Syri Tv: Z.Berisha, pavarësisht thirrjeve tuaja dhe kërkesave tuaja të depozituara nga ana e PD, KQZ ka certefikuar rezultatet në bazë të qarqeve. PD do të kërkojë pavlefshmëri, apo si në rastin e Tiranës mund të kërkojë rinumërim, ku mund të marrë mandatin doktor Alimehmeti?

Berisha: PD do kërkojë pavlefshmëri dhe të gjitha llojet e ankesave.

Farsa është një shkelje universale e ligjeve, e normave, e kritereve.

Për ta thënë me një fjalë. Merrni deklaratën e Edi Ramës se kodi zgjedhor është një kinezëri.

Që në këtë moment i dëshmon se do zhvillojë farsë dhe jo zgjedhje.

Mariglen Kume, MCN: Qarku i Durrësit, z.Berisha, ka qenë ndër të vetmit qarqe që kanë ruajtur rezultatet e 2021. Thënë kjo, në një kohë kur ju keni këto akuza, atë të cilin ju e quani klani i Troplinit në Durrës. Cila është formula që ndoqi PD për këtë qark që të paktën ruajti rezultatin e 2021, pasi në shumë qarqe të tjera ka dalë edhe më dobët?

Berisha: Ka qarqe që ka fituar PD.

Ti nuk mundet kurrë të pranosh se farsa ka të njëjtin efekt në çdo qytet, në çdo qark dhe kudo.

Por, kur sheh rezultatin e Arkend Ballës, 5 mijë vota më shumë se Edi Rama, atëherë më thuaj mua.

Nuk mundet kurrë të pranohet.

Kur sheh rezultatin e Blendi Gonxhes, që merr 5 mijë vota në Vorë dhe kandidati tjetër që dikur kishte marrë 6 mijë vota në Vorë, merr 2 mijë vota tani, sepse banda Xhabafti kaloi nga ai tek Gonxhe, pra njeriu nuk mund t’i nënshtrohet kësaj kurrë. Nuk mund t’i kapërdijë këto.

Po të mos ishte efekti i kartelit Troplini dhe jo vetëm, sepse nuk është vetëm Troplini në Durrës, është edhe banda tjetër që mbështeti Ani Dyrmishin, Durrësi mund të ishte 80 përqind për PD-në.

Pra, këtu nuk mund të injorohet për një shkak apo për një tjetër efekti i farsës kombëtare.

E qartë, besoj.

Isa Myzyraj, Ora Neës: Kryetarja e Gjykatës së Apelit të PD, z.Adriana Kalaja, prej ditësh është duke sulmuar PD dhe kandidaten tuaj më të votuar Jorida Tabakun për vjedhje votash, në një kohë kur, ju si kryetari i partisë çdo ditë keni dalë për të denoncuar farsën elektorale të Edi Ramës, por edhe grupi i avokatëve të PD janë duke bërë ankime. Ju si kryetar i PD, a keni një qëndrim për këtë? Përveç faktit që PD është një parti ku është e lirë dhe çdokush ka mendimin e vët, por zonja në fjalë është zyrtare e lartë e partisë PD, pra nuk është një militante e thjeshtë që mund të akuzojë dhe mund të thojë çfarë të dojë.

Berisha: Zonja Kalaja është një luftëtare e vendosur, e guximshme, e cila në këto 4 vite është përballur direkt me kryeministrin e Shqipërisë më shumë se kushdo tjetër, në atë linjën e saj, që ajo beson se është avokate, linjën e drejtësisë dhe paditë.

Por zonja Kalaja dhe cilido tjetër qoftë, në vlerësimin tim, nuk ka të drejtë pa fakte të akuzojë ndonjë njeri.

E treta, Sali Berisha është shprehur për këtë se zonja Tabaku ka bërë një nga fushatat më intensive, siç unë kam konstatuar dhe e vërteta, jo vetëm unë.

Por, përsëri e mbyllim këtu, në qoftë se Edi Rama, për hiret e Olta Xhaçkës, urdhëroi që asnjë kuti të mos hapet, unë s’e kam bërë kurrë këtë dhe çdo kandidat që ka dyshimet më të vogla se janë bërë një padrejtësi nga cilido, unë e ftoj të marrë dokumentacionin dhe ta verifikojë.

Detyra ime është, pavarësisht nga konsideratat personale që kam, të mbroj parimet bazë.

Dhe parimi bazë është, ai që ka dyshime, le t’i faktojë pa pasur asnjë pengesë në sigurimin e të gjithë dokumentacionin.

Janë disa, nuk është vetëm zonja Kalaja. Ka edhe të tjerë.

Po ne nuk jemi parti që t’u themi mos hap kutitë. Jo, atë nuk e themi kurrë ne.

Kërko të drejtën tënde, ky është parimi ynë.